නීතිපති දෙපාර්තමේන්තුවේ නිලධාරීන් ඉහළ අධිකරණවල විනිසුරුවරුන් ලෙස පත් කිරීම අධිකරණයට හානි කිරීමක් නොව එය වැඩිදියුණු කිරීමක් බව විශ්‍රාමික ශ්‍රේෂ්ඨාධිකරණ විනිසුරු ශිරානි තිලකවර්ධන පැවසුවාය.

වෘත්තීය විනිසුරුවරුන්ට වඩා නීතිපති දෙපාර්තමේන්තුවේ නිලධාරීන් ශ්‍රේෂ්ඨාධිකරණ විනිසුරුවරුන් ලෙස පත් කිරීම සම්බන්ධයෙන් නීති වෘත්තියේ ඇතැම් පාර්ශවයන්ගෙන් දීර්ඝ කාලයක් තිස්සේ එල්ල වූ විවේචන මධ්‍යයේ, ඇය මෙම අදහස් පළ කර තිබේ.

දෙපාර්තමේන්තු නිලධාරීන්ට රජයේ නීතිඥවරුන් ලෙස තම වෘත්තීය ජීවිතයේ මුල් අවධියේ සිටම රට පුරා සේවය කිරීමට අවස්ථාව ලබා දෙන බවත්, ඔවුන් නඩු පවරන පාර්ශ්ව ලෙස අධිකරණයේ සෑම තරාතිරමකම පෙනී සිටින බවත් විනිසුරු තිලකවර්ධන ප්‍රකාශ කර ඇත.

“මෙම ප්‍රශ්නය ඉතා වැදගත් වන අතර ප්‍රවේශමෙන් විසඳා ගත යුතුයි. අධිකරණයේ සංවර්ධනයට සහ කාර්යක්ෂමතාවට කිසිදු ඍණාත්මක බලපෑමක් මා පෞද්ගලිකව දකින්නේ නැහැ. ඒ වෙනුවට, දෙපාර්තමේන්තුවේ නිලධාරීන්ට අත්දැකීම් සම්භාරයක් තිබෙන නිසා, එය අධිකරණය වැඩි දියුණු කරනවා. මෙම අධිකරණවල අසන්නට ලැබෙන බොහෝ කරුණු මූලික අයිතිවාසිකම් අයදුම්පත්, මහජන නීතිය සහ ව්‍යවස්ථාමය කරුණු වන බැවින්, මෙම නිලධාරීන්ට සැළකිව යුතු අත්දැකීම් ඇති සියලුම ක්ෂේත්‍ර වන බැවින්, විශේෂයෙන් ඉහළ අධිකරණවල ඔවුන් සැළකිව යුතු කාර්යභාරයක් ඉටු කරන බව අපි දදන්නවා,” යැයි ඇය පැවසුවාය.

තවදුරටත් කතා කරමින්, දෙපාර්තමේන්තුවේ නිලධාරීන් අධිකරණයට පත් කිරීම දිගු කලක් තිස්සේ පවතින ප්‍රවණතාවක් බවත්, එබැවින් මෙම භාවිතය පිළිබඳ ඇතැම් වැරදි වැටහීම්, විනිසුරුවරුන් ලෙස පත් වූ පසු එවැනි නිලධාරීන්ගේ කාර්යයට අහිතකර ලෙස බලපෑ හැකි බවත් ඇය සඳහන් කළාය.

මෙම මාතෘකාව දශක ගණනාවක් තිස්සේ සාකච්ඡා කර ඇති අතර, මෑතකදී, එවක ජනාධිපති රනිල් වික්‍රමසිංහ විසින් ජ්‍යෙෂ්ඨ රජයේ නීතිඥවරයකු මහාධිකරණ විනිසුරුවරයකු ලෙස පත් කිරීම සම්බන්ධයෙන් අධිකරණ සේවා සංගමය කණස්සල්ල පළ කළේය.

පත්වීමෙන් පසු, අධිකරණ සේවා සංගමය එම ප්‍රවණතාව විවේචනය කළ අතර, නීති නිලධාරීන්ගේ සංගමය මෙම පියවර අගය කර තිබිණි.

ඒ සිවිල් සහ අපරාධ අධිකරණවල මෙන්ම අභියාචනා අධිකරණවල දෙපාර්තමේන්තුවේ නිලධාරීන් ලබා ඇති පුළුල් අත්දැකීම් සහ ඉහළ පෙළේ නඩු කටයුතුවලට ඔවුන් සම්බන්ධ වී තිබීම ඉස්මතු කරමිනි.