මෙරට අත්අඩංගුවේ පසුවන ඉන්දීය ධීවරයන්ගේ ‘දුක්ඛිත තත්ත්වය’ පිළිබඳ ඉන්දීය රාජ්‍ය සභාවේදී යොමුවූ ප්‍රශ්න සඳහා ඉන්දීය විදේශ කටයුතු අමාත්‍ය එස්. ජයිශංකර් පිළිතුරු ලබා දී තිබේ.

ඔහු එහිදී පවසා ඇත්තේ, 1974 සහ 1976 දක්වා දිවෙන සිදුවීම් හේතුවෙන් මෙම තත්ත්වය උදාවී ඇති බවයි.

මෙරට නීති රාමුව විස්තර කරමින් ජයිශංකර් පවසා ඇත්තේ ශ්‍රී ලංකාවට නීති දෙකක් ඇති බව සහ ඒවා 1996 ධීවර හා ජලජ සම්පත් පනත සහ 1979 විදේශ ධීවර බෝට්ටු ධීවර නියාමනය බවයි.

මෙම පනත් දෙකම 2018 සහ 2023 දී සංශෝධන කරන ලද අතර, දැඩි දඬුවම්, විශාල දඩ සහ වැඩි රඳවා තබාගැනීම සඳහා ඉන් අවස්ථාව සලසන බව ද ජයිශංකර් පවසයි.

සිරදඬුවම් විඳිමින් සිටින බොහෝදෙනා බෝට්ටු හිමිකරුවන් හෝ එම වැරදි නැවත සිදුකිරීමට ඉඩ ඇති පුද්ගලයන් වන අතර, එම ගැටලුව විසඳීම සංකීර්ණ කරන බව ද ඔහු පැහැදිලි කර ඇත.

ශ්‍රී ලංකාවේ ඉන්දීය ධීවරයින් රඳවා තබාගැනීම සම්බන්ධයෙන් පවතින ප්‍රශ්නයේ මූල හේතුව ආරම්භ වූයේ 1974 දී අන්තර්ජාතික සමුද්‍ර මායිම් රේඛාව ඇඳීමෙන් පසුව බවත්, 1976 දී ශ්‍රී ලංකාව ධීවර අධිකරණ බල සීමාව නිරූපණය කරමින් ලිපි හුවමාරු කර ගත් බවත් ඔහු ප්‍රකාශ කළේය.

ශ්‍රී ලංකාවේ අත්අඩංගුවේ සිටින ධීවරයන්ගෙන් බහුතරයක් තමිල්නාඩුවේ සහ පොන්ඩිචේරි ප්‍රදේශවල ධීවරයන් බවත්, භූගෝලීය සමීපත්වය ඊට හේතුව බවත් ජයිශංකර් පැවසුවේය.

“ඊයේ වනතුරු ශ්‍රී ලංකා අත්අඩංගුවේ ඉන්දීය ධීවරයින් 86 දෙනෙක් සිටියා. අද දින තවත් ධීවරයින් 11 දෙනෙකු සමඟ තවත් එක් ට්‍රෝලර් යාත්‍රාවක් අත්අඩංගුවට ගෙන තිබෙනවා. සමස්තයක් වශයෙන් ඉන්දීය ධීවරයින් 97 අත්අඩංගුවේ ඉන්නවා. 83 ක් සිරදඬුවම් විඳිමින් සිටින අතර තිදෙනෙකු නඩු විභාගයක් බලාපොරොත්තුවෙන් සිටිනවා” යනුවෙන් මෙරට අත්අඩංගුවේ පසුවන ධීවරයන් සංඛ්‍යාව පිළිබඳ යාවත්කාලීන කිරීමක් ලබාදෙමින් ජයිශංකර් පවසා වැඩිදුරටත් තිබේ.