ටෙලිග්‍රෑම්, වට්ස්ඇප් සහ අනෙකුත් අන්තර්ජාල සන්නිවේදන ජාල වැනි සමාජ මාධ්‍ය වේදිකා හරහා සිදුකරන මූල්‍ය වංචා සම්බන්ධ පැමිණිලි ඉහළයන බව පොලිසිය පවසයි.

පොලිසිය පෙන්වාදෙන්නේ වංචාකරුවන් ව්‍යාජ දීමනා, රැකියා අවස්ථා හෝ අසාමාන්‍ය ලෙස අඩු මිල ගණන් මගින් වින්දිතයන් ආකර්ෂණය කර ගන්නා අතර බොහෝ විට බැංකු විස්තර, පරිශීලක නාම හෙළිකිරීමට හෝ අත්තිකාරම් ගෙවීම් කිරීමට ඔවුන් රවටා ගන්නා බවයි.

මුදල් හෝ තොරතුරු ලබාගත් පසු, වංචාකරුවන් විසින් වින්දිතයන් අවහිර කරනු ලබයි.

සත්‍යතාව තහවුරු නොකර මුදල් මාරුකිරීම හෝ පෞද්ගලික තොරතුරු බෙදා නොගත යුතු බව පොලිසිය අවධාරණය කරන අතර, ආරක්ෂිත ගෙවීම් ක්‍රම භාවිත කරන ලෙසත් වංචාකාරී යෝජනා ක්‍රමවලට එරෙහිව සුපරීක්ෂාකාරීව සිටින ලෙසත් පොලිසිය මහජනතාවගෙන් ඉල්ලා සිටී.

වංචාකරුවන් හඳුනාගන්නේ කෙසේද යන්න සම්බන්ධයෙන් පොලිසිය කෙටි පැහැදිලි කිරීමක් සිදුකර තිබේ.

වංචාකරුවන් බොහෝ විට එකම ක්‍රමය භාවිත කරයි.

වෙළඳපොළ වටිනාකමට වඩා බෙහෙවින් අඩු මිලකට නිෂ්පාදන ලබාදෙයි.

පාරිභෝගිකයන්ගේ කෑදරකම ගසාකෑමට මෙය ඔවුන්ගේ ප්‍රධාන උපක්‍රමයයි.

ඔවුන් ඔබව භීතියට පත්කිරීම සඳහා වෙනත් ගනුදෙනුකරුවන් සිටින බව හෝ “දැන්ම මිලදී ගන්නවා නම්, මම දෙන්නම්” වැනි දේ පවසමින් හදිසි හැඟීමක් ද ඇති කරයි.

මෙය ඔබව හොඳින් සිතීමෙන් වළක්වන අතර ගනුදෙනුව කඩිනමින් සම්පූර්ණ කිරීමට ඔබව තල්ලු කරයි.

ඔවුන් සාමාන්‍යයෙන් අත්තිකාරම් ගෙවීම් ඉල්ලා සිටින අතර, අයිතමය ‘වෙන් කරවා ගැනීම’ සඳහා බැංකු ගිණුමකට රුපියල් 5,000, රුපියල් 10,000 හෝ රුපියල් 20,000ක් තැන්පත් කරන ලෙස ඉල්ලා සිටියි.

මුදල් තැන්පත් කළ පසු, ඔවුන් ඔබේ දුරකථන අංකය විසන්ධි හෝ අවහිර හෝ කරයි.

එවැනි වංචාවක් වළක්වා ගැනීමට කළ යුතු දේ සම්බන්ධයෙන් ද පොලිසිය පැහැදිලි කර ඇත.

නිෂ්පාදනය අතට ලබා නොගෙන කිසි විටෙකත් මුදල් නොගෙවිය යුතුය.

කිසිදු තත්ත්වයක් යටතේ ඔබ මාර්ගගතව දකින ඕනෑම අයිතමයක් සඳහා අත්තිකාරම් තැන්පතු නොකරන්න.

ගනුදෙනු සඳහා අතින්ම මුදල් ලබාදීම හෝ සෘජුවම හමුවීම භාවිත කරන්න.

ආගන්තුකයන් හමුවන විට ප්‍රවේශම්වන්න.

ජනාකීර්ණ, ආරක්ෂිත ස්ථානයක් තෝරාගෙන තනිවම නොයන්න.

වීඩියෝ ඇමතුමක් ඉල්ලා සිටීමෙන් විකුණුම්කරු සතුව නිෂ්පාදනය ඇත්ත වශයෙන්ම තිබේද යන්න තහවුරු කරන්න.

ඇමතුම අතරතුර, නිෂ්පාදනය පමණක් නොව විකුණුම්කරුගේ මුහුණද පැහැදිලිව බලන්න.

වංචාකරුවන් බොහෝ විට ඔවුන්ගේ මුහුණ පෙන්වීමෙන් වැළකී සිටී.

බැංකු ගිණුම් විස්තර සත්‍යාපනය කරන්න.

සපයා ඇති ගිණුම් අංකය හෝ නම පිළිබඳ ඔබට කිසියම් සැකයක් ඇත්නම්, මුදල් තැන්පත් නොකරන්න.

ඊට හේතුව බොහෝ වංචාකරුවන් වෙනත් පුද්ගලයන්ගේ හැඳුනුම්පත් ලේඛන සමඟ නිර්මාණය කරන ලද ගිණුම් භාවිත කරයි.