යහපාලන ආණ්ඩුව සමයේ කෘෂිකර්ම අමාත්‍යාංශය රාජගිරියේ පිහිටි DPI Tower ගොඩනැගිල්ලට ගෙනයාමේ තීරණය විමර්ශනය කරන අල්ලස් හෝ දූෂණ චෝදනා විමර්ශන කොමිසම, මෙම තීරණයට සම්බන්ධ කැබිනට් අනුකමිටුවේ සාමාජිකයින්ගෙන් ප්‍රශ්න කිරීමට තීරණය කර තිබේ.

එම අනුකමිටුවේ සාමාජිකයෙකු වූ හිටපු සභානායක ලක්ෂ්මන් කිරිඇල්ල දෙසැම්බර් 10 වැනි දින කොමිසම හමුවට කැඳවා ඇත්තේ මේ සම්බන්ධයෙන් ප්‍රකාශයක් ලබාගැනීම සඳහාය.

ගොඩනැගිල්ල බදු පදනම මත ලබාගැනීම සඳහා වන කැබිනට් යෝජනාව අධ්‍යයනය කිරීම සඳහා උපකමිටුව පත් කරන ලදී.

අල්ලස් කොමිසම විසින් එම උපකමිටු සාමාජිකයින්ගෙන් ඔවුන්ගේ තක්සේරුව පිළිබඳව ප්‍රශ්න කිරීමට අදහස් කරන බව සන්ඩේ ටයිම්ස් පුවත්පත වාර්තා කරයි.

කැබිනට් යෝජනාවක් මතභේදාත්මක කාරණයක් බවට පත්වන අවස්ථාවන්හිදී උපකමිටුවක් පත්කිරීම සාමාන්‍ය ක්‍රියා පටිපාටියයි.

එහිදී අදාළ එම කරුණ අධ්‍යයනය කර එහි නිර්දේශ ඉදිරිපත් කිරීම අවශ්‍ය වේ.

අවසාන තීරණයක් ගැනීමේදී අනුකමිටුවේ නිර්දේශ සැලකිල්ලට ගන්නා බැවින්, එම රාජගිරිය ගොඩනැගිල්ල බදුදීමේදී දූෂණ ක්‍රියාවක් සිදුවී ඇත්දැයි තීරණය කිරීම සඳහා කොමිසම එහි සාමාජිකයන්ගේ තීරණය සම්බන්ධයෙන් ප්‍රශ්න කිරීමට අදහස් කරන බව අල්ලස් කොමිසමේ ඉහළ පෙළේ ආරංචි මාර්ග සඳහන් කර ඇත.

මෙම යෝජනාව පාර්ලිමේන්තුවට ඉදිරිපත් කර ඇත්තේ ලක්ෂ්මන් කිරිඇල්ල විසිනි.

ප්‍රකාශයක් ලබාදීමට පෙර තම නීතිඥයින්ට අල්ලස් කොමිසම සමඟ අදාළ ලේඛන අධ්‍යයනය කිරීමට අවසර දෙන ලෙස ඔහු ඉල්ලා තිබේ.

මේ සම්බන්ධයෙන් අල්ලස් කොමිසම දැනටමත් හිටපු ජනාධිපති මෛත්‍රීපාල සිරිසේන සහ හිටපු අමාත්‍ය චමල් රාජපක්ෂගෙන් ප්‍රශ්න කර ඇත.