පෞද්ගලික සමාගමක් විසින් සිදුකරන අම්බුළුවාව කේබල් කාර් ව්‍යාපෘතියට ගම්පොළ උඩපළාත ප්‍රාදේශීය ලේකම් අනවශ්‍ය ලෙස මැදිහත්වීම වළක්වාලමින් අභියාචනාධිකරණය අද අතුරු නියෝගයක් නිකුත් කළේය.

අභියාචනාධිකරණ විනිසුරුවරුන්ගෙන් සමන්විත ද්විපුද්ගල විනිසුරු මඩුල්ලක් වන එම්.ටී.එම්.ලාෆීර් සහ පී.කුමරරත්නම් විසින්, සීමාසහිත Amber Adventures (Private) Limited විසින් ගොනු කරන ලද රිට් පෙත්සම සළකා බැලීමෙන් පසු මෙම නියෝගය කර ඇති අතර, මෙම අතුරු නියෝගය ඔක්තෝබර් 29 දක්වා බලපැවැත්වෙනු ඇත.

ආසන්න වශයෙන් මීටර් 1,621.5 ක කඹ මාර්ගයක් සහිත කේබල් කාර් ව්‍යාපෘතියක් ඉදිකිරීමට, ක්‍රියාත්මක කිරීමට සහ පැවරීමට පෙත්සම්කරුගේ ව්‍යාපෘතියට බාධා කරමින් ප්‍රාදේශීය ලේකම් විසින් කරන ලදැයි කියන නීතිවිරෝධී මැදිහත්වීම පෙත්සම්කරු අභියෝග කර ඇත.

පෙත්සම්කරු වෙනුවෙන් සනත් විජේවර්ධනගේ උපදෙස් මත ජනාධිපති නීතීඥ අලි සබ්රි සහ ෂෙහානි අල්විස් සහ නමික් නෆත් පෙනීසිටියහ.