තාවකාලිකව විකිණීම හෝ මාරු කිරීම තහනම් කර ඇති සුඛෝපභෝගී වාහන 112 අතරට තම වාහනය තිබේදැයි සැකහැර දැනගැනීම සඳහා මෝටර් රථ ප්‍රවාහන දෙපාර්තමේන්තුව සමඟ වාහන ලේඛන පරීක්ෂා කරගන්නා ලෙස රාජ්‍ය මුදල් රාජ්‍ය ඇමැති රංජිත් සියඹලාපිටිය ජනතාවගෙන් ඉල්ලා සිටියි.

මීට අමතරව මෙරටට ගෙන්වන වාහන නීතිමය ක්‍රමවේදයන් අනුගමනය කර තිබේද යන්න තහවුරු කර ගැනීමේ වැදගත්කම ද ඔහු අවධාරණය කරයි.

රජයට රුපියල් මිලියන 7000ක බදු ආදායමක් පාඩු කිරීම නිසා ශ්‍රී ලංකාවට ආනයනය කරන ලද සුඛෝපභෝගී වාහන 112ක් විකිණීම හෝ පැවරීම තාවකාලිකව නතර කිරීමට ගත් තීරණය සම්බන්ධයෙන් අදහස් දක්වමින් ඔහු මෙම අදහස් පළ කර තිබිණි.

ශ්‍රී ලංකා රේගුවේ නිසි අවසරයකින් තොරව මෙරටට රැගෙන ආ බව කියන මෙම සුඛෝපභෝගී වාහන 112ක් සම්බන්ධයෙන් මෝටර් රථ ප්‍රවාහන දෙපාර්තමේන්තුවේ පරිගණක දත්ත පද්ධතියට ව්‍යාජ තොරතුරු ඇතුළත් කිරීම පිළිබඳ විමර්ශනයක් ආරම්භ කර ඇති අල්ලස් හෝ දූෂණ චෝදනා විමර්ශන කොමිෂන් සභාවේ බුද්ධි අංශය කළ ඉල්ලීමක් සළකා බැලීමෙන් අනතුරුව කොළඹ ප්‍රධාන මහේස්ත්‍රාත් අධිකරණය මෙම නියෝගය නිකුත් කර තිබේ.

තත්ත්වය පැහැදිලි කරමින් රාජ්‍ය ඇමැතිවරයා අවධාරණය කළේ නීතිවිරෝධී ලෙස ආනයනය කරන ලද වාහනවල වත්මන් හිමිකරුවන් එවැනි වාහන හිමිකර ගැනීමේ වගකීම දැරිය යුතු බවයි.

නීතිය උල්ලංඝනය කර ඇත්නම් වාහන රාජසන්තක කිරීමට නියමිතය.

“මෙම වාහනවල වත්මන් හිමිකරුවන් ජාවාරම්වලට සම්බන්ධදැයි අපට නිශ්චිතව කිව නොහැකි නමුත් පසුගිය වසර කිහිපය තුළ මෙම වාහන වෙනත් පුද්ගලයන්ට අලෙවි කරන්නට ඇතැයි හිතන්න පුළුවන්. එම නිසා මෙම වාහන රාජසන්තක කිරීම ඒවායේ වත්මන් හිමිකරුවන් හරහා සිදු කරනවා” යනුවෙන් පවසන රාජ්‍ය ඇමැතිවරයා වාහන මිලදී ගැනීමේදී ප්‍රවේශම් වන ලෙස ද මහජනතාවගෙන් ඉල්ලා සිටියි.