ජ්‍යෙෂ්ඨ පොලිස් නිලධාරියකුගේ වට්ස්ඇප් ගිණුමට අනවසරයෙන් ඇතුළු වී රුපියල් ලක්ෂ 4ක් වංචා කළ බවට සැක කෙරෙන නයිජීරියානු ජාතිකයකු සම්බන්ධයෙන් පරීක්ෂණ පවත්වා ඇති බව කොළඹ සයිබර් අපරාධ අංශය කොළඹ ප්‍රධාන මහේස්ත්‍රාත්වරයාට දැනුම් දුන්නේය.

එලෙස වංචනික ලෙස ලබාගත් මුදල් ආපසු ගැනීම සඳහා බැංකු ගිණුම් ලබාදීමේ චෝදනාව මත තවත් සැකකරුවන් දෙදෙනෙකු ද අත්අඩංගුවට ගෙන අධිකරණයට ඉදිරිපත් කර තිබිණි.

අදාළ නයිජීරියානු ජාතිකයා ජ්‍යෙෂ්ඨ නියෝජ්‍ය පොලිස්පතිවරයකුගේ වට්ස්ඇප් ගිණුමට අනවසරයෙන් ඇතුළු වී ඔහුගේ දුරකථන ලැයිස්තුවේ සිටින පිරිසගෙන් අරමුදල් ඉල්ලා සිට ඇති බවට ලැබුණු පැමිණිල්ලක් අනුව මෙම පරීක්ෂණය පවත්වා තිබේ.

අත්අඩංගුවට ගත් සැකකරුවන් දෙදෙනා වෙනත් පුද්ගලයන්ගේ නම් යටතේ බැංකු ගිණුම් විවෘත කර මෙම වංචාව පිටුපස සිටින මහමොළකරු ලෙස හඳුනාගෙන ඇති නයිජීරියානු ජාතිකයාට ඒවා ලබා දී ඇති බව විමර්ශනවලින් හෙළි වී ඇත.

මෙම ගිණුම් භාවිත කරමින් නයිජීරියානු සැකකරු නීති විරෝධී ලෙස වට්ස්ඇප් ගිණුම්වලට ප්‍රවේශ වී පැමිණිලිකරුගේ මිතුරන් දෙදෙනෙකුගෙන් මුදල් ඉල්ලා ඇත.

පසුව අරමුදල් සැකකරුවන් විසින් සපයන ලද ගිණුම්වලට මාර්ගගතව තැන්පත් කර තිබේ.

හැක් කිරීම හරහා ලබාගත් සියලුම අරමුදල් මෙම ගිණුම්වලට තැන්පත් කර ඇති බවත්, සැකකරුවන් වෙනත් අනන්‍යතා භාවිත කරමින් ගිණුම් නිර්මාණය කර නයිජීරියානු ජාතිකයාට විකුණා ඇති බවත් පොලිස් නිලධාරියා අධිකරණයට තවදුරටත් දැනුම් දුන්නේය.

සැකකරුවන් සහ ගිණුම් හිමියන් නයිජීරියානු ජාතිකයාගෙන් ලැබුණු මුදල් බෙදාගෙන ඇති බව ඔහු වැඩිදුරටත් පැවසීය.

සැකකරුවන් වෙනුවෙන් පෙනී සිටි නීතිඥවරයා ඉදිරිපත් කළේ තම සේවාදායකයන් එවැනි බැංකු ගිණුම් නිර්මාණය කර විකුණා ඇති බව පිළිගන්නා බවයි.

දෙවැනි සැකකරු වෙනත් නඩුවක් සඳහා රිමාන්ඩ් භාරයේ සිටියදී නයිජීරියානු ජාතිකයා හමුවී ඇති බව ද ඔහු සඳහන් කළේය.

විදේශයන්හි සිටින තම මව්පියන්ගෙන් මුදල් ලබා ගැනීම සඳහා බැංකු ගිණුමක් ආරම්භ කරන ලෙස නයිජීරියානු ජාතිකයා දෙවැනි සැකකරුගෙන් ඉල්ලා සිටි බවත්, තම සේවාදායකයන් කිසිදු වංචනික ක්‍රියාවක් සිදු කර නොමැති බවත් නීතිඥවරයා පැවසීය.

ගිණුම් හැක්කර අරමුදල් ලබා ගත් ප්‍රධාන අපරාධකරු නයිජීරියානු ජාතිකයා බව ඔහු අවධාරණය කළේය.

සියලු කරුණු සළකා බැලීමෙන් පසු, ප්‍රධාන මහේස්ත්‍රාත් අසංග එස්. බෝදරගම සැකකරුවන් දෙදෙනා ඇප මත නිදහස් කිරීමට නියෝග කළේය.

ප්‍රධාන චූදිතයා ලෙස හඳුනාගෙන ඇති නයිජීරියානු සැකකරු වැඩිදුර පරීක්ෂණවලින් පසු අත්අඩංගුවට ගන්නා ලෙසද අධිකරණය නියෝග කළේය.