November 11, 2023
අන්තර්ජාතික ක්‍රිකට් කවුන්සිලයේ (ICC) නිලධාරීන් විසින් මාස කිහිපයක් තිස්සේ ශ්‍රී ලංකාවට අවවාද කරමින් සිටි බවත්, ICC විසින් ශ්‍රී ලංකා ක්‍රිකට් සාමාජිකත්වය අත්හිටුවීමේ වගකීම ක්‍රීඩා ඇමැති රොෂාන් රණසිංහ දැරිය යුතු බවත් ශ්‍රී ලංකා ක්‍රිකට් ආයතනයේ සභාපති ශම්මි සිල්වා පැවැසීය.
අද කොළඹදී ජනමාධ්‍ය හමුවකට එක්වෙමින් ශම්මි සිල්වා සඳහන් කරන ලද්දේ, දූෂණ චෝදනා සඳහා සාක්ෂි ඇත්නම් නීතිමය ක්‍රියාමාර්ග ගන්නා ලෙස ක්‍රීඩා ඇමැතිවරයාට අභියෝග කරන බවයි.
මෙම තහනම ශ්‍රී ලංකාවේ පැවැත්වීමට නියමිත එළැඹෙන වයස අවුරුදු 19න් පහළ ලෝක කුසලාන තරගාවලියට තර්ජනයක් වන අතර එමඟින් රටට සහ ශ්‍රී ලංකා ක්‍රිකට් ආයතනයට සැළකිව යුතු ආදායමක් අහිමි විය හැකි බවද හෙතෙම පෙන්වාදුන්නේය.
අභියෝග මධ්‍යයේ වුවද, දේශපාලන මැදිහත්වීමක් සිදු නොවන බවට ජනාධිපතිවරයාගේ සහතිකය මත ICC සමඟ ගැටලු විසඳීමට සම්බන්ධ වීමට ෂම්මි සිල්වා එහිදී කැමැත්ත පළකළේය.
ක්‍රීඩා ඇමැතිවරයාට එල්ලවී ඇතැයි කියන ජීවිත තර්ජන චෝදනා සම්බන්ධයෙන් ප්‍රතිචාර දක්වමින් ශ්‍රී ලංකා ක්‍රිකට් සභාපතිවරයා පැවැසුවේ, එසේ තර්ජන එල්ල කරන්නේ පාතාල සබඳතා ඇති දේශපාලනඥයන්ට බවයි.
