විදේශගතව සිට මෙරට මිනිස් ඝාතන, තර්ජනය කිරීම්, බියවැද්දවීම් සහ මත්කුඩු ජාවාරම්වල නිරතව සිටි කෙහෙල්බද්දර පද්මේ, කොමාන්ඩෝ සලින්ද, පානදුර නිලංග, බැකෝ සමන්, තැඹිලි ලහිරු නමැති පාතාලයේ අපරාධකරුවන් පස්දෙනාත් බැකෝ සමන් නමැති අපරාධකරුගේ බිරියත් ඉන්දුනීසියාවේදී අත්අඩංගුවට ගැනීම ශ්‍රී ලංකා පොලීසිය විසින් විදේශයකදී පාතාල අපරාධ කල්ලියක් කොටු කරගැනීමට මෙහෙයවූ ලොකුම මෙහෙයුම බවට ඉතිහාසගතව තිබේ.

අත්අඩංගුවටගත් මෙම අපරාධකරුවන් හෙට (30) මෙරටට රැගෙන ඒමට හැකිවනු ඇතැයි පොලිසිය විශ්වාස කරයි. ඊට අදාළ කටයුතු ශ්‍රී ලංකා පොලීසිය, තානාපති අංශ විසින් අන්තර්ජාතික පොලීසියේ සහයෝගය ඇතිව ඊයේ (27) සිදුකරමින් පැවැතිණි. එරට පොලිස් නිලධාරින් 10 දෙනකුගේ කණ්ඩායමක් විසින් මෙම පාතාල සාමාජිකයන් මෙරටට රැඟෙන එනු ඇත.

මෙම පාතාල අපරාධකරුවන් ව්‍යාජ නම්වලින් සකස් කරනු ලැබූ විදෙස් ගමන් බලපත්‍ර යොදාගෙන ඉන්දුනීසියාවේ රැඳී සිට ඇති බව ද අනාවරණය වී තිබේ. මේ අතරින් කෙසෙල්බද්දර පද්මෙගේ, කොමාන්ඩෝ සලින්දගේ සහ පානදුරේ නිලංගගේ ගමන් බලපත්‍ර විනාශ කර තිබූ බැවින්, ඒවා අලුතින් සකස් කරගැනීමට නිලධාරින් කටයුතු කර ඇත.

මෙම පාතාල අපරාධකරුවන් කොටුකර ගැනීමේ මෙහෙයුම අපරාධ පරීක්ෂණ දෙපාර්තමේන්තුව විසින් බුද්ධි අංශයේ ද සහාය ඇතිව ක්‍රියාත්මක කර ඇත්තේ ඉකුත් ජූලි මාසයේ සිටය. ඒ, මෙම අපරාධකරුවන් මලයාසියාවේදී අත්අඩංගුවට පත්වූ බවට පළවූ මාධ්‍ය වාර්තා පදනම් කරගෙන අපරාධ පරීක්ෂණ දෙපාර්තමේන්තුවේ නිලධාරීන් කණ්ඩායමක් මලයාසියාවට සහ තායිලන්තයට ගොස් විමර්ශන ආරම්භ කිරීමත් සමඟිනි. එහිදී මෙම අපරාධකරුවන් ගොඩබිම් සහ ජල මාර්ග ඔස්සේ රටවල් අතර කෙරන සංචාරයන් ගැන තොරතුරු හෙළි කරගත් අපරාධ පරීක්ෂණ දෙපාර්තමේන්තුව විසින් ඒ සම්බන්ධයෙන් කළ දීර්ඝ විමර්ශනයකින් අනතුරුව මෙම පාතාල අපරාධකරුවන් ඉන්දුනීසියාවේදී එකතු වන මොහොතක් ගැන ඇස ගසාගෙන සිට මෙම වැටලීම සිදුකර තිබේ.

ඉන්දුනීසියාවේ රැඳී සිටි මෙම අපරාධකරුවන් කොටුකර ගැනීමට අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරිවරයෙක් සහ විශේෂ අංශයක අධ්‍යක්ෂවරයෙක් ලෙස සේවයේ නිරත සහකාර පොලිස් අධිකාරිවරයෙක් ඉන්දුනීසියාව බලා පිටත්ව ගොස් ඇත්තේ පසුගිය 22 වැනි සිකුරාදා සහ ඒ ආසන්න කාලසීමාවේදීය. ඒ, මෙම අපරාධකරුවන් කොටු කරගැනීමට උගුලක් ද අටවමිනි.

මෙම පාතාල අපරාධකරුවන්ගෙන් තිදෙනකුට අන්තර්ජාතික පොලීසිය මඟින් රතු නිවේදන ද, දෙදෙනකුට වරෙන්තු ද නිකුත්කර තිබී ඇත. වෙනත් රටවල සිටි මෙම පාතාල අපරාධකරුවන් මෙරට පොලීසිය ඇටවූ උගුලකට හසුවෙමින් ඉන්දුනීසියාවට පැමිණ ඇත්තේ ද ඉකුත් සතියේදීය. ඉන්දුනීසියාවේ මෙරට තානාපති කාර්යාලයේත්, ජාත්‍යන්තර පොලීසියේත් සහාය ඇතිව ඉන්දුනීසියානු පොලීසිය සමඟ ඔවුන් කොටු කරගැනීමේ මෙහෙයුම ක්‍රියාත්මක වී ඇත්තේ මෙරටින් ඉන්දුනීසියාවට ගිය පොලිස් කණ්ඩායම විසිනි.

එම මෙහෙයුමට සමගාමීව තාක්ෂණික මෙහෙයුමක් ද ක්‍රියාත්මක කර ඇත. ඒ අනුව මෙම අපරාධකරුවන් නිශ්චිත ලෙස රැඳී සිටින ස්ථාන පවා නිරීක්ෂණය කිරීමට අපරාධ පරීක්ෂණ දෙපාර්තමේන්තුවේ නිලධාරීන්ට හැකියාව ලැබී තිබේ. ඉන්දුනීසියාවේ ජාකර්තා නුවර ස්ථාන කිහිපයක සුඛෝපභෝගී තට්ටු නිවාස සංකීර්ණයක රැඳී සිටි මෙම පාතාල අපරාධකරුවන් පෙරේදා (27) එක් ස්ථානයකට රැස්වීමත් සමඟ අත්අඩංගුවට ගැනීම සිදුව ඇත.

එම අත්අඩංගුවට ගැනීම සිදු වන තුරුම ඉන්දුනීසියානු පොලීසියේ සිවිල් ඇඳුමින් සැරසුණු නිලධාරීන් කණ්ඩායමක් සමඟ මෙරටින් ඉන්දුනීසියාවට ගිය පොලිස් කණ්ඩායමක් මෙම පාතාල අපරාධකරුවන් වෙන වෙනම නිරීක්ෂණය කර තිබේ. මෙම කණ්ඩායම එක් ස්ථානයකට රැස්වී ඇත්තේ ද ඉන්දුනීසියාවෙන් පලා යෑම සඳහාය. ඒ තමන්ගේ පස්සෙන් පොලීසිය පන්නන බවට ඔවුන්ට ඇතිවූ සැකයක් මතය. එම සැකය එල්ල වන්නේ මෙම මෙහෙයුම ගැන ඔවුන්ට ලැබුණු තොරතුරක් මත දැයි සැකයක් ද ඇති ව තිබේ. ඒ ගැන ද මේ වන විට කරුණු සොයා බලමින් ඇතැයි පොලිස් තොරතුරු අනාවරණය කළේය.

ස්ථාන කිහිපයක රැඳී සිටි මෙම කණ්ඩායම ඔවුන් සිටි ස්ථාන අතහැර එක් ස්ථානයකට රැස්වී ආරක්ෂිත ස්ථානයකට පළායෑමේ සැලසුමක ද සිට ඇත. ඔවුන් රැඳී සිටි ස්ථානය හඳුනාගත් ඉන්දුනීසියානු සහ මෙරට පොලීසිය පැයකට දෙකකට පමණ පසු සැකකරුවන් සියලුදෙනාම එකම තැනකදී අත්අඩංගුවට ගැනීමට සමත්ව ඇත.

කෙහෙල්බද්දර පද්මේ, කමාන්ඩෝ සලින්ද ඇතුළු තිදෙනෙක් පෙරේදා උදෑසන ඔවුන් රැඳී සිටි නිවාස සංකීර්ණයෙන් කලබලයෙන් පිටතට පැමිණ මෝටර් රථයකින් පළායමින් සිටින අයුරු දැක්වෙන ආරක්ෂක කැමරා දර්ශන ද විමර්ශන නිලධාරීන්ට ලැබී ඇත.

මෙරට පොලීසියෙන් ඉන්දුනීසියාවට ගොස් සිටි පොලිස් නිලධාරීන් දෙදෙනා මේ ගැන අවධානයෙන් නොසිටින්නට මෙම අපරාධකරුවන් ඉන්දුනීසියාවෙන් පළායෑමට තිබුණු ඉඩකඩ වැඩි බව ද පොලිස් තොරතුරු සඳහන් කළේය.

අත්අඩංගුවට ගැනීමත් සමඟ ඔවුන්ගේ ඡායාරූප ගෙන මෙරටට එවා තවදුරටත් අත්අඩංගුවට ගනු ලැබුවේ මෙම අපරාධකරුවන්මදැයි තහවුරු කරගැනීමට පියවර ගෙන ඇත. තමන්ව අත්අඩංගුවට ගන්නා ලෙස සමාජ මාධ්‍ය ඔස්සේ පෙනීසිටිමින් මෙරට පොලීසියට අභියෝග කළ මෙම පාතාල අපරාධකරුවන් අත්අඩංගුවට ගැනීමත් සමඟ බියට පත්ව ඔවුන්ගේ ඇඳුමේ මුත්‍රා පිටවී ඇති බව ද එරටින් ලැබුණු තොරතුරු අනාවරණය කළේය.

ඉන්දුනීසියානු පොලීසිය සමඟ ශ්‍රී ලංකා පොලීසිය ඔවුන්ව අත්අඩංගුවට ගෙන දෑත් පසුපසට තබා විලංගු දමන විට බියෙන් වෙව්ලමින් ජීවිතය අයැද සිටි බව ද එම තොරතුරු අනාවරණය කළේය.

මෙම පාතාල අපරාධකරුවන් මලයාසියාව, තායිලන්තය, ඉන්දුනීසියාව, ඩුබායි, අබුඩාබි ඇතුළු රටවල් කිහිපයක් ඔස්සේ සංචාරයේ නිරත වෙමින් මෙරට අපරාධවල නිරතව සිට ඇති බව ද අනාවරණය වී තිබේ. මොවුන් උත්සාහ දරමින් සිට ඇත්තේ යුරෝපීය රටකට ඇතුළු වීමටය. එතෙක් ඔවුන් ඉන්දුනීසියාව කේන්ද්‍ර කරගෙන රටවල් අතර සංචාරකයන් ලෙස ගැවසෙමින් සිට ඇති බව ද විමර්ශනවලින් අනාවරණය වී තිබේ.

බොහෝ කාලයක් ඔවුන් ඉන්දුනීසියාවේ රැඳී සිට ඇති බව ද විමර්ශනවලින් පෙනීගොස් තිබේ. මෙම කණ්ඩායම ඉන්දුනීසියාවේ සිට අන්තර්ජාතික මත්ද්‍රව්‍ය ජාවාරම්කරුවන් සමඟ සම්බන්ධ වෙමින් මහාපරිමාණයෙන් මෙරටට මත්කුඩු ගෙන්වීමට ද කටයුතු කර ඇති බව සඳහන්ය.

ඔවුන් පසුගිය කාලය තුළ රටින් රට සංචාරය කරමින් මත්කුඩු ජාවාරම සහ පාතාල අපරාධ මෙහෙයවූ සෑම අවස්ථාවක්ම පාහේ අපරාධ පරීක්ෂණ දෙපාර්තමේන්තුවේ නිලධාරීන් තාක්ෂණික මෙහෙයුමක් ඔස්සේ නිරීක්ෂණය කරමින් තිබී ඇත. එම තාක්ෂණික මෙහෙයුම හේතුවෙන් මෙම කණ්ඩායම ඉතා පහසුවෙන් අත්අඩංගුවට ගැනීමට හැකිවූ බව අපරාධ පරීක්ෂණ දෙපාර්තමේන්තුව සඳහන් කළේය.

මේ ආකාරයට විදේශගතව සිටින තවත් පාතාලයේ ප්‍රබල අපරාධකරුවන් කිහිපදෙනකු සම්බන්ධයෙන් ද අපරාධ පරීක්ෂණ දෙපාර්තමේන්තුව ඇස ගසාගෙන සිටියි. ඔවුන්වත් මේ ආකාරයටම කොටු කරගැනීමට හැකි වනු ඇතැයි පොලීසිය විශ්වාස කරයි.

ඉන්දුනීසියාවේදී අත්අඩංගුවට ගත් කෙහෙල්බද්දර පද්මේ නමැත්තා පාතාල අපරාධකරුවෙක් ලෙස කලඑළි බසින්නේ 2022 වසරේ ජූලි 27 වැනිදා ගම්පහ අධිකරණ සංකීර්ණය අසලදී පස් පොඩ්ඩා නමැති පස් ව්‍යාපාරිකයා ඇතුළු තිදෙනකු ඝාතනය කිරීම ඩුබායි සිට මෙහෙයවමිනි. පස් ජාවාරම සම්බන්ධයෙන් ඇතිවූ ආරවුලක් මත එම ඝාතනය ඔහු විසින් ඩුබායි සිට මෙහෙයවීමත් සමඟ පාතාල අපරාධකරුවන් අතර පාතාලයේ වැඩකරුවෙක් ලෙස කරළියට එන ඔහු නැවතත් සමාජයේ දැඩි කතාබහකට ලක්වන චරිතයක් බවට පත්වන්නේ, කොළඹ අලුත්කඩේ මහේස්ත්‍රාත් අධිකරණයේදී පසුගිය පෙබරවාරි 19 වැනිදා ගණේමුල්ලේ සංජීව නමැති පාතාලයේ අපරාධකරුට වෙඩි තබා ඝාතනය කිරීමත් සමඟිනි.

මෙම ඝාතනය සැලසුමට කමාන්ඩෝ සලින්ද නමැත්තාගේ ද සම්බන්ධයක් අනාවරණය විය. කමාන්ඩෝ සලින්ද නමැති අපරාධකරු කතාබහට ලක්වන චරිතයක් බවට පත්වන්නේ ඒත් සමඟ ය. අධිකරණයේදී ගණේමුල්ල සංජීව ඝාතනය කිරීමත් සමඟ පාතාලයේ ගෝඩ්ෆාදර් චරිතය රඟමින් කෙහෙල්බද්දර පද්මේ ඇතුළු කල්ලිය මෙරට පාතාල අපරාධ මෙහෙයවන්නට වූයේ ඉවක් බවක් නොමැතිව වෙඩි තැබීම් ද සිදු කරමිනි. එම වෙඩි තැබීම් ඇතුළු පාතාල අපරාධ සම්බන්ධයෙන් විමර්ශන පවත්වන පොලිස් නිලධාරීන්ට පවා මෙම අපරාධ කල්ලිය විසින් මරණ තර්ජන කරන තැනට පත්විය. එසේ මෙම කල්ලියේ දැඩි තර්ජනයට ලක්වූ නිලධාරියෙක් වූයේ බස්නාහිර පළාත් උතුරු දිසා අපරාධ කොට්ඨාසයේ ස්ථානාධිපති ප්‍රධාන පොලිස් පරීක්ෂක ලින්ටන් මහතා ය.

මෙම කල්ලිය සමඟ අත්අඩංගුවට ගත් පාතාල අපරාධකරුවන් අතර සිටින බැකෝ සමන් කතාබහට ලක්වන පාතාල අපරාධකරුවෙක් බවට පත්වන්නේ මිද්දෙණියේදි කජ්ජා නමැති අය සහ ඔහුගේ දරු දෙදෙනා පසුගිය පෙබරවාරි 18 වැනිදා රාත්‍රී කාලයේ ඝාතනය කිරීමත් සමඟිනි. ඩුබායිහි රැඳීසිටිමින් ඔහු එම ඝාතන සිදු කරනු ලැබුවේ තැඹිලි ලහිරු නමැති වෙඩික්කරු මඟිනි. එම ත්‍රිත්ව ඝාතනයෙන් පසු තැඹිලි ලහිරු නමැති වෙඩික්කරුවා ද ඩුබායි වෙත ගෙන්වා ගැනීමට කටයුතු කර තිබුණි. ඉන්දුනිසියාවේදී අත්අඩංගුවට ගත් සැකකරුවන් අතර තැඹිලි ලහිරු ද සිටින බව අපරාධ පරීක්ෂණ දෙපාර්තමේන්තුව සඳහන් කළේය.

පාණදුර හා ඒ අවට සිදුවූ අපරාධ රැසකට සම්බන්ධකම් ඇති මත්කුඩු ජාවාරම්කරුවෙක් වන නිලංග ද අත්අඩංගුවට ගත් සැකකරුවන් අතර සිටියි. මෙම පාතාලයේ සැකකරු අත්අඩංගුවට ගෙන පැයක් ඉක්ම යන්නට මත්තෙන් ඔහුගේ මාමණ්ඩියට පාණදුරේ අලුබෝමුල්ලේදී ප්‍රතිවිරුද්ධ කණ්ඩායමේ වෙඩි ප්‍රහාරයක් එල්ලවී තිබේ.

පෙරේදා (27) රාත්‍රී 10.30ට පමණ යතුරුපැදියකින් පැමිණි දෙදෙනෙක් විසින් එල්ල කළ මෙම වෙඩි ප්‍රහාරයෙන් පී.ඩී.එස්. ප්‍රනාන්දු නමැති 55 හැවිරිදි එම පුද්ගලයා මියගොස් ඇත. ප්‍රතිවිරුද්ධ පාතාල කල්ලියේ ඉලක්කයක් වී ඇති බව කල්තියා පොලීසිය ඔහුව දැනුම්වත් කර තිබී ඇති බවත් එදින සවස් කාලයේදී පොලිස් විශේෂ කාර්ය බළකාය ද ඔහුට ඒ සම්බන්ධයෙන් අනතුරු ඇඟවීමක් කර ඇති බවත් පොලිස් තොරතුරු සඳහන් කළේය.

මෙම කණ්ඩායම සමඟ අත්අඩංගුවට ගත් කාන්තාව බැකෝ සමන් නමැත්තාගේ බිරිය ලෙස හඳුනාගෙන තිබේ. ඇය අත්අඩංගුවට ගන්නා විට දරුවෙක් ද සිට ඇත. එම අත දරුවා බැකෝ සමන්ගේ දරුවා බව සඳහන් කර ඇත. මෙම කාන්තාව දකුණේ පදිංචිකාරියක් බවත් ඇය සම්බන්ධයෙන් ද තොරතුරු මේ වන විට පොලීසිය රැස්කරමින් පවතී.

(දිනමිණ)