2026 ජනවාරි 1 වැනිදා සිට බලපැවැත්වෙන පරිදි පෞද්ගලික අංශයේ ජාතික අවම වැටුප රු. 27,000 සිට රු. 30,000 දක්වා ඉහළ යනු ඇති බව කම්කරු දෙපාර්තමේන්තුවේ කොමසාරිස් ජනරාල් එච්.එම්.ඩී.එන්.කේ. වටලියද්ද පැවසීය.

2025 අංක 11 දරන ජාතික අවම සේවක වැටුප් (සංශෝධන) පනතට අනුකූලව මෙම නිවේදනය නිකුත් කළ බව ඔහු වැඩිදුරටත් පැවසීය.

දෛනික වැටුප රු 1,080 සිට රු. 1,200 දක්වා වැඩි වන බවත්, සේවායෝජකයන් අදාළ ගෙවීම් කළ යුතු බවත් ඔහු සඳහන් කළේය.

“සංශෝධන පනතේ විධිවිධාන යටතේ, අතරමැදියන් හෝ කොන්ත්‍රාත්කරුවන් හරහා සේවයේ නියුතු සේවකයන්ගේ අවම වැටුප් අවශ්‍යතාවලට අනුකූල වීම සඳහා ක්ෂණික සහ අවසාන සේවායෝජකයා යන දෙපිරිසම ඇතුළුව සෑම සේවායෝජකයකුම වගකිව යුතුයි. පනතේ 4 වැනි වගන්තිය යටතේ නිශ්චිතව දක්වා ඇති අයවැය සහන දීමනා හැරුණු විට, 2025 මාර්තු 31 වැනිදා සිට සේවකයන්ට ලැබුණු වෙනත් දීමනා අවම වැටුප පියවා ගැනීම සඳහා භාවිත කළ නොහැකියි,” යනුවෙන් කොමසාරිස් ජනරාල්වරයා පැවසීය.

වැටුප් සංශෝධනය මගින් සේවක අර්ථසාධක අරමුදල (EPF), සේවක භාර අරමුදල (ETF), අතිකාල, පාරිතෝෂික, මාතෘ ප්‍රතිලාභ සහ නිවාඩු ගෙවීම් ඇතුළු ව්‍යවස්ථාපිත ගෙවීම් සඳහා වගකීම සේවායෝජකයන් වෙත පැවරේ.

තම සේවායෝජකයන් නිසි ගෙවීම් සිදු නොකරන බවට සැකකරන සේවකයන්ට කම්කරු දෙපාර්තමේන්තුවේ පැමිණිලි කළමනාකරණ පද්ධතිය හරහා cms.labourdept.gov.lk හි පැමිණිලි ගොනු කළ හැකිය.

නැතහොත් ළඟම ඇති කම්කරු කාර්යාලයට ලිඛිතව පැමිණිලි ඉදිරිපත් කළ හැකිය.