2025 වාර්ෂික/අනිවාර්ය ජාතික පාසල් ගුරු මාරු යෝජනා ක්‍රමය යටතේ ස්ථාන මාරු නියෝග නිකුත් කිරීම පිළිබඳව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය සියලුම ජාතික පාසල්වල විදුහල්පතිවරුන් දැනුවත් කර ඇති අතර, අභියාචනා ඉදිරිපත් කිරීමේ ක්‍රියා පටිපාටිය ද දක්වා ඇති බව අමාත්‍යාංශ ලේකම්වරයා පවසයි.

අතිරේක ලේකම් ඒ. ජේ. එස්. එස්. එදිරිසූරිය විසින් නිකුත් කරන ලද නිවේදනයකට අනුව, ප්‍රාථමික (සාමාන්‍ය) විෂය කාණ්ඩයේ ගුරුවරුන් සඳහා ස්ථාන මාරු නියෝග 2026 ජනවාරි 6 වැනි දින සිට මාර්ගගතව ලබාගත හැකියි.

මේ පිළිබඳව අදාළ පාසල්වල සියලුම ගුරුවරුන්ට දැනුම්දෙන ලෙස විදුහල්පතිවරුන්ට උපදෙස් දී ඇත.

කළින් නිකුත් කරන ලද හෝ දීර්ඝ කරන ලද ස්ථාන මාරු නියෝගයකට අනුකූලව කටයුතු කිරීමට අපොහොසත් වූ ගුරුවරයෙකුට 2025 වාර්ෂික/අනිවාර්ය ස්ථාන මාරු ක්‍රියාවලිය යටතේ තවත් ස්ථාන මාරු නියෝගයක් නිකුත් කළහොත්, පෙර ස්ථාන මාරු නියෝගය අවලංගු ලෙස සලකනු ලබන බව අමාත්‍යාංශය තවදුරටත් පවසයි.

ජාතික පාසල් ගුරුවරුන්ට nstt.moe.gov.lk වෙත පිවිසීමෙන් ඔවුන්ගේ ස්ථාන මාරු නියෝග නැරඹිය හැකිය.

ස්ථාන මාරු තීරණ පිළිබඳව සෑහීමකට පත්නොවන ගුරුවරුන්ට 2026 ජනවාරි 6 සිට ජනවාරි 20 දක්වා එම වෙබ් අඩවිය භාවිත කර වාර්ෂික ස්ථාන මාරු සමාලෝචන කමිටුවට මාර්ගගතව අභියාචනා ඉදිරිපත් කිරීමේ හැකියාව ද පවතී.

අභියාචනය මාර්ගගතව ඉදිරිපත් කිරීමෙන් පසු, ගුරුවරුන් විසින් අයදුම්පතේ මුද්‍රිත පිටපතක් අදාළ උපකාරක ලියකියවිලි සමඟ 2026 ජනවාරි 21 දින හෝ ඊට පෙර ඔවුන් වැටුප් ලබන පාසලේ විදුහල්පති වෙත භාර දිය යුතුය.

අභියාචනා ක්‍රියාවලිය පිළිබඳව සියලුම ගුරුවරුන් දැනුවත් කිරීම සඳහා ජාතික පාසල් විදුහල්පතිවරුන් වගකිව යුතු බව අමාත්‍යාංශය අවධාරණය කරයි.