කර්මාන්ත හා ව්‍යවසාය සංවර්ධන නියෝජ්‍ය අමාත්‍ය චතුරංග අබේසිංහ විසින් 2025 ජනවාරි සිට ජුනි දක්වා ආයෝජන මණ්ඩලයේ කාර්ය සාධන වාර්තාව නිකුත් කර තිබේ.

වාර්තාවට අනුව 2025 වසරේ මේ දක්වා ආයෝජන මණ්ඩලය විසින් ව්‍යාපෘති 57ක් අනුමත කර ඇත.

එම ඇමරිකානු ඩොලර් මිලියන 569 ඇස්තමේන්තුගත ආයෝජනයෙන්, ඇමරිකානු ඩොලර් මිලියන 507 ක් විදේශ සෘජු ආයෝජන වන අතර එය 2024 එම කාලපරිච්ඡේදයට සාපේක්ෂව 101% ක වර්ධනයකි.

දේශීය ආයෝජන හරහා ඇමෙරිකානු ඩොලර් මිලියන 285ක් උපයාගෙන ඇති බවත්, මෙම ව්‍යාපෘති මඟින් නව රැකියා අවස්ථා 14,000කට අධික සංඛ්‍යාවක් බිහිකිරීමට අපේක්ෂා කරන බවත් එම වාර්තාව වැඩිදුරටත් පෙන්වාදෙයි.

ආයෝජන මණ්ඩලයේ සමාගම් සඳහා අපනයන ආදායම ඇමරිකානු ඩොලර් බිලියන 3.7 ක් වූ අතර එය 3% ක වර්ධනයක් පෙන්නුම් කරයි.

ඒ අනුව නියෝජ්‍ය අමාත්‍ය චතුරංග අබේසිංහ පෙන්වාදෙන්නේ, පසුගිය කාලයේ ප්‍රවේශ විය හැකි දත්ත නොමැතිකම නිසා දූෂණය සහ අකාර්යක්ෂමතාව වර්ධනය වූ නමුත් වර්තමානයේ විනිවිදභාවය සහ ප්‍රතිඵල පෙන්නුම් කෙරෙන බවයි.

අමාත්‍යාංශයේ කාර්මික කලාපවලින් ඔබ්බට නව අපනයන සැකසුම් කලාප ස්ථාපිත වෙමින් පවතින අතර එය පුළුල් ජාතික කාර්මික වර්ධනයක් පෙන්නුම් කිරීමක් බව ද ඔහු පැවසුවේය.

“ශ්‍රී ලංකාව නැවත බංකොලොත් වන තුරු, සමහර විරුද්ධ බලවේග සහ ලිබරල් ප්‍රතිසංස්කරණවාදීන් සිහින දකිනු ඇත. නමුත් අද ආයෝජකයින්ට රජයේ වත්මන් දිශානතිය කෙරෙහි විශ්වාසයක් ඇත,” යනුවෙන් නියෝජ්‍ය අමාත්‍යවරයා කොටස් වෙළඳපොලේ සහ විදේශ ඍජු ආයෝජනවල වර්ධනය ගැන සඳහන් කරමින් පවසයි.

එලෙස ඉහළම ආයෝජන පැමිණ ඇති රටවල් සිංගප්පූරුව 47%, නෙදර්ලන්තය 15%, ප්‍රංශය 14%, ඉන්දියාව 5%, සහ ලක්සම්බර්ග් 3% ක් බව ද නියෝජ්‍ය අමාත්‍යවරයා නිකුත් කළ වාර්තාව පෙන්වාදෙයි.

කර්මාන්ත කලාප 17ක් ක්‍රියාත්මක වන අතර තවත් කර්මාන්ත කලාප 5ක් ඉදිරියේදී ක්‍රියාත්මක වන බව එහි වැඩිදුරටත් දැක්වේ.