October 10, 2025
සමගි ජන බලවේගයේ නායකත්වය සහ මගපෙන්වීම යටතේ එක්සත් ජාතික පක්ෂය සමඟ ඒකාබද්ධ දේශපාලන වැඩසටහනක් දියත් කිරීමේ යෝජනාවක් සමගි ජන බලවේගයේ කෘත්‍යාධිකාරී මණ්ඩලය ඒකමතිකව අනුමත කර ඇත.
තීරණය නිවේදනය කරමින් විපක්ෂ නායක සජිත් ප්‍රේමදාස පැවසුවේ, පොදු ප්‍රතිපත්ති රාමුවක් මත එක්ව කටයුතු කිරීම සඳහා සජබ කෘත්‍යාධිකාරී මණ්ඩලය සහ කළමනාකරණ කමිටුව යන දෙකම සාමූහික එකඟතාවයකට පැමිණ ඇති බවයි.
මෙම වැඩසටහන මගින් රටට සහ රටේ ජනතාවට බලපාන ගැටළු සඳහා ප්‍රායෝගික, ප්‍රජාතන්ත්‍රවාදී සහ ප්‍රගතිශීලී විසඳුම් ලබාදීම අරමුණු කරන අතරම, දෙපාර්ශවයටම අදාළ අනන්‍යතා රඳවාගැනීම සහතික කරන බව ඔහු පැවසීය.
එක්සත් ජාතික පක්ෂය සමඟ සහයෝගයෙන් කටයුතු කිරීමට කෘත්‍යාධිකාරී මණ්ඩලය පළමුවරට ඓතිහාසික තීරණයක් ගෙන ඇති බව සජබ මහලේකම් රංජිත් මද්දුම බණ්ඩාරද පැවසීය.
සජිත් ප්‍රේමදාස විපක්ෂ නායකයා ලෙස දිගටම කටයුතු කරන බවත්, නායකත්වය සම්බන්ධයෙන් කිසිදු ආරවුලක් නොමැති බවත් ඔහු පැහැදිලි කළේය.
මෙම එක්සත් දේශපාලන ගමනට සජබ පක්ෂයේ බිම් මට්ටමේ සාමාජිකයන් ඔවුන්ගේ ආශිර්වාදය සහ සහයෝගය ප්‍රකාශ කර ඇති බවද ඔහු පැවසීය.
