මෙරට නිල සංචාරයක නිරත ඕස්ට්‍රේලියාවේ ආණ්ඩුකාර ජනරාල් සමන්තා ජෝයි මොස්ටින්, බොරැල්ල පොදු සුසාන භූමියට පැමිණ එහි පිහිටි පොදුරාජ්‍ය මණ්ඩලීය යුද සොහොන් භූමියේ තැන්පත් කර ඇති ඕස්ට්‍රේලියානු ජාතිකයන්ගේ සොහොන්වලට ගෞරව දැක්වීමට එක් වී තිබේ.

පළමු ලෝක යුද්ධයේදී සහ දෙවැනි ලෝක යුද්ධයේදී ශ්‍රී ලංකාවේදී ජීවිත අහිමි වූ ඕස්ට්‍රේලියානු හමුදා භටයන් සහ කාන්තාවන් සිහිපත් කරමින් ඇය එම ස්ථානයේ දී මල් වඩම් තබා පුෂ්පෝපහාර දැක්වූවාය.

එම උත්සවය ඕස්ට්‍රේලියානු ආරක්ෂක හමුදාවේ කොළඹ පදනම් කරගත් සාමාජිකයන් විසින් සංවිධාන කර තිබිණි.

එම අවස්ථාවට කොළඹ නගරාධිපති ව්‍රායි කැලි බල්තසාර් ද සහභාගී වූවාය.

ඊට අමතරව, ආණ්ඩුකාර ජනරාල් මොස්ටින් ගාල්ලේ සුනාමි කෞතුකාගාරය නැරඹීමට ද ගිය අතර 2004 දී සිදුවූ එම විනාශකාරී ස්වාභාවික විපතට ගොදුරු වූවන්ට ද උපහාර දැක්වීමට ඇය එක්ව තිබිණි.

සුනාමියෙන් පීඩාවට පත් ප්‍රදේශවාසීන් සමඟද ඇය කතාබහක නිරත වී තිබේ.