January 8, 2026
රට පුරා ආරක්ෂිත, මත්ද්රව්යවලින් තොර ප්රවාහන පද්ධතියක් සහතික කිරීම අරමුණු කරගත්, පොදු ප්රවාහන රියදුරන් සඳහා නව මත්ද්රව්ය පරීක්ෂණ වැඩසටහනක් අද ශ්රී ලංකා ගමනාගමන මණ්ඩලයේ මට්ටක්කුලිය ඩිපෝවේදී ආරම්භ කරන ලදී.
ජාතික ප්රවාහන වෛද්ය ආයතනයේ (NTMI) පූර්ණ සහභාගීත්වයෙන් ක්රියාත්මක කරන ලද මෙම වැඩසටහනේදී රියදුරන්ගෙන් සහ කොන්දොස්තරවරුන්ගෙන් මුත්රා සාම්පල එකතුකිරීම සඳහා ජංගම වෛද්ය පර්යේෂණ වාහනයක් භාවිතා කරන ලදී.
පරීක්ෂණ මගින් භයානක මත්ද්රව්ය වර්ග හතරක්, ගංජා, අයිස්, බාබුල් සහ හෙරොයින් හඳුනා ගත හැකි අතර, මිනිත්තු 10ක් ඇතුළත ප්රතිඵල ලබා දෙනු ලැබේ.
NTMI හි ප්රධාන වෛද්ය නිලධාරී කේ.එස්.එම්. සමරසේකර පැවසුවේ, “මෙම වැඩසටහන ක්රියාත්මක කිරීමේ ප්රධාන අරමුණ පොදු ප්රවාහන රියදුරන් මත්ද්රව්යවලින් තොර කිරීමයි. දෛනික අනතුරු අවම කිරීම සඳහා මෙය අත්යවශ්ය වෙනවා. අද, අපි මට්ටක්කුලිය ඩිපෝවෙන් මේ වැඩසටහන ආරම්භ කළා. අනාගතයේදී, මෙම වැඩසටහන දිවයින පුරා ව්යාප්ත කිරීමට අපි බලාපොරොත්තු වෙනවා”
ජ්යෙෂ්ඨ නියෝජ්ය පොලිස්පති (රථවාහන) සේනාධීර ශ්රී ලංකා ගමනාගමන මණ්ඩලය සමඟ පරීක්ෂණ ආරම්භ කිරීමේ වැදගත්කම අවධාරණය කළ අතර, මෙම වැඩසටහන රටේ සෙසු ප්රදේශවලට ආදර්ශයක් විය හැකි බව සඳහන් කළේය.
ශ්රී ලංකා ගමනාගමන මණ්ඩලයේ සහයෝගයට ඔහු කෘතඥතාව පළ කළේය.
මත්පැන් සහ මත්ද්රව්යවලින් තොර ප්රවාහන සේවාවක් නිර්මාණය කිරීම අරමුණු කරගත් මෙම වැඩසටහනට ශ්රී ලංකා පොලිසිය පූර්ණ සහයෝගය ලබාදෙන බවට ඔහු සහතික විය.
