May 14, 2025
මෙරට කැනේඩියානු මහකොමසාරිස්වරයා අද විදේශ කටයුතු අමාත්‍යංශය වෙත කැඳවා තිබිණි.
ඒ කැනඩාවේදී දෙමළ ජනසංහාර ස්මාරකයක් ඉදිකිරීම සම්බන්ධයෙන් රජයේ විරෝධය දැක්වීම සඳහාය.
ඒ අනුව මෙම කාරණය සම්බන්ධයෙන් විදේශ අමාත්‍ය විජිත හේරත් අද මෙරට කැනේඩියානු මහ කොමසාරිස්වරයා හමුවී, පදනම් විරහිත ජන සංහාර චෝදනා සහ එවැනි ස්මාරකයක් ඉදිකිරීමට අනුමැතිය දීම සම්බන්ධයෙන් ශ්‍රී ලංකා රජයේ දැඩි විරෝධය පළ කළ බව විදේශ කටයුතු අමාත්‍යංශය නිවේදනයක් කරයි.
එමෙන්ම එම නිවේදනය මගින් විදේශ අමාත්‍යංශය, කැනඩාවේදී දෙමළ ජනසංහාර ස්මාරකයක් ඉදිකිරීම සම්බන්ධයෙන් රජයේ ස්ථාවරය පිළිබඳව ද සඳහන් කර තිබේ.
එහි දැක්වෙන්නේ කැනඩාවේදී දෙමළ ජනසංහාර ස්මාරකයක් ඉදිකිරීම සම්බන්ධයෙන් විරෝධය පළ කරන බව සහ පදනම් විරහිත ජන සංහාර චෝදනා ශ්‍රී ලංකා රජය තරයේ ප්‍රතික්ෂේප කරන බවයි.
කැනඩාව මැතිවරණ වාසි ලබාගැනීම සඳහා මෙවැනි ක්‍රියාමාර්ගවල නිරත වන බවට ද එම නිවේදනයේ දක්වා තිබේ.
එමෙන්ම අදාළ නිවේදනයෙන් විදේශ කටයුතු අමාත්‍යංශය සිදුකර ඇති පැහැදිළි කිරීම පහත පරිදි වේ.
”ශ්‍රී ලංකාවේ පැවැති යුධ ගැටුම්වල අවසාන අදියරේදී ජන සංහාරයක් සිදු කළ බවට එල්ල වන චෝදනාව ජාතික හෝ ජාත්‍යන්තර වශයෙන් කිසිදු විශ්වසනීය අධිකාරියක් විසින් සනාථ නො‍කරන ලද බවත්, එය නොමඟ යවන තොරතුරු මත පදනම් වූවක් බවත් ශ්‍රී ලංකා රජය පවසයි. ශ්‍රී ලංකාව මෙම අසත්‍ය ආඛ්‍යානය තරයේ ප්‍රතික්ෂේප කරන අතර එය ප්‍රධාන වශයෙන් කැනඩාව තුළ මැතිවරණ වාසි ලබා ගැනීම සඳහා ප්‍රචාරය කර ඇති බවට විශ්වාස කරයි.
ශ්‍රී ලංකාවේ ජන සංහාරයක් සිදු කළ බවට කිසිදු අනාවරණය කර ගැනීමක් කැනඩා රජය විසින් සිදු කර නොමැති බව 2021 වසරේ අප්‍රේල් මාසයේදී කැනඩාවේ විදේශ කටයුතු, වෙළෙඳ හා සංවර්ධන දෙපාර්තමේන්තුව නිල වශයෙන් තහවුරු කළේය.
ඊට අමතරව, කැනඩාව විසින් 2006 වසරේදී දෙමළ ඊළාම් විමුක්ති කොටි, ත්‍රස්තවාදී සංවිධානයක් ලෙස නම් කරනු ලැබූ අතර 2024 වසරේ ජුනි මාසයේදී මෙම නාමය නැවත තහවුරු කරන ලදී.
කැනඩාවේ බ්‍රැම්ප්ටන් නුවර චින්ගුඅකවුසි උද්‍යානයේ ඊනියා දෙමළ ජන සංහාර ස්මාරකයක් ඉදිකිරීම සම්බන්ධයෙන් ශ්‍රී ලංකා රජය පුන පුනා දැඩි විරෝධතා පළ කර ඇත. බ්‍රැම්ප්ටන් නගර සභාවේ මෙම කණගාටුදායක මුලපිරීම වැළැක්වීමට මැදිහත් වන ලෙස කැනඩා ෆෙඩරල් රජයෙන් නිරන්තරයෙන් ඉල්ලීම් සිදු කරනු ලැබිණි.
මෙම ඉදිකිරීම, පුළුල් ශ්‍රී ලාංකික සහ කැනේඩියානු ප්‍රජාවන්ට අහිතකර බලපෑමක් ඇතිකරන්නක් බවට ශ්‍රී ලංකාව සලකයි.
එවැනි පදනම් විරහිත චෝදනා ප්‍රචාරය කිරීම සහ අසත්‍ය මත පදනම් වූ ස්මාරක ඉදිකිරීම මහජනතාව නොමඟ යැවීම පමණක් නොව, සියලු ප්‍රජාවන් අතර සංහිඳියාව, ජාතික සමගිය සහ චිරස්ථායී සාමය සඳහා ගනු ලබන ශ්‍රී ලංකාවේ සැබෑ ප්‍රයත්නයන්ට බාධාවක් වන බව ශ්‍රී ලංකාව තරයේ විශ්වාස කරයි.” යනුවෙන් අදාළ නිවේදනයේ දැක්වේ.
”මෙවන් ක්‍රියා හේතුවෙන් සංහිඳියාව සහ ජාතික සමගිය සඳහා වූ රජයේ ප්‍රයත්න සංකීර්ණභාවයට පත්වන අතර, හෑල්ලුවට ද ලක්වේ.” යනුවෙන් ද විදේශ කටයුතු අමාත්‍යාංශය විසින් නිකුත් කර ඇති එම නිවේදනයේ වැඩිදුරටත් සඳහන් වේ.
