September 6, 2025
ජනමාධ්‍ය හමුවකට එක්වෙමින් දේශපාලනඥයන්ගේ ඡායාරූප කිහිපයක් දක්වා සිටි මහජන ආරක්‍ෂාව පිළිබඳ නියෝජ්‍ය අමාත්‍ය සුනිල් වටගල පැවසුවේ, එම දේශපාලනඥයන් මත්ද්‍රව්‍ය නිෂ්පාදනය සඳහා යොදාගන්නා රසායනික ද්‍රව්‍ය ජාවාරමේදී භාවිතා කළ කන්ටේනර්වල හිමිකරුවන් සමග සබඳතා පවත්වා ඇති බවයි.
එබැවින් එම මත්ද්‍රව්‍ය තොගයේ සැපයුම් දාමය පිටුපස සිටින එම දේශපාලනඥයන් පිළිබඳ පරීක්ෂණ පවත්වන බවත්, ඔවුන්ගේ තරාතිරම නොබලා පියවර ගන්නා බවත් ඔහු පැවසීය.
පරීක්ෂණ අතරතුර ඇතැම් දේශපාලනඥයන් පශ්චාත් උපාධි අධ්‍යයන හෝ සෞඛ්‍ය හේතූන් දක්වමින් රට හැර ගොස් ඇති අතර, තවත් පිරිසක් හදිසියේ අතුරුදන් වී ඇති බව ද ඔහු වැඩිදුරටත් සඳහන් කළේය.
සැපයුම් දාමයට සම්බන්ධ පුද්ගලයන් හඳුනාගෙන මත්ද්‍රව්‍ය ජාවාරම පිටුපස සිටින්නේ කවුරුන්ද යන්න හෙළිකිරීමට රජය පුළුල් පරීක්ෂණයක් පවත්වන බව ද නියෝජ්‍ය අමාත්‍ය සුනිල් වටගල අවධාරණය කළේය.
