September 23, 2025
ලංකා විදුලිබල මණ්ඩලයේ සේවකයන් සඳහා වන සියලුම නිවාඩු වහාම ක්‍රියාත්මක වන පරිදි නැවත දැනුම් දෙන තුරු අවලංගු කර ඇත.
මෙය ලංකා විදුලිබල මණ්ඩලයේ සාමාන්‍යාධිකාරීවරයා විසින් ලිඛිතව නිල වශයෙන් දැනුම් දී තිබේ.
ජනාධිපති නියෝගය යටතේ විදුලිබල සැපයුමට අදාළ සියලුම සේවාවන් ඉරිදා (21) අත්‍යවශ්‍ය සේවා ලෙස ප්‍රකාශයට පත් කරමින් විශේෂ ගැසට් නිවේදනයක් නිකුත් කරන ලදී.
1979 අංක 61 දරන අත්‍යවශ්‍ය මහජන සේවා පනතේ 2 වැනි වගන්තිය මගින් ඔහුට පැවරී ඇති බලතල යටතේ ජනාධිපති අනුර කුමාර දිසානායක මෙම ප්‍රකාශයට අත්සන් තැබීය.
සාමාන්‍ය මහජන ජීවිතය පවත්වා ගැනීම සඳහා මෙම සේවාවන් අත්‍යවශ්‍ය බවත් ඒවාට සිදුවන ඕනෑම අවහිරයක් හෝ බාධාවක් බරපතළ ප්‍රතිවිපාක ඇති කළ හැකි බවත් සැළකිල්ලට ගනිමින් ගැසට් පත්‍රය නිකුත් කරන ලදී.
විදුලිබල සේවකයන් අඛණ්ඩ වෘත්තීය සමිති ක්‍රියාමාර්ගයක නිරතවන පසුබිමක නිවාඩු අවලංගු කිරීම සහ විදුලිබල සැපයුමට අදාළ සේවාවන් අත්‍යවශ්‍ය සේවා ලෙස ප්‍රකාශයට පත් කිරීම සිදු වේ.
ලංකා විදුලිබල මණ්ඩලය ප්‍රධාන ආයතන හතරකට බෙදා ප්‍රතිව්‍යුහගත කිරීමට රජය ගත් තීරණයට විරෝධය පළ කරමින් විදුලිබල මණ්ඩලයේ සේවකයෝ පසුගිය දින කිහිපය තුළ වෘත්තීය සමිති ක්‍රියාමාර්ගයක නිරත වුහ.
