තම බිරිඳගේ අසභ්‍ය රූප සමාජ මාධ්‍ය හරහා ඇගේ සහෝදරියට යැවූ බව මෙරට ජනප්‍රිය ගායකයකු අධිකරණය හමුවේ පිළිගෙන තිබේ.

අසභ්‍ය ඡායාරූප බෙදා හැරීම සම්බන්ධ චෝදනා එල්ල වූ අදාළ සැකකරු නඩුව විභාගයට ගත් අවස්ථාවේ කොළඹ ප්‍රධාන මහේස්ත්‍රාත් අසංග එස්. බෝදරගම ඉදිරියේ පෙනී සිටියේය.

ගායකයාගේ බිරිඳ විසින් ගොනු කරන ලද පැමිණිල්ලක් සම්බන්ධයෙන් අපරාධ පරීක්ෂණ දෙපාර්තමේන්තුවේ සයිබර් අපරාධ ඒකකය විසින් පරීක්ෂණයක් ආරම්භ කර තිබිණි.

සැකකරු වෙනුවෙන් පෙනී සිටි නීතිඥ ජගත් බණ්ඩාර අධිකරණයට දන්වා සිටියේ තම සේවාදායකයා චෝදනා පිළිගෙන නඩුව කඩිනමින් විසඳා ගැනීමට කැමති බවයි.

පැමිණිල්ල පාර්ශ්වයෙන් පැවසුණේ ගායකයා සමඟ වසර දහයකට ආසන්න කාලයක් ජීවත් වූ බිරිඳ, ඔහුගේ විෂමාචාර හේතුවෙන් තාවකාලිකව වෛවාහක නිවසින් පිටව ගොස් ඇගේ මවගේ නිවසේ රැඳී සිටි බවයි.

එම කාලය තුළ, ඇය ජපානයේ තරුණයකු සමඟ දුරකථන සම්බන්ධතාවක් පවත්වා ගෙන ගිය බව වාර්තා වේ.

කෙසේවෙතත්, යුවළ පසුව සමගි වී ඇත.

පසුව ගායකයා තම බිරිඳගේ ෆේස්බුක් පණිවිඩ බලා ඇති අතර, එහිදී තරුණයා සමඟ පෙර හුවමාරු කරගත් පණිවුඩ අතරතුර යවන ලද නිරුවත් රූපයක් ඔහුට හමු වී ඇතැයි පැවසේ.

ඉන්පසු ගායකයා එම ඡායාරූපය බිරිඳගේ සහෝදරියට WhatsApp හරහා යවා ඇති අතර, එය පැමිණිල්ලට හේතු වී තිබිණි.

වරද පිළිගැනීමෙන් පසු, සැකකරු විසින් සිදු කරන ලද පෙර වැරදි පිළිබඳ වාර්තාවක් ඉදිරිපත් කරන ලෙස මහේස්ත්‍රාත්වරයා නියෝග කළ අතර ඊළඟ නඩු විභාගය දෙසැම්බර් 19 වැනි දිනට නියම කළේය.