විපක්ෂයට වාසි නොවන ලෙස ආණ්ඩුවට බහුතරයක් ඇති පළාත් පාලන ආයතනවල සභා පිහිටුවීම සඳහා සියලුම විපක්ෂ පක්ෂ සහ ස්වාධීන කණ්ඩායම් එක්විය යුතු බව සමගි ජන බලවේගයේ පාර්ලිමේන්තු මන්ත්‍රී දයාසිරි ජයසේකර පවසයි.

සභාවල සභාපති ධුර හෝ උප සභාපති ධුර ගැන නොසිතා ජාතික ජන බලවේගයට එරෙහිව සියලුම විපක්ෂ පක්ෂ සහ ස්වාධීන කණ්ඩායම් එක්විය යුතු බව ඔහු ජනමාධ්‍ය වෙත පැවසීය.

පඬුවස්නුවර ප්‍රාදේශීය සභාව එලෙස ආණ්ඩුවට බලය නොලැබෙන සභාවක් ලෙස විපක්ෂයේ බලය පිහිටුවීමෙන් රටට ආදර්ශයක් සපයන බව ඔහු සඳහන් කළේය.

“පඬුවස්නුවර ප්‍රාදේශීය සභාවේ ජාතික ජන බලවේගය ආසන 17 ක් පමණක් ලබාගෙන තිබෙනවා. විපක්ෂය ආසන 21 ක් තිබෙනවා. අපට සියලුම විපක්ෂ පක්ෂ සහ ස්වාධීන කණ්ඩායම් සමඟ මෙම සභාව පිහිටුවිය හැකියි” ඔහු පැවැසීය.

සියලුම සභා සභාපතිවරුන් සහ සාමාජිකයන් ඔවුන්ගේ ධුර කාලය තුළ කිසිදු වංචාවකට හා දූෂණයකට සම්බන්ධ නොවන බවට ප්‍රතිඥා දිය යුතු බව ඔහු වැඩිදුරටත් සඳහන් කළේය.