අහමදාබාද්හි එයාර් ඉන්දියා ගුවන් අනතුර සිදු වූ ස්ථානයෙන් එක් කළු පෙට්ටියක් සොයාගෙන ඇති බව ඉන්දියාවේ සිවිල් ගුවන් සේවා අමාත්‍යවරයා පැවසීය.

ඉන්දීය ගුවන් යානා අනතුරු විමර්ශන කාර්යාංශය විසින් පැය 28ක් ඇතුළත ගුවන් ගමන් දත්ත පටිගත කිරීමේ යන්ත්‍රය සොයා ගත් බව රාම් මොහාන් නායිදු කින්ජරපු තහවුරු කළේය.

ලන්ඩන් බලා ගුවන් ගත වී තත්පර 60කටත් අඩු කාලයකදී ගුවන් යානයේ සිටි 242 දෙනාගෙන් එක් අයෙකු හැර අනෙක් සියල්ලෝම යානය කඩා වැටීමෙන් මිය ගියහ.

සෙසු පුද්ගලයන් අට දෙනෙකු ද මිය ගිය බව නිලධාරියෙක් බීබීසී වෙත පවසා තිබේ.

“කළු පෙට්ටිය සොයා ගැනීම විමර්ශනයේ වැදගත් ඉදිරි පියවරක් සනිටුහන් කරනවා, එය විමර්ශනයට සැළකිව යුතු ලෙස උපකාරී වනු ඇති” යනුවෙන් කින්ජරපු පැවසීය.

ගුවන් යානාවල සාමාන්‍යයෙන් කළු පෙට්ටි දෙකක් රැගෙන යයි.

ඒවා කුඩා නමුත් දැඩි ඉලෙක්ට්‍රොනික දත්ත පටිගත කිරීමට සමත්ය.

එකක් උන්නතාංශය සහ වේගය වැනි පියාසැරි දත්ත වාර්තා කරයි.

අනෙක නියමු කුටියේ ශබ්දය වාර්තා කරයි.

එබැවින් විමර්ශකයන්ට නියමුවන් පවසන දේ ඇසීමට සහ ඕනෑම අසාමාන්‍ය ශබ්ද සඳහා සවන් දීමට හැකිය.

අනතුරට හේතුව සොයා බැලීම සඳහා ඉන්දීය ගුවන් යානා අනතුරු විමර්ශන කාර්යාංශය විමර්ශනය මෙහෙයවන අතර, අමෙරිකා එක්සත් ජනපදයේ සහ එක්සත් රාජධානියේ කණ්ඩායම්වල සහාය ද ඊට හිමිව තිබේ.

බෝයිං සමාගමේ ප්‍රධාන විධායක නිලධාරී කෙලී ඕර්ට්බර්ග් පැවසුවේ සිය සමාගම ද විමර්ශනයට සහාය දක්වන බවයි.

අහමදාබාද්හි සර්දාර් වල්ලභ්බායි පටෙල් ගුවන්තොටුපළෙන් දේශීය වේලාවෙන් පස්වරු 13:39ට බෝයිං 787 ඩ්‍රීම්ලයිනර් ගුවන් යානය ගුවන් ගත වී සුළු වේලාවකින් අනතුරට පත්වන විට එහි ඉන්දියානු ජාතිකයන් 169 දෙනෙකු, බ්‍රිතාන්‍ය ජාතිකයන් 53 දෙනෙකු, පෘතුගීසි ජාතිකයන් හත් දෙනෙකු සහ කැනේඩියානු ජාතිකයකු සිටි බව එයාර් ඉන්දියා පැවසීය.

AI171 ගුවන් යානය බ්‍රිතාන්‍ය වේලාවෙන් පස්වරු 18:25ට ලන්ඩනයේ ගැට්වික් ගුවන්තොටුපළට ගොඩබෑමට නියමිතව තිබිණි.

වෛද්‍යවරයෙක් බීබීසීයට පවසා තිබුණේ මියගිය අය හඳුනා ගැනීම සඳහා ඥාතීන්ගෙන් ලබාගත් DNA මත විශ්වාසය තබන බවයි.

මේ වන විට හය දෙනෙකුගේ දේහයන් ඔවුන්ගේ පවුල්වලට මුදා හැර ඇති බවත්, ඔවුන්ගේ ඥාතීන්ට මුහුණේ ලක්ෂණ අනුව ඔවුන් හඳුනා ගැනීමට හැකි වූ බවත් පශ්චාත් මරණ පරීක්ෂණ කාමරයේ පොලිස් නිලධාරියකු බීබීසීයට පවසා තිබිණි.

අනතුරෙන් දිවි ගලවා ගත් එකම පුද්ගලයා වන ගුවන් යානයේ 11A ආසනයේ සිටි බ්‍රිතාන්‍ය ජාතික විශ්වෂ්කුමාර් රමේෂ් තවමත් රෝහලේ සුවය ලබමින් සිටී.

මේ අතර, ඇතැම් පවුල් තවමත් ඔවුන්ගේ ඥාතීන් පිළිබඳ පුවත බලාපොරොත්තුවෙන් සිටිති.

ගුවන් යානය මේඝානි නගර් නම් නේවාසික ප්‍රදේශයකට කඩා වැටුණු අතර පොලවේ සිටි කොපමණ පිරිසක් මිය ගියාද යන්න තවමත් පැහැදිලි නැත.

බීජේ වෛද්‍ය විද්‍යාලයේ සහ සිවිල් රෝහලේ පීඨාධිපති වෛද්‍ය මිනාක්ෂි පරික් පැවසුවේ ගුවන් යානය නේවාසිකාගාර ගොඩනැගිලිවලට කඩා වැටීමෙන් ඔවුන්ගේ සිසුන් හතර දෙනෙකු මිය ගිය බවයි.

“ගුවන් යානය කඩා වැටෙන විට කැම්පස් එකේ සිටි අපගේ වෛද්‍යවරුන්ගේ ඥාතීන් හතර දෙනෙකු මිය ගිහින්,” වෛද්‍ය පරික් පැවසීය.

Flightradar24 වෙබ් අඩවියේ දත්තවලට අනුව, බෝයිං ඩ්‍රීම්ලයිනර් 787-8 බ්‍රහස්පතින්දා සිදු වූ මෙම ව්‍යසනයට පෙර මේ වසර තුළ ගුවන් ගමන් 700කට වඩා සම්පූර්ණ කරතිබේ.

එයාර් ඉන්දියා ගුවන් යානය අවුරුදු 11ක් පැරණි වූ අතර එහි වඩාත් පොදු මාර්ග අතර මුම්බායි සහ ඩුබායි අතර මෙන්ම නවදිල්ලිය සහ මිලාන්, පැරිස් සහ ඇම්ස්ටර්ඩෑම් වැනි යුරෝපීය ගමනාන්ත අතර ගුවන් ගමන් ද ඇතුළත් විය.

පසුගිය වසර දෙක තුළ අහමදාබාද් සිට ලන්ඩන් ගැට්වික් දක්වා ගුවන් ගමන් 25ක් ක්‍රියාත්මක කර තිබිණි. .