ත්‍රිකුණාමල වරාය සහ ඒ ආශ්‍රිත බලශක්ති යටිතල පහසුකම් ඉන්දියාවට බදු දීම සම්බන්ධයෙන් විරුද්ධ පක්ෂවලින් එල්ලවන චෝදනා මධ්‍යයේ, ඉන්දියාව සමඟ මෑතකදී අත්සන් කරන ලද ගිවිසුම්වල ස්වභාවය සහ විෂය පථය ජනාධිපති අනුර කුමාර දිසානායක විසින් දේශපාලන සංවාදයකදී පැහැදිලි කර තිබේ.

ත්‍රිකුණාමල වරායේ උපායමාර්ගික හා ආර්ථික වැදගත්කම ඉස්මතු කරමින් ජනාධිපති අනුර කුමාර දිසානායක එය විස්තර කළේ ලොව හොඳම ස්වාභාවික වරායන්ගෙන් එකක් ලෙසය.

“ත්‍රිකුණාමලය යනු වෙරළට ආසන්නව විශාල යාත්‍රා නවාතැන් ගත හැකි ගැඹුරු වරායක්. ප්‍රධාන සමුද්‍රීය මාර්ගවලට එහි සමීපත්වය එය වටිනා වත්කමක් බවට පත් කරනවා,” යනුවෙන් ඔහු පැවසීය.

වරාය ප්‍රදේශයේ ඉන්ධන ටැංකි 98ක් ඇති අතර, ඉන් 24ක් ලංකා ඛනිජ තෙල් සංස්ථාව සතු වේ.

තවත් 12ක් ඉන්දියානු තෙල් සමාගම සතු වන අතර, 61ක් භාවිතයට ගෙන නොමැති තත්ත්වයක පවතී.

සෑම ටැංකියකම මෙට්‍රික් ටොන් 12,500ක ධාරිතාවක් ඇති අතර එය අන්තර්ජාතික ඉන්ධන වෙළඳාම සඳහා හොඳ අවස්ථාවක් ලබා දෙයි.

ඉන්දියාව සමඟ මෑතකදී අත්සන් කරන ලද ගිවිසුම්වල ස්වභාවය පැහැදිලි කරමින් දිසානායක ජනාධිපතිවරයා අවධාරණය කළේ කිසිදු අවසාන ගිවිසුමක් අත්සන් කර නොමැති බවයි.

“අපි අත්සන් කර ඇත්තේ අවබෝධතා ගිවිසුමක් – හැකියාව ගවේෂණය කිරීම සහ අදාළ ව්‍යාපාර සැලැස්මක් සකස් කිරීම සඳහා වන අවබෝධතා ගිවිසුමක්. ව්‍යාපාර සැලැස්මට අපි එකඟ වුවහොත් පමණක් අපි විධිමත් ගිවිසුමකට එළඹෙනවා,” යනුවෙන් ඔහු පැහැදිලි කළේය.

යෝජිත සැලැස්මට තෙල් ටැංකි සංකීර්ණය සහ ඒ ආශ්‍රිත යටිතල පහසුකම් සංවර්ධනය කිරීම සඳහා ඉන්දියාව, එක්සත් අරාබි එමීර් රාජ්‍යය සහ ශ්‍රී ලංකාව අතර ඒකාබද්ධ ව්‍යාපාරයක් ඇතුළත් වේ.

අවබෝධතා ගිවිසුම අධීක්ෂණය කරන කමිටුව නැව් හෝ නල මාර්ග හරහා බොරතෙල් ප්‍රවාහනය වැනි සැපයුම් ඇතුළුව පිරිපහදුවක් ස්ථාපිත කිරීමේ ශක්‍යතාව ද ගවේෂණය කරනු ඇත.

ඉන්දියාව මත බලශක්ති යැපීම පිළිබඳ බිය ගැන අදහස් දක්වමින් ජනාධිපතිවරයා එවැනි ප්‍රකාශ පදනම් විරහිත යැයි සඳහන් කළේය.

“ඛනිජ තෙල් සංස්ථාව තරඟකාරී ටෙන්ඩර් ක්‍රියාවලියක් හරහා ඉන්ධන මිලදී ගැනීම දිගටම කරගෙන යයි. නල මාර්ග ස්ථාපනය කිරීම කියන්නේ සියලුම ඉන්ධන ඉන්දියාවෙන් ලබා ගන්නවා කියන එක නෙවෙයි,” යැයි ඔහු පැවසීය.

ආයෝජන මණ්ඩලය යටතේ චීනයේ SINOPEC විසින් හම්බන්තොට ඉදිකෙරෙන අමෙරිකානු ඩොලර් බිලියන 3ක පිරිපහදු ව්‍යාපෘතිය ගැන ද ඔහු සඳහන් කළේය.

“දේශීය වෙළඳපොළට ඉන්ධන සැපයීම සඳහා SINOPEC පවා ඛනිජ තෙල් සංස්ථාවේ ටෙන්ඩර් ක්‍රියාවලියට තරඟ කළ යුතුයි. අනාගතයේ දී ත්‍රිකුණාමලයේ ආරම්භ කරන ඕනෑම ව්‍යාපාරයකට ද එම නීති අදාළ වේවි,” යනුවෙන් ඔහු තවදුරටත් පැවසීය.