May 4, 2025
දින 50කට පමණ පෙර සිදු කරන ලද අහඹු සමීක්ෂණය සම්පූර්ණ කිරීම සඳහා කෘෂිකර්ම අමාත්‍යාංශයට තවත් දිස්ත්‍රික්ක කිහිපයක් ආවරණය කිරීමට ඉතිරිව ඇති බව වාර්තා වේ.
ඒ අනුව එම සත්ව සංගණනයේ නිරවද්‍යතාව සහ වලංගුභාවය මෙතෙක් තහවුරු කර නොමැත.
ව්‍යසනකාරී සතුන් පිළිබඳ මිනිත්තු පහක සංගණනය මාර්තු 15 වැනි දින සිදු කරන ලද අතර, එහිදී රිලවුන්, දඬු ලේනුන් සහ මොනරුන් ගණන් කරන ලෙස ජනතාවගෙන් ඉල්ලා සිටියේය.
වන සතුන් නිසා සිදුවන හානි අවම කිරීම සඳහා අමාත්‍යාංශය විශේෂ කමිටුවක් පත් කළේය.
එය පසුගිය සතියේ තවත් රැස්වීමක් පැවැත්වූ අතර, සංගණනයේ අවසාන ප්‍රතිඵලයෙන් පසු පාර්ශවකරුවන්ගේ වැඩමුළුවක් පිළිබඳ එහිදී සාකච්ඡා පවත්වා තිබේ.
කමිටුවේ සාමාජිකයකු වන කෘෂිකර්ම තාක්ෂණ අධ්‍යක්ෂ හේමන්ත අමරසිංහ පැවසුවේ විශ්වවිද්‍යාල සිසුන්, වනජීවී විශේෂඥයන්, සත්ව සුභසාධන ක්‍රියාකාරීන්, පරිසරවේදීන් මෙන්ම වනජීවී සංරක්ෂණ, වන සංරක්ෂණ සහ අනෙකුත් දෙපාර්තමේන්තු නිලධාරීන් මෙන්ම අමාත්‍යාංශ ද මෙම වැඩමුළුව සඳහා කැඳවනු ලබන අතර එහිදී දැනුම බෙදා ගැනීම සහ බෝග පළිබෝධ පාලනය කිරීම සඳහා ශක්‍ය සැලැස්මක් පිළිබඳ සාකච්ඡාවක් පැවැත්වෙන බවයි.
අමරසිංහ පැවසුවේ නිලධාරීන් ඔවුන්ගේ නිතිපතා කරන වැඩ අතරතුර සමීක්ෂණය සිදු කරන බැවින් මොනරාගල, මහනුවර, පුත්තලම සහ මාතර වැනි දිස්ත්‍රික්කවල සමීක්ෂණය සම්පූර්ණ කිරීමට නොහැකි වී ඇති බවයි.
මෙම සතියේ පළාත් පාලන මැතිවරණය හේතුවෙන් ග්‍රාම නිලධාරීන් සහ කෘෂිකර්ම නිලධාරීන් වැනි නිලධාරීන් සමීක්ෂණ සිදු නොකරන බව ඔහු පැහැදිලි කළේය.
රිලා ගැටලුව විසඳීම සඳහා විසඳුම් මෙන්ම අනෙකුත් සතුන්ගෙන් බෝග හානි අවම කිරීම සඳහා යාන්ත්‍රණ දැනටමත් ලබා දී ඇති බව සංරක්ෂණවේදීන් පැවසූ නමුත් රජය සම්පූර්ණයෙන්ම වෙනස් දෙයක් කරමින් සිටී.
පරිසර ක්‍රියාකාරිකයකු සහ පර්යේෂක සුපුන් ලහිරු ප්‍රකාශ් පැවසුවේ විශේෂඥයන් සහ විද්‍යාඥයන් මිනිස් – සත්ව ගැටුම් අධ්‍යයනය කර, විද්‍යාත්මක දැනුම රැස් කර, ප්‍රායෝගික පිළියම් ලබා දී ඇති නමුත්, ආණ්ඩු විසින් ඒවා නොසළකා හරින බවයි.
“ආණ්ඩු විද්‍යාත්මකව නිවැරදි හා ප්‍රායෝගික පියවර නෙවෙයි, ජනප්‍රිය ක්‍රියාමාර්ග ක්‍රියාත්මක කිරීමට උත්සාහ කරනවා, මේ නිසා බොහෝ වනජීවී ගැටලු විසඳී නැහැ,” යනුවෙන් ඔහු පැවසීය.
