අධ්‍යාපන අමාත්‍යවරිය ද වන අගමැතිනි හරිනි අමරසූරියට එරෙහිව විපක්ෂය විසින් සකස් කරන විශ්වාසභංග යෝජනාව විවාද කිරීම සඳහා මෙම සතියේ පාර්ලිමේන්තු සැසිවාරයේදී කාලය වෙන් කිරීමට රජය සූදානම් බව සභානායක අමාත්‍ය බිමල් රත්නායක පවසයි.

අද පාර්ලිමේන්තුව අමතමින් අමාත්‍ය රත්නායක පැවසුවේ ජනවාරි 22 සහ 23 යන දිනවල පැවැත්වීමට නියමිත පාර්ලිමේන්තු සැසි සම්පූර්ණයෙන්ම විශ්වාසභංග යෝජනාව සඳහා වෙන් කිරීමට රජය කැමැත්තෙන් සිටින බවයි.

“අගමැතිනියට සහ අගමැති ධුරයට එරෙහිව විශ්වාසභංග යෝජනාවක් සූදානම් වන බවට පළ වන පුවත ඉතා බරපතළ කාරණයක්. විශ්වාසභංග යෝජනාවක් සකස් කර ඇත්නම්, අත්සන් ලබාගෙන ඇතත් ඉදිරිපත් නොකරනවා නම් එය ගැටළුවක් බව අපට හැඟෙනවා. විපක්ෂය විශ්වාසභංග යෝජනාව ඉදිරිපත් කරනවද නැද්ද යන්න අපි දැන ගන්න කැමතියි, ”ඔහු පැවසීය.

අමාත්‍යවරයාට ප්‍රතිචාර දක්වමින් විපක්ෂයේ ප්‍රධාන සංවිධායක ගයන්ත කරුණාතිලක පාර්ලිමේන්තුවට දැනුම් දුන්නේ එය විපක්ෂයට අදාළ කාරණයක් බවත්, අවශ්‍ය සාකච්ඡා පැවැත්වීමෙන් පසු තීරණය කරන බවත්ය.

අගමැතිනි හරිනි අමරසූරියට එරෙහිව විශ්වාසභංග යෝජනාවක් ගෙන එන්නේනම් එය ඉදිරිපත් කරන ලෙස අමාත්‍ය බිමල් රත්නායක විපක්ෂයෙන් ඉල්ලා සිටියේ මෙය රටේ ස්ථාවරත්වයට බලපාන බව පෙන්වා දෙමිනි.