දෙමළ ඊලම නමින් හැඳින්වුණු විකල්පයට පිළිගත හැකි ස්ථිර දේශපාලන විසඳුමක් ලබා ගැනීම සඳහා ශ්‍රී ලංකාව කෙරෙහි තම බලය භාවිත කරන ලෙස දෙමළ ජාතික ජනතා පෙරමුණ (TNPF) ඉන්දියාවෙන් ඉල්ලා සිටී.

ඔවුන් අවධාරණය කරන්නේ වත්මන් මොහොත අපතේ නොහැරිය යුතු පෙර නොවූ විරූ අවස්ථාවක් ලබා දෙන බවයි.

පක්ෂ නායක යාපනය දිස්ත්‍රික් පාර්ලිමේන්තු මන්ත්‍රී ගජේන්ද්‍රකුමාර් පොන්නම්බලම්ගේ නායකත්වයෙන් යුත් දෙමළ ජාතික ජනතා පෙරමුණේ නියෝජිත පිරිසක් සහ යාපනයට පැමිණි ඉන්දීය මන්ත්‍රී ආචාර්ය ටී. තිරුමවලවන් අතර මෑතකදී පැවති හමුවකදී මේ බව ප්‍රකාශ කර තිබේ.

කාර්තිගයි වාසම් මල් ප්‍රදර්ශනය විවෘත කිරීම සඳහා ඔවුන් යාපනයට පැමිණ තිබිණි.

තමිල්නාඩුවේ විඩුතලෙයි චිරුතයිගල් කච්චි හි නායක ආචාර්ය තිරුමවලවන්, තමිල්නාඩු පාලක සන්ධානයේ ප්‍රධාන හවුල්කරුවෙකි.

රැස්වීමෙන් පසු අදහස් දක්වමින් පොන්නම්බලම් පැවසුවේ ඉන්දු-ලංකා ගිවිසුම අත්සන් කර වසර තිස් නවයක් ගත වී ඇතත්, තමන් එකඟ වූ කරුණු පවා ක්‍රියාත්මක කිරීමට අනුප්‍රාප්තික රජයන් අපොහොසත් වී ඇති බවයි.

ඒ වෙනුවට ශ්‍රී ලංකා රාජ්‍යය 13 වැනි සංශෝධනයේ පටු සහ ප්‍රමාණවත් නොවන රාමුව මත විශ්වාසය තබා, අර්ථවත් දෙමළ ස්වයං පාලනයක් සඳහා ඉඩක් නොතබන දැඩි ඒකීය ව්‍යවස්ථාවක් සඳහා යොමුව සිටින බව මන්ත්‍රීවරයා පැවසීය.

මෙම අසාර්ථකත්වය නිසා වගවීමක් හෝ සැබෑ ස්වයං පාලනයක් ලබා නොදෙන යල් පැන ගිය ව්‍යුහයෙන් ඔබ්බට යෑමට නොහැකිව දෙමළ දේශපාලනය සිර කර තබා ඇති බව ඔහු අවධාරණය කළේය.

ශ්‍රී ලංකාවේ ගැඹුරු ආර්ථික අර්බුදය හමුවේ ඉන්දියාවේ සහාය නොමැතිව ශ්‍රී ලංකාවට තම ආර්ථිකය නැවත ගොඩනැගිය නොහැකි බවත්, ඉන්දියාවට එරෙහිව වරක් උද්ඝෝෂණය කළ දකුණේ දේශපාලන බලවේග මේ වන විට මූල්‍ය අවශ්‍යතාවයෙන් නවදිල්ලිය සමඟ සහයෝහයෙන් කටයුතු කිරීමට බල කෙරී ඇති බවත් පොන්නම්බලම් පැවසීය.

“එහි ප්‍රතිඵලයක් ලෙස, ශ්‍රී ලංකාව සමඟ ගනුදෙනු කිරීමේදී ඉන්දියාවේ කේවල් කිරීමේ බලය ශක්තිමත් වී තිබෙනවා,” යැයි ඔහු පැවසුවේ දෙමළ ජනතාවට කල් පවතින විසඳුමක් ලබා ගැනීම සඳහා මෙම බලපෑම ඵලදායී ආකාරයකින් භාවිත කළ යුතු බව ඉල්ලා සිටිමිනි.

දේශපාලන අවහිරතාව බිඳ දැමීම සඳහා ඉන්දියාවෙන් තීරණාත්මක මැදිහත්වීමක් අත්‍යවශ්‍ය බව ඔහු පැවසීය.

සාකච්ඡා අතරතුර, දෙමළ ජාතික ජනතා පෙරමුණේ නියෝජිත පිරිස තමිල්නාඩුවේ භූමිකාවේ වැදගත්කම අවධාරණය කළහ.

ඔවුන් ආචාර්ය තිරුමාවලවන් වෙත ශ්‍රී ලංකාවේ ව්‍යවස්ථාමය රාමුව තුළ ඇති පද්ධතිමය බාධක, 13 වැනි සංශෝධනයේ සීමාවන්, අර්ථවත් බලය බෙදා හැරීම වළක්වන නීතිමය සහ දේශපාලන බාධක, දෙමළ නිජබිමේ අඛණ්ඩ ඛාදනය ආදිය පිළිබඳ විස්තර කර තිබේ.

සන්නද්ධ අරගලය අවසන් වීමෙන් පසු තමිල්නාඩුවේ දිගු නිහඬතාව ඊලම් දෙමළ ජනයා සඳහා දුර්වල දේශපාලන ස්ථාවරයකට දායක වී ඇති බවට ඔවුහු තර්ක කළහ.

තමිල්නාඩු පාලක සන්ධානය තුළ ආචාර්ය තිරුමාවලවන්ගේ ස්ථානය සැලකිල්ලට ගෙන, ප්‍රාන්ත රජයෙන් වඩාත් තීරණාත්මක සහ ක්‍රියාශීලී ස්ථාවරයක් සඳහා තල්ලු කරන ලෙස නියෝජිත පිරිස ඔහුගෙන් ඉල්ලා සිටියහ.

දෙමළ ප්‍රශ්නය සම්බන්ධයෙන් ශක්තිමත් පියවර ගැනීමට තමිල්නාඩු රජය ඉන්දියාවට බලපෑම් කරන බව සහතික කිරීම සඳහා ඔහුගේ සහයෝගය අත්‍යවශ්‍ය බව ඔවුහු පැවසූහ.