August 18, 2025
අපනයන අරමුණු සඳහා පමණක් දැඩි රෙගුලාසි යටතේ තම අපනයන කලාපවල කංසා වගාකිරීමට අවසර දීම සම්බන්ධයෙන් අනුර කුමාර දිසානායක ප්‍රමුඛ ආණ්ඩුවට හිටපු රාජ්‍ය අමාත්‍ය ඩයනා ගමගේ ප්‍රශංසා කර තිබේ.
ජනමාධ්‍ය අමතමින් ඩයනා ගමගේ පැවසුවේ, පසුගිය ආණ්ඩුවේ පාලන සමයේදී කංසා සම්බන්ධයෙන් තමන් ඉදිරිපත් කළ යෝජනා ක්‍රියාත්මක කිරීමට වත්මන් ආණ්ඩුව පියවර ගැනීම ගැන තමන් සතුටු වන බවයි.
“මම පාරේ යන අතරතුර කංසා පරිභෝජනය කරන ලෙස ජනතාවගෙන් ඉල්ලා සිටියේ නැහැ. එය ඖෂධයක් ලෙස භාවිතා කරන ලෙස මම යෝජනා කළේ නැහැ. එය ශ්‍රී ලංකාවට ඩොලර් උපයාගැනීම සඳහා කර්මාන්තයක් ලෙස සැලකිය යුතු බව පමණක් මම යෝජනා කළා,” ඇය පැවසුවාය.
ඩයනා ගමගේ තවදුරටත් පැවසුවේ, එවකට ඇගේම රජයේ සාමාජිකයන් මෙම යෝජනා සඳහා ඇයට එරෙහිව නැගීසිටි බවත්, එවකට ජනාධිපති රනිල් වික්‍රමසිංහ පවා ඇයට තම රාජකාරි ඉටුකිරීමට ඉඩ නොදුන් බවට චෝදනා කළ බවත්ය.
කෙසේවෙතත්, වත්මන් ආණ්ඩුව මෙම යෝජනාවල ඇති අවශ්‍යතාවය තේරුම් ගෙන ඇති බවත්, ඒවා අනුමත කිරීමට පියවර ගෙන ඇති බවත්, මේ සඳහා අන්තර්ජාතික සමාගම් හතකට බලපත්‍ර ලබාදීම ගැන ඇය සතුටු වන බවත් පැවසුවාය.
“ආයෝජකයින් සමඟ සිදුකරන ගනුදෙනු, කංසා කර්මාන්තය නීතිගත කිරීමේ අවශ්‍යතාවය සහ ඒ හරහා උපයා ගත හැකි ඩොලර් පිළිබඳව මුළු රටටම ප්‍රකාශ කිරීම ගැන රාජ්‍ය නායකයෙකු ලෙස ජනාධිපති අනුර කුමාර දිසානායකට මම ගරු කරනවා.” ඩයනා ගමගේ තවදුරටත් පැවසීය.
අපනයන අරමුණු සඳහා පමණක්, ශ්‍රී ලංකාවේ අපනයන කලාපවල දැඩි රෙගුලාසි යටතේ කංසා වගා කිරීමට කැබිනට් මණ්ඩලය අවසර ලබාදීමෙන් පසුව ඇය මෙම අදහස් පළකළාය.
කැබිනට් ප්‍රකාශක අමාත්‍ය නලින්ද ජයතිස්ස පැවසුවේ, රජය 2004 දී ආරම්භ කරන ලද ක්‍රියාවලියක්, අවශ්‍ය සියලු අනුමැතියන්ගෙන් පසුව දිගටම කරගෙන යන බවත්, ආයෝජන මණ්ඩලය (BOI) යටතේ කංසා වගාව ව්‍යාප්ත කිරීම ආරම්භ කිරීම සඳහා ආයතනයක් ස්ථාපිත කර ඇති බවත්ය.
වගාව ආයෝජන මණ්ඩලයේ සහ ආයුර්වේද දෙපාර්තමේන්තුවේ දැඩි රෙගුලාසි යටතේ සිදුවන අතර ඔවුන්ට අපනයනය කිරීමට පමණක් අවසර දෙනු ලැබේ.
