සයිබර් හිරිහැර, හෝ අපයෝජනය වැළැක්වීම මෙන්ම, ලිංගික හිරිහැර සහ ළමා අපයෝජන වැළැක්වීම සඳහා සයිබර් සහ ඩිජිටල් ආරක්ෂාව ශක්තිමත් කිරීම සඳහා නව නීති කෙටුම්පත් කිරීමේ ක්‍රියාවලිය අධ්‍යාපන අමාත්‍යාංශය ආරම්භ කරන බව අධ්‍යාපන නියෝජ්‍ය අමාත්‍ය මධුර සෙනෙවිරත්න පවසයි.

ළමා ආරක්ෂාව සම්බන්ධයෙන් කටයුතු කිරීමට පවතින නීති ප්‍රමාණවත් නොවන අතර, ළමුන් අපයෝජනය කරන්නන්ට දැඩි දඬුවම් නියම කරන වඩාත් දැඩි නීති පැනවිය යුතු බව ඔහු අවධරණය කරයි.

මෑත කාලීන සිදුවීම්වලින් පෙනීගොස් ඇත්තේ පාසල් සිසුන් සයිබර් හිරිහැරවලට සහ ලිංගික අපයෝජනවලට ද ලක්වන බවත්, මෙය නැවැත්විය යුතු බවත් ඔහු වැඩිදුරටත් පවසයි.

සෞඛ්‍ය අමාත්‍යාංශය සහ අධ්‍යාපන අමාත්‍යාංශය විසින් මෑතකදී නිකුත් කරන ලද ඒකාබද්ධ පුළුල් අධ්‍යයනයකින් පෙන්නුම් කර ඇත්තේ, සයිබර් හිරිහැර හෝ අපයෝජනය වැළැක්වීම සඳහා සයිබර් සහ ඩිජිටල් ආරක්ෂාව පිළිබඳ අධ්‍යාපනය ශක්තිමත් කිරීම අත්‍යවශ්‍ය බවත්, එවැනි හැසිරීම් වලට එරෙහිව වැළැක්වීමක් තිබිය යුතු බවත්ය.

පාසල් දරුවන් අතර මානසික ආතතිය හා මානසික අවපීඩනය ද වැඩි වී ඇති බවත්, එබැවින් අවශ්‍ය නම් දරුවන්ට උපදේශන සේවා ලබාගැනීමට අමාත්‍යාංශය සියලු පාසල්වල උපදේශන මධ්‍යස්ථාන පිහිටුවන බවත් නියෝජ්‍ය අමාත්‍යවරයා සඳහන් කරයි.

ජාතික ළමා ආරක්ෂණ අධිකාරියේ සහ ශ්‍රී ලංකා පොලිසියේ කාන්තා හා ළමා කාර්යාංශයේ සහයෝගයෙන් මෙම කටයුතු සිදුකරන බව ඔහු පවසයි.

“අපගේ අභිප්‍රාය වන්නේ පාසල්වල මෙන්ම පිටතද දරුවන්ට ආරක්ෂිත පරිසරයක් ඇති බව සහතික කිරීමයි,” ඔහු ප්‍රකාශ කරයි.