ජාතික තරුණ සේවා සභාව විසින් සංවිධානය කරන ලද 2024 ස්මාර්ට් යෞවන ප්‍රදර්ශන, සංගීත සංදර්ශන සහ ‘සිහිනය’ වැඩසටහන ක්‍රියාත්මක කිරීමේදී බරපතල මූල්‍ය අක්‍රමිකතා, මැතිවරණ නීති උල්ලංඝනය කිරීම් සහ මහජන මුදල් අනිසි ලෙස භාවිත කිරීම සිදුව ඇති බව ජාතික විගණන කාර්යාලය විසින් නිකුත් කරන ලද නවතම විගණන වාර්තාවකින් අනාවරණය වී තිබේ.

එම වාර්තාවට අනුව, මැතිවරණ කොමිසමේ පැහැදිලි නියෝග නොතකා, 2024 ජනාධිපතිවරණයට පෙර දිනවල මතභේදාත්මක අවසන් මොහොතේ කරන ලද ගනුදෙනු ඇතුළුව ප්‍රදර්ශන, සංගීත සංදර්ශන සහ අනුමත නොකළ වැඩසටහන් සඳහා රුපියල් මිලියන ගණනක් කඩිමුඩියේ වියදම් කර ඇත.

2024 ජූලි 15 වැනි දින කැබිනට් මණ්ඩලය වැඩසටහන විධිමත් ලෙස අනුමත කර තිබුණද, කැබිනට් අනුමැතිය ජාතික තරුණ සේවා සභාව වෙත දැනුම් දීමට පෙර ප්‍රදර්ශන තුනක් සහ සංගීත ප්‍රසංග පහක් පවත්වා ඇති බව විගණනයෙන් හෙළි වී ඇත්තේ ක්‍රියාපටිපාටි විනිවිදභාවය සහ මූල්‍ය වගවීම පිළිබඳ බරපතල ගැටළු මතු කරමිනි.

ජනාධිපතිවරණය අවසන් වන තෙක් උත්සවය කල් දමන ලෙස 2024 ජූලි 30 දිනැති මැතිවරණ කොමසාරිස්වරයාගේ ලිඛිත නියෝගයක් නොසලකා හරිමින්, ජාතික තරුණ සේවා සභාව විසින් 2024 අගෝස්තු 16 සිට 18 දක්වා ක්‍රීඩා ෆීස්ටා වැඩසටහන යටතේ සංගීත ප්‍රසංගයක් පවත්වා ඇති බවට චෝදනා එල්ල වී තිබේ.

මෙම උත්සවය සඳහා බදු ගෙවන්නන්ගේ මුදල්වලින් රුපියල් මිලියන 14.57 ක් වැය වී ඇති බව අනාවරණය වේ.

මැතිවරණ දිනයට පෙර මූල්‍ය ක්‍රියාකාරකම්වල වැඩිවීමක් ද විගණන වාර්තාවෙන් ඉස්මතු කර ඇත.

2024 සැප්තැම්බර් 20 වැනි දින, ඡන්ද විමසීම ආරම්භ වීමට පැය 24කට පෙර, ජාතික තරුණ සේවා සභා අධ්‍යක්ෂ ජනරාල් විසින් තෝරා ගන්නා ලද සැපයුම්කරුවන් තිදෙනෙකුට රුපියල් මිලියන 37.86ක් ගෙවා ඇත.

එදිනම අලුතින් ලියාපදිංචි වූ සැපයුම්කරුවන් දෙදෙනෙකුට තවත් රුපියල් මිලියන 11.37ක් ලබා දී ඇත.

අධ්‍යක්ෂ ජනරාල්වරයාගේ උපදෙස් මත ඔවුන්ගේ ලියාපදිංචි කිරීම් කඩිනම් කර ඇත.

මෙම ගෙවීම් සඳහා අවසර දෙන ලෙස ඉහළ නිලධාරීන් විසින් බලපෑම් කරන ලද බව මූල්‍ය නිලධාරීන් ලිඛිතව තහවුරු කර ඇති බව වාර්තාවේ දැක්වේ.

තවත් සොයාගැනීමක් වන්නේ, ජාතික තරුණ සේවා සභාවේ අනුබද්ධිත ආයතනයක් වන ශ්‍රී ලංකා තරුණ සේවා සමාගම, ප්‍රසංග සඳහා ගිනිකෙළි, බැනර් සහ ආරක්ෂාව ඇතුළු සේවාවන් සඳහා ව්‍යාජ ඉන්වොයිසි සකස් කර රුපියල් මිලියන 7.33ක අධික බිල්පතක් ගෙවා ඇති බවට චෝදනා එල්ල වීමයි.

විගණනයේදී සටහන් වී ඇත්තේ ප්‍රසම්පාදන ක්‍රියා පටිපාටි නිතර මඟ හැර ඇති බවත්, සැපයුම්කරුවන්ගේ ලැයිස්තු සහ පිරිවිතර අධ්‍යක්ෂ ජනරාල් කාර්යාලය විසින් සෘජුවම හසුරුවා ඇති බවත්, ප්‍රසම්පාදන රෙගුලාසි උල්ලංඝනය කරමින් සැපයුම්කරුවන් නිසි ලියකියවිලි හෝ තැන්පතු නොමැතිව ලියාපදිංචි කර ඇති බවත්ය.

කැබිනට් අනුමැතියට අනුව ජනාධිපති ලේකම් කාර්යාලය විසින් ආපසු ගෙවිය යුතු යැයි කියනු ලබන වැඩසටහන සඳහා වැය කරන ලද රුපියල් මිලියන 323.39ක් 2024 දෙසැම්බර් 31 වන විට අයකර ගෙන නොමැති බවත් වාර්තාව තවදුරටත් හෙළි කර ඇත.

ප්‍රසංග 10ක් පටිගත කර සංරක්ෂණය කිරීම සඳහා රුපියල් මිලියන 12ක් වෙන් කර තිබියදීත්, විගණන පරීක්ෂාව සඳහා වීඩියෝ වාර්තා ඉදිරිපත් කිරීමට කවුන්සිලය අපොහොසත් වී ඇත.

2024 ජනවාරි 10 වැනි දින නිකුත් කරන ලද ජාතික අයවැය චක්‍රලේඛ 2024/01 යටතේ රටේ පවතින ආර්ථික අර්බුදය හේතුවෙන් රාජ්‍ය වියදම් දැඩි ලෙස පාලනය කිරීම අනිවාර්ය කිරීමේ රජයේ මූල්‍ය විනය පිළිබඳ දැඩි උපදෙස් නොතකා මෙම මූල්‍ය අවභාවිතය සිදුවී ඇත.

මීට අමතරව, ස්මාර්ට් යූත් ප්‍රදර්ශන, සංගීත සංදර්ශන සහ යෞවන උත්සව ඇතුළුව මෙම වැඩසටහන් සඳහා රුපියල් මිලියන 538.79ක් වියදම් කර ඇති බව විගණන වාර්තාව තවදුරටත් හෙළි කර ඇති අතර, ඒ කිසිවක් කවුන්සිලයේ නිල වාර්ෂික ක්‍රියාකාරී සැලැස්මේ කොටසක් හෝ එහි මූලික වරම සමඟ අනුකූල නොවූ බව ද අනාවරණය වී තිබේ.

මෙම වැඩසටහන් සඳහා ජනාධිපති ලේකම් කාර්යාලය විසින් අනුමත කරන ලද රුපියල් මිලියන 493.25ක වෙන් කිරීමක් තිබියදීත්, විගණනය වන විට කවුන්සිලයට ලැබී තිබුණේ රුපියල් මිලියන 74.20ක් පමණක් වන අතර, එහි ප්‍රතිඵලයක් ලෙස කවුන්සිලයේ වාර්ෂික ප්‍රාග්ධන වෙන්කිරීමෙන් ලබා ගැනීමෙන් රුපියල් මිලියන 464.59ක් වියදම් කර තිබේ.

එමඟින් අනෙකුත් ප්‍රමුඛ තරුණ සංවර්ධන වැඩසටහන් සඳහා අරමුදල් යෙදවීම අඩපණ වී ඇත.

සංගීත සංදර්ශන තුනක් සහ ස්වාධීන සංගීත ඉසව් 11ක් සහිත ස්මාර්ට් යූත් ප්‍රදර්ශන තුනක් පමණක් සංවිධානය කිරීම සඳහා රුපියල් මිලියන 323.39ක්වැය කර තිබිණි.

සැළකිව යුතු කරුණක් නම්, මෙයින් රුපියල් මිලියන 259.83ක් කැබිනට් අනුමැතිය ලැබීමට පෙර සිටම වියදම් කර ඇති අතර එය මූල්‍ය කළමනාකරණ විදිවිධාන සෘජුවම උල්ලංඝනය කර තිබීමයි.

තවද, මැතිවරණ කොමිසමේ උපදෙස් හා මැතිවරණ රෙගුලාසි නොසළකා හරිමින් වැඩසටහන් කිහිපයක් ඉදිරියට ගොස් ඇති අතර එහි ප්‍රතිඵලයක් ලෙස රුපියල් මිලියන 14.57ක අමතර වියදමක් දැරීමට සිදු වී තිබේ.

රජයේ ප්‍රසම්පාදන මාර්ගෝපදේශවලට අනුකූල නොවී භාණ්ඩ හා සේවා ප්‍රසම්පාදනය සිදු කිරීමත් සමඟ බරපතළ ප්‍රසම්පාදන අක්‍රමිකතා ද විගණනයෙන් අනාවරණය වී තිබේ.