ශ්‍රී ලංකා ආරක්ෂක අමාත්‍යාංශය විසින් ප්‍රකාශයට පත් කරන ලද මසක පොදු සමා කාලයේ මේ දක්වා කාලය තුළ ශ්‍රී ලංකා යුද හමුදාව හැර ගිය සෙබළුන් 7,000 කට වැඩි පිරිසක් නීත්‍යනුකූලව සේවයෙන් ඉවත්වීම් ලබාගෙන තිබේ.

ආරක්‍ෂක අමාත්‍යාංශයේ නියෝගය යටතේ ශ්‍රී ලංකා යුද හමුදාව විසින් අප්‍රේල් 20 වැනිදා සිට පොදු සමා කාලය ප්‍රකාශයට පත් කර තිබේ.

නොදන්වා සේවයට වාර්තා නොකළ යුද හමුදාවේ සියලුම දෙනාට ඔවුන්ගේ සේවයෙන් නිල ඉවත්වීමක් ලබා ගැනීමට මෙමගින් ඉඩ සලසයි.

මෙම පොදු සමා කාලය 2024 අප්‍රේල් 20 සිට මැයි 20 දක්වා මාසයක කාලයක් ක්‍රියාත්මක වේ.

මෙම කාලසීමාව තුළ යුද හමුදාවට නොපැමිණි අයට ඔවුන්ගේ රෙජිමේන්තු මධ්‍යස්ථාන සමඟ සම්බන්ධීකරණයෙන් යුද හමුදාවෙන් නීත්‍යනුකූලව ඉවත් වීමට අවස්ථාව ලබා දී ඇත.

අප්‍රේල් 27 වැනිදා වන විට, හමුදාවෙන් පළාගිය සෙබළුන් 7,156කට නීත්‍යානුකූලව ඉවත්වීම ලබා දී තිබේ.

නීත්‍යනුකූලව සේවයෙන් ඉවත් වූවන් අතර දැනට විදේශගතව සිටින යුද හමුදා සෙබළුන් 13 දෙනෙකු ද සිටින බව යුද හමුදාව තහවුරු කර තිබේ.