October 3, 2025
මැලේසියානු විදේශ ගමන් බලපත්‍රයක් ලබා ගැනීම සඳහා දරුවෙකුගේ අනන්‍යතාව භාවිත කිරීමට ශ්‍රී ලාංකික කණ්ඩායමක් විසින් කරන ලද කපටි උත්සාහයක් ක්වාලාලම්පූර් ආගමන දෙපාර්තමේන්තුව විසින් ව්‍යර්ථ කර තිබේ.
ක්වාලාලම්පූර් ආගමන අධ්‍යක්ෂ වන් මොහොමඩ් සෞපී වන් යූසොෆ් පැවසුවේ මෙම සිද්ධියේදී, ශ්‍රී ලාංකික පිරිමියකු දරුවාගේ මව යැයි හැඳින්වූ දේශීය කාන්තාවක් සමඟ අවුරුදු 10 කාණ්ඩය යටතේ පළමු වරට දරුවකු සඳහා විදේශ ගමන් බලපත්‍රයක් සඳහා අයදුම් කිරීමට පැමිණි බවයි.
ඉදිරිපත් කරන ලද උප්පැන්න සහතිකයේ සඳහන් වයසට වඩා පුරුෂයාගේ ශාරීරික පෙනුම බෙහෙවින් වයස බව ආගමන නිලධාරීන් දුටු විට සැකයක් ඇති වී තිබේ.
“ජෛවමිතික සත්‍යාපනයට භාජනය වන ලෙස ඉල්ලා සිටි විට මූලික මැලේ භාෂාවෙන් සරල උපදෙස් අනුගමනය කිරීමටද ඔහුට නොහැකි වුණා,”යනුවෙන් ආගමන අධ්‍යක්ෂ ප්‍රකාශයක් නිකුත් කරමින් පැවසීය.
තවදුරටත් පරීක්ෂණවලින් හෙළි වී ඇත්තේ දේශීය කාන්තාව අදාළ කණ්ඩායමේ උපදෙස් යටතේ ක්‍රියා කර ඇති අතර එමඟින් ශ්‍රී ලාංකිකයන්ට මැලේසියානු විදේශ ගමන් බලපත්‍ර ලබා ගැනීම සඳහා ‘කෙටිමඟක්’ හිමිව ඇති බව යැයි සෞපී තවදුරටත් පැවසීය.
දේශීය කාන්තාවගේ සැබෑ දරුවාගේ උප්පැන්න සහතිකය ශ්‍රී ලාංකිකයාගේ පුත්‍රයාට මැලේසියානු විදේශ ගමන් බලපත්‍රයක් සඳහා අයදුම් කිරීමට හැකි වන පරිදි භාවිත කිරීමට අදාළ කණ්ඩායම කටයුතු කර තිබේ.
1966 විදේශ ගමන් බලපත්‍ර පනත යටතේ වැඩිදුර විමර්ශන සඳහා පුද්ගලයන් දෙදෙනාම රඳවා තබා ගෙන ඇත.
ඔවුන් විසින් භාවිත කළ බවට විශ්වාස කෙරෙන ලේඛන සහ ජංගම දුරකථන කිහිපයක් ද අත්අඩංගුවට ගෙන තිබේ.
අන්තර්ජාතික සංචාරක ලේඛන නීති විරෝධී ලෙස ලබා ගැනීමට ගත් උත්සාහයන්ට සම්බන්ධ ජාලය සොයා ගැනීමට පරීක්ෂණ සිදු වෙමින් පවතී.
“විදේශ ගමන් බලපත්‍රයක් ලබා ගැනීම සඳහා මැලේසියානු පුරවැසියකු ලෙස පෙනී සිටීම ජාතික ආරක්ෂාවට තර්ජනයක් වන ක්‍රමානුකූල වංචාවක්. ලේඛන අනිසි ලෙස භාවිත කරන පුරවැසියන් අනන්‍යතා සොරකම, නීතිමය ගැටළු සහ ව්‍යාජ අපරාධ වාර්තා සැකසීමේ අවදානමට මුහුණ දෙනවා,” යැයි ඔහු පැවසීය.
42.31%
