2024 අංක 09 දරන අන්තර්ජාල ආරක්ෂණ පනත අවලංගු කිරීම සඳහා නව ප්‍රජාතන්ත්‍රවාදී පෙරමුණේ පාර්ලිමේන්තු මන්ත්‍රී රවී කරුණානායක විසින් ඉදිරිපත් කරන ලද පෞද්ගලික මන්ත්‍රී පනත් කෙටුම්පතට සහාය දෙනවාද නැද්ද යන්න පිළිබඳ ජාතික ජන බලවේගය රජය තවමත් තීරණය කර නොමැති බව දැනගන්නට තිබේ.

‘අන්තර්ජාල ආරක්ෂණ පනත අවලංගු කිරීමේ පනත් කෙටුම්පත’ නිවේදනය කරමින් මෑතකදී ගැසට් නිවේදනයක් නිකුත් කර තිබිණි.

මෙම පනත් කෙටුම්පත පාර්ලිමේන්තුවේ සම්මත කිරීමට ජාතික ජන බලවේගය සහාය දක්වන්නේද යන්න පිළිබඳ කළ විමසීමකට ජාතික ජන බලවේගයේ මහලේකම් සහ පාර්ලිමේන්තු මන්ත්‍රී ආචාර්ය නිහාල් අබේසිංහ පැවසුවේ පක්ෂය තවමත් මේ සම්බන්ධයෙන් තීරණයක් ගෙන නොමැති බවයි.

“අපි දැනට මැතිවරණ ආශ්‍රිත කටයුතුවල නියැලී සිටිනවා. අපට මේ පිළිබඳ සාකච්ඡා කිරීමට අවශ්‍යයි, නමුත් තවමත් අවස්ථාවක් ලැබී නැහැ. ඉදිරි දිනවලදී අපි එය කරනවා” යනුවෙන් ඔහු පවසා තිබේ.

2024 මුල් භාගයේදී හිටපු ජනාධිපති රනිල් වික්‍රමසිංහගේ පාලන සමයේදී සම්මත කරන ලද අන්තර්ජාල ආරක්ෂණ පනත, මාර්ගගත අපයෝජනය, සයිබර් හිරිහැර කිරීම සහ හානිකර ඩිජිටල් අන්තර්ගතයන් මැඩපැවැත්වීමේ අරමුණින් හඳුන්වා දෙන ලදී.

කෙසේවෙතත්, මෙම පනතේ අපැහැදිලි අර්ථ දැක්වීම් සහ අදහස් ප්‍රකාශ කිරීමේ නිදහස සීමා කිරීමේ හැකියාව හේතුවෙන් විවේචන එල්ල විය.

එවක විපක්ෂයේ සිටි ජාතික ජන බලවේගය ඇතුළු පක්ෂ කිහිපයක් පනත් කෙටුම්පතට විරුද්ධ වූයේ, රජය විවේචනය කරන සමාජ මාධ්‍ය අන්තර්ගතයන් පාලනය කිරීමට සහ විසම්මුතිය නිහඬ කිරීමට එය අනිසි ලෙස භාවිත කළ හැකි බව පවසමිනි.