ලබන සැප්තැම්බර් 3 වැනිදා සිම්බාබ්වේ හරාරේ හිදී ආරම්භ වන තරග තුනකින් යුත් T20 තරගාවලියට පෙර දිනේෂ් චන්දිමාල් සහ අවිශ්ක ප්‍රනාන්දු ශ්‍රී ලංකා සංචිතයෙන් ඉවත් කර තිබේ.

චන්දිමාල් සහ අවිශ්ක අවසන් වරට ක්‍රීඩා කළේ පසුගිය මාසයේ බංග්ලාදේශයට එරෙහිව පැවති T20 තරගාවලියේදීය.

සැප්තැම්බර් 9 වැනිදා එක්සත් අරාබි එමීර් රාජ්‍යයේ ආරම්භ වන ආසියානු කුසලාන තරගාවලියට පෙර කණ්ඩායම මුහුණ දෙන අවසන් තරග පෙළ ලෙස සිම්බාබ්වේ කණ්ඩායමට එරෙහිව T20 අන්තර්ජාතික තරග තුනකට ශ්‍රී ලංකාව සහභාගී වනු ඇත.

ශ්‍රී ලංකාව අද සිම්බාබ්වේ සංචාරය ආරම්භ කරන්නේ පළමු එක්දින තරගයෙන් වන අතර ඉරිදා දෙවැනි සහ අවසන් තරගය පැවැත්වෙනු ඇත.

තරඟ දෙකම ශ්‍රී ලංකා වේලාවෙන් දහවල් 12.30ට ආරම්භ වේ.

ශ්‍රී ලංකාව T20 තරගාවලිය සඳහා සාමාජිකයන් 17 දෙනෙකුගෙන් යුත් සංචිතයක් නම් කර ඇත.

එහි නුවනිදු ප්‍රනාන්දු, කමිල් මිෂාර, විෂේන් හැලඹගේ සහ දුෂාන් හේමන්ත ඇතුළත් වන අතර අනෙක් අය කණ්ඩායමේ නිත්‍ය ක්‍රීඩකයන් වේ.

නුවනිදු ප්‍රනාන්දු දැනටමත් සිම්බාබ්වේ හි ශ්‍රී ලංකා එක්දින සංචිතයේ සාමාජිකයකු වන අතර ශාන්ත පීතර විද්‍යාලයේ 20 හැවිරිදි පිතිකරුවකු වන හැලඹගේ ශ්‍රී ලංකා ක්‍රීඩකයන් අතර සිටින නවතම මුහුණයි.

ශ්‍රී ලංකා T20 සංචිතය මෙසේයි : චරිත් අසලංක (නායක), පැතුම් නිශ්ශංක, කුසල් මෙන්ඩිස්, කුසල් පෙරේරා, නුවනිදු ප්‍රනාන්දු, කමිඳු මෙන්ඩිස්, කමිල් මිෂාර, විශේන් හැලඹගේ, දසුන් ශානක, දුනිත් වෙල්ලාලගේ, චාමික කරුණාරත්න, මහීෂ් තීක්ෂණ, දුෂාන් හේමන්ත,දුෂ්මන්ත චමීර, බිනුර ප්‍රනාන්දු, නුවන් තුෂාර, මතීෂ පතිරණ