සුදුසුකම් ලත් ශ්‍රී ලාංකික තරුණ තරුණියන් සඳහා ජපානයේ විදුලි ඉංජිනේරු අංශයේ රැකියා අවස්ථා විවෘත කිරීම සඳහා අවබෝධතා ගිවිසුමක් ඊයේ (7) ශ්‍රී ලංකා විදේශ රැකියා කාර්යාංශයේදී අත්සන් කර ඇත.

ජපානය පදනම් කරගත් එන්ටර්ප්‍රයිස් යුනයිටඩ් කෝපරේටිව් සහ ශ්‍රී ලංකා විදේශ රැකියා ඒජන්සිය අතර මීට අදාළ ගිවිසුම අත්සන් කර තිබේ.

එන්ටර්ප්‍රයිස් යුනයිටඩ් කෝපරේටිව් හි සභාපති කසුහිරෝ හන්සාකි සහ ශ්‍රී ලංකා විදේශ රැකියා ඒජන්සියේ සභාපති ලාල් හෙට්ටිආරච්චි ඔවුන්ගේ අදාළ සංවිධාන වෙනුවෙන් අවබෝධතා ගිවිසුමට අත්සන් තබා ඇත.

ගිවිසුම යටතේ, ජාතික වෘත්තීය සුදුසුකම් (NVQ) සහිත, වයස අවුරුදු 20 ත් 28 ත් අතර සහ අ.පො.ස. උසස් පෙළ අධ්‍යයන කටයුතු සම්පූර්ණ කර ඇති ශ්‍රී ලාංකික සේවකයන් මෙම තනතුරු සඳහා සුදුසුකම් ලබයි.

ජපන් භාෂා ප්‍රවීණතාවය අමතර වාසියක් ලෙස සලකනු ලබන අතර, අවශ්‍ය වෘත්තීය සහ භාෂා පුහුණුව සඳහා ද අවබෝධතා ගිවිසුම මඟින් පහසුකම් සපයයි.

මෙම අවබෝධතා ගිවිසුම අත්සන් කිරීම සඳහා කැබිනට් මණ්ඩලය අනුමැතිය ලබා දී ඇත.

ජපන් භාෂාව සහ වෘත්තීය පුහුණුව ජාතික තරුණ සේවා සභාව (NYSC) යටතේ සපුගස්කන්ද වෘත්තීය පුහුණු මධ්‍යස්ථානයේදී පවත්වනු ලැබේ.

සුදුසුකම් ලත් අපේක්ෂකයින් තෝරාගැනීම NYSC, වෘත්තීය පුහුණු අධිකාරිය (VTA), NAITA, තාක්ෂණික අධ්‍යාපන හා පුහුණු අධිකාරිය (TETA) සහ ශ්‍රී ලංකා විදේශ රැකියා කාර්යාංශය විසින් කාර්යාංශයේ ලියාපදිංචි රැකියා බැංකුවෙන් ලබාගනු ලැබේ.

සියලුම බඳවාගැනීම් රජයේ වැඩසටහනට අනුකූලව ශ්‍රී ලංකා විදේශ රැකියා ඒජන්සිය විසින් පවත්වනු ලැබේ.