May 22, 2025
සෞඛ්‍ය ක්ෂේත්‍රයට අදාළව ශ්‍රී ලංකා සහ ඉන්දීය රජයන් අතර අත්සන් කරන ලද අවබෝධතා ගිවිසුම් (MoU) පිළිබඳ විස්තර ඉල්ලා රජයේ වෛද්‍ය නිලධාරීන්ගේ සංගමය (GMOA) 2016 අංක 12 දරන තොරතුරු දැනගැනීමේ අයිතිවාසිකම් (RTI) පනත යටතේ ඉල්ලීමක් ඉදිරිපත් කර ඇත.
ඉන්දීය අග්‍රාමාත්‍ය නරේන්ද්‍ර මෝදිගේ පසුගිය නිල සංචාරයේදී, ඉන්දියාවේ සෞඛ්‍ය සහ පවුල් සුභසාධන අමාත්‍යාංශය, ශ්‍රී ලංකාවේ සෞඛ්‍ය සහ ජනමාධ්‍ය අමාත්‍යාංශය සහ ජාතික ඖෂධ නියාමන අධිකාරිය අතර අවබෝධතා ගිවිසුම් දෙකක් අත්සන් කරන ලදී.
ඩේලි මෝර්නිං පුවත්පතට අදහස් දක්වමින් GMOA ප්‍රකාශක වෛද්‍ය චමිල් විජේසිංහ පවසා ඇත්තේ, සෞඛ්‍ය ක්ෂේත්‍රයට අදාළව ශ්‍රී ලංකාව සහ ඉන්දියාව අතර අත්සන් කරන ලද අවබෝධතා ගිවිසුම් පිළිබඳ විස්තර ඉල්ලා සංගමය තොරතුරු දැනගැනීමේ අයිතිවාසිකම් පනත යටතේ සෞඛ්‍ය අමාත්‍යාංශයට ඉල්ලීමක් ඉදිරිපත් කර ඇති බවයි. “අපි විස්තර ඉල්ලා තිබෙනවා. ඒවා ලැබුණු පසු, අපි අදාළ බලධාරීන් සමඟ සාකච්ඡා කරන්නවා” ඔහු පවසා ඇත.
ඉන්දීය අග්‍රාමාත්‍ය මෝදිගේ ශ්‍රී ලංකා සංචාරය අතරතුර ඉන්දියාවේ සහ ශ්‍රී ලංකාවේ විවිධ රාජ්‍ය ආයතන අතර අත්සන් කරන ලද අවබෝධතා ගිවිසුම් හතක් හුවමාරු කර ගැනීම සිදුවිය.
විපක්ෂය සහ සිවිල් සමාජ කණ්ඩායම් ඇතුළු විවිධ පාර්ශවයන්ගෙන් නැවත නැවතත් ඉල්ලීම් කළද, රජය තවමත් අවබෝධතා ගිවිසුම් පිළිබඳ තොරතුරු නිල වශයෙන් නිකුත් කර නොමැත.
තොරතුරු රඳවා තබාගැනීමේ චෝදනාවලට ප්‍රතිචාර දක්වමින් රජයේ නියෝජිතයින් පවසා ඇත්තේ ගිවිසුම් ‘සුදුසු වේලාවට’ පාර්ලිමේන්තුවට ඉදිරිපත් කරන බවයි.
මේ අතර, රට පුරා රෝහල්වල අත්‍යවශ්‍ය ඖෂධ හිඟයක් උත්සන්න වීම පිළිබඳව රජයේ වෛද්‍ය නිලධාරීන්ගේ සංගමය කනස්සල්ල පළ කර තිබේ.
ජනමාධ්‍ය වෙත අදහස් දක්වමින් වෛද්‍ය විජේසිංහ ප්‍රකාශ කළේ, අනෙකුත් අත්‍යවශ්‍ය ඖෂධ අතර ප්‍රතිජීවක, වේදනා නාශක සහ ඉන්සියුලින් හිඟයක් පවතින බවයි.
“අප්‍රේල් මාසය අවසන් වන විට වෛද්‍ය සැපයුම් අංශයේ ඖෂධ වර්ග 180 කට ආසන්න ප්‍රමාණයක් අවසන් වී තිබූ අතර තවත් 50 ක් පමණ රෝහල් පද්ධතිය තුළ නොතිබුණි. මෙයට හෘද රෝග, අධි රුධිර පීඩනය සහ ශල්‍ය උපකරණ සඳහා පවා තීරණාත්මක ඖෂධ ඇතුළත් වේ. ජාතික සහ ප්‍රාදේශීය සෞඛ්‍ය සේවා පද්ධති දෙකටම බලපාන මෙම ගැටලුව පුළුල්ව පැතිරී ඇත” ඔහු පැවසීය.
ඖෂධ හිඟය වෛද්‍ය වෘත්තිකයන් අතර වැඩෙන කනස්සල්ලට හේතු වී ඇති අතර, ඖෂධ සැපයුම් දාමයේ අඛණ්ඩ බාධාවන් රෝගී සත්කාර සහ රෝහල් මෙහෙයුම් සඳහා බරපතල ප්‍රතිවිපාක ඇති කළ හැකි බවට අනතුරු ඇඟවීම් නිකුත් කෙරී ඇත.
