May 22, 2025
දේශීය ආදායම් දෙපාර්තමේන්තුව විසින් ජාතික ක්‍රිකට් ක්‍රීඩකයන් ශ්‍රී ලංකා ක්‍රිකට් සේවකයන් ලෙස ‘අත්තනෝමතික ලෙස’ වර්ගීකරණය කිරීම අභියෝගයට ලක්කරමින් ගොනුකරන ලද රිට් පෙත්සමක් සම්බන්ධයෙන් විභාගයක් සඳහා ශ්‍රී ලංකා ක්‍රිකට් ක්‍රීඩකයින් පිරිසක් අද අධිකරණයට පැමිණ තිබේ.
එක්දින හා විස්සයි20 ක්‍රිකට් කණ්ඩායම්වල සහ ටෙස්ට් ක්‍රිකට් කණ්ඩායමේ නායකයන් ලෙස චරිත් අසලංක සහ ධනජය ද සිල්වා විසින් මෙම රිට් පෙත්සම ගොනුකරන ලදී.
දේශීය ආදායම් දෙපාර්තමේන්තුව විසින් ශ්‍රී ලංකා ජාතික ක්‍රිකට් ක්‍රීඩකයන් ක්‍රිකට් ආයතනයේ සේවකයන් ලෙස එක රැයකින් ‘අත්තනෝමතික හා අසාධාරණ ලෙස’ වර්ගීකරණය කිරීම සම්බන්ධයෙන් ක්‍රිකට් ක්‍රීඩකයන් විසින් මෙම පෙත්සම ඉදිරිපත් කරන ලදී.
දේශීය ආදායම් දෙපාර්තමේන්තුවේ තීරණය අවලංගු කිරීමට අතුරු නියෝගයක් ඉල්ලා පෙත්සම්කරුවෝ මෙම රිට් පෙත්සම ගොනුකළහ.
වනිඳු හසරංග, ඇන්ජලෝ මැතිව්ස්, මහීෂ් තීක්ෂණ, පැතුම් නිශ්ශංක සහ කුසල් මෙන්ඩිස් ඇතුළු ජාතික ක්‍රිකට් ක්‍රීඩකයින් 38 දෙනෙකුගේ අත්සන් සහිත ලිපියක් මාර්තු මාසයේදී අභියාචනාධිකරණයට ඉදිරිපත් කරන ලද අතර, එම නීති රෝධී වර්ගීකරණය සම්බන්ධයෙන් සුදුසු නීතිමය සහනයක් ලබාගැනීම සඳහා පෙත්සම්කරුවන්ට අනුමැතිය පළකරන ලදී.
පෙත්සම්කරුවන් වෙනුවෙන්, ශ්‍රී ලංකාවේ ක්‍රිකට් ක්‍රීඩකයින් ඓතිහාසිකව ස්වාධීන සේවා සපයන්නන් ලෙස සලකනු ලැබ ඇති බවත්, ඇත්ත වශයෙන්ම ඔවුන් සේවකයින් ලෙස අර්ථ දැක්විය නොහැකි බවත්, ශ්‍රී ලංකා ක්‍රිකට් ආයතනය සහ ක්‍රීඩකයින් අතර ගිවිසුම් සම්මත කරගත් පළමු අවස්ථාවේ සිටම, ජාතික ක්‍රිකට් ක්‍රීඩකයින් පාර්ශවයන් අතර ස්වාධීන සේවා සපයන්නන් ලෙස සලකනු ලැබ ඇති බවත් ඉදිරිපත් කරන ලදී.
