December 30, 2025
නාවලපිටිය – පස්බාගේ කෝරලේ ප්රාදේශීය ලේකම් කාර්යාලයට විද්යුත් තැපැල් පණිවිඩයක් මගින් ලැබුණු බෝම්බ තර්ජනයක් හේතුවෙන් ඊයේ හදිසි ආරක්ෂක මෙහෙයුමක් ක්රියාත්මක කළ ද එම තර්ජනය අසත්ය බව පසුව තහවුරු වී තිබේ.
දින කිහිපයක් ඇතුළත වාර්තා වූ සිව්වැනි බෝම්බ බිය මෙයයි.
පොලිසිය පවසන්නේ ප්රාදේශීය ලේකම් කාර්යාලයේ ගබඩා කාමරයක් තුළ බෝම්බයක් ඇති බවට අනතුරු ඇඟවීමක් කාර්යාලයේ නිල විද්යුත් තැපැල් ගිණුමට ඊයේ ලැබී ඇති බවයි.
විදේශයක සිට යොමු කරන ලද බවට වාර්තා වන පණිවිඩයේ සඳහන් වූයේ දෙසැම්බර් 29 වැනිදා පස්වරු 2.00ට පමණ කූඩාරමක් තුළ තබා ඇති බෝම්බයක් පුපුරා යන බවයි.
අනතුරු ඇඟවීමෙන් පසු, නිලධාරීන් වහාම කාර්ය මණ්ඩල සාමාජිකයන් සහ මහජනතාව පරිශ්රයෙන් ඉවත්කර ආරක්ෂක අංශ වෙත දැනුම් දී ඇත.
නාවලපිටිය පොලිසිය, විශේෂ කාර්ය බලකාය, හමුදා බෝම්බ නිෂ්ක්රීය ඒකකය සහ පොලිස් නිල සුනඛ ඒකකය ගබඩා කාමරය සහ මුළු කාර්යාල පරිශ්රයම හොඳින් පරීක්ෂාවට ලක්කර තිබේ.
සෝදිසි කිරීම්වලින් පසුව, සැක සහිත වස්තූන් හෝ පුපුරණ ද්රව්ය කිසිවක් හමු නොවූ බව බලධාරීන් තහවුරු කර ඇත.
මේ අතර, පූජාපිටිය ප්රාදේශීය ලේකම් කාර්යාලයට විද්යුත් තැපෑලෙන් ලැබුණු එවැනිම බෝම්බ තර්ජනයක් විමර්ශනවලින් පසුව ප්රෝඩාවක් බව තහවුරු වී ඇති බව ද පොලිසිය අනාවරණ කළේය.
තර්ජනය අසත්ය බව ප්රකාශ කළද, පූර්වාරක්ෂාව සඳහා පොලිසිය පූජාපිටිය ප්රාදේශීය ලේකම් කාර්යාලයට විශේෂ ආරක්ෂාවක් යොදවා ඇති බව ජ්යෙෂ්ඨ පොලිස් නිලධාරියෙක් පැවසීය.
ත්රස්තවාදී ප්රහාරයක් සිදුවිය හැකි බැවින් පසුදා පස්වරු 2.00ට පෙර එම ස්ථානයෙන් ඉවත්වන ලෙස නිලධාරීන්ට අනතුරු අඟවමින් දෙසැම්බර් 28 වැනිදා පූජාපිටිය ප්රාදේශීය ලේකම් කාර්යාලයට තර්ජනාත්මක විද්යුත් තැපැල් පණිවිඩයක් ලැබී ඇති බව විමර්ශනවලින් හෙළි විය.
පෙර දින නිවාඩු දිනයක් වූ බැවින්, පණිවිඩය සඳුදා දැක තිබේ.
ප්රාදේශීය ලේකම්වරයාගේ උපදෙස් මත ක්රියාත්මක වූ නිලධාරියකු පොලිසියට පැමිණිල්ලක් කළ අතර, ඊට ක්ෂණික ප්රතිචාර ලැබී ඇත.
ආරක්ෂක අංශ බෝම්බ නිෂ්ක්රීය ඒකක සහ සුනඛයන් සමඟ විශේෂ සෝදිසි මෙහෙයුමක් සිදුකළ අතර එය පැය හතරකට ආසන්න කාලයක් පැවතිණි.
සැකසහිත කිසිවක් හමු වී නොතිබිණි.
මෙම ප්රෝඩාකාරී තර්ජන මාලාව සිකුරාදා මහනුවර ප්රාදේශීය ලේකම් කාර්යාල සිදුවීමෙන් ආරම්භ වූ අතර ඉරිදා කටාර් ගුවන් යානයක් සම්බන්ධ එවැනිම බෝම්බ තර්ජනයක් වාර්තා වී තිබිණි.
තර්ජනාත්මක ඊමේල් පණිවිඩවල මූලාශ්රය සොයා ගැනීමට පරීක්ෂණ සිදුකෙරෙමින් පවතී.
