වසර 500කට පමණ පසු ඉංග්‍රීසි රජ කෙනෙකු සහ කතෝලික පාප්වරයකු ඒකාබද්ධව යාච්ඤාවකට එක්වූ අවස්ථාවක් ඊයේ වාර්තා විය.

ඒ බ්‍රිතාන්‍යයේ චාල්ස් රජු සහ ලියෝ පාප් වහන්සේ වතිකානුවේ සිස්ටයින් දේවස්ථානයේදී එකට යාච්ඤා කළ මොහොතයි.

1534 දී අටවැනි හෙන්රි රජු රෝමයෙන් වෙන්ව ගිය පසු බ්‍රිතාන්‍ය රජ කෙනෙකු සහ කතෝලික පාප්වරයකු ඒකාබද්ධව යාච්ඤාවකට සහභාගී වූ පළමු අවස්ථාව විය.

ක්‍රිස්තුස් වහන්සේ අවසාන විනිශ්චය ප්‍රකාශ කරන ආකාරය නිරූපණය කරන මයිකල්ඇන්ජලෝගේ බිතුසිතුවම් ඉදිරිපිට පැවැත් මෙම යාච්ඤාවේ දී ලතින් ගීතිකා සහ ඉංග්‍රීසි යාච්ඤා දේවස්ථානය හරහා දෝංකාර දුන්නේය.

ලියෝ පාප්තුමන් සහ ඇන්ග්ලිකන් අගරදගුරු ස්ටීවන් කොට්‍රෙල් සිස්ටයින් දේවස්ථානයේ ගායනා කණ්ඩායම සහ රාජකීය ගායනා කණ්ඩායම් දෙක ඇතුළත් දේව මෙහෙයේ දී දේවස්ථානයේ පූජාසනය අසල පාප්තුමාගේ වම් පසින් එංගලන්ත පල්ලියේ උත්තරීතර ප්‍රධානියා වන චාල්ස් අසුන්ගෙන සිටියේය.

චාල්ස් අවසන් පාප්වරුන් තිදෙනා හමුවී ඇති අතර, දෙවැනි ජුවාන් පාවුළු සහ XVI වැනි බෙනඩික්ට් පාප්වරුන් බ්‍රිතාන්‍යයට ගියද, ඔවුන්ගේ පෙර හමුවීම්වලට කිසි විටෙකත් ඒකාබද්ධ යාච්ඤා ඇතුළත් නොවීය.

එවක රජුගේ කැළඹිලි සහිත වෙන්වීමෙන් සියවස් පහකට පසු කතෝලික පල්ලිය සහ ඇන්ග්ලිකන් හවුල අතර සමීප සබඳතා සනිටුහන් කරමින් රජු සහ කැමිලා රැජින වතිකානුවට රාජ්‍ය සංචාරයක යෙදී සිටිති.

“මෙය පරම්පරාවකට පෙර කළ නොහැකි දෙයක් වුණා. පසුගිය වසර 60ක සංවාදය තුළ අපගේ පල්ලි කොතරම් දුරක් පැමිණ ඇත්ද යන්න එයින් නිරූපණය වනවා,” වෙස්ට්මිනිස්ටර් ඇබේ හි කැනන් දේවධර්මාචාර්ය ඇංග්ලිකන් පූජක ජේම්ස් හෝකි රොයිටර්ස් පුවත් සේවයට පැවසීය.

යෝර්ක්හි ඇංග්ලිකන් අගරදගුරු කොට්‍රෙල්, සාරා මුල්ලලි වෙනුවෙන් සිස්ටයින් දේවස්ථානයේ සේවයේ නිරත විය.

ඇංග්ලිකන් හවුලෙහි අධ්‍යාත්මික ප්‍රධානියා වන කැන්ටබරි අගරදගුරු ලෙස සේවය කළ පළමු කාන්තාව ලෙස ඇය මෑතකදී ප්‍රකාශයට පත් කරන ලද නමුත් ලබන වසර දක්වා එම භූමිකාව භාර නොගනු ඇත.

අටවැනි ක්ලෙමන්ට් පාප් වහන්සේ විසින් ඇරගොන්හි කැතරින් සමඟ අටවැනි හෙන්රි රජුගේ විවාහය අවලංගු කිරීම ප්‍රතික්ෂේප කිරීමෙන් පසුව, කතෝලික පල්ලිය සහ එංගලන්ත පල්ලිය අතර භේදය 1534 දී ඇතිවිය.

පිරිමි උරුමක්කාරයකු සඳහා හෙන්රිගේ ආශාව සහ පුතෙකු ලබා දිය හැකි නව බිරිඳක් ක්ෂණික උත්ප්‍රේරකය වූ නමුත්, ඉංග්‍රීසි ඔටුන්න පල්ලියේ වත්කම් අත්පත් කර ගැනීම සහ එංගලන්තයේ රෙපරමාදු අදහස් වර්ධනය කිරීම ඇතුළු අනෙකුත් සාධක ද මීට හේතු විය.

හෙන්රිගේ දියණියන් වන I වැනි මේරි සහ I වැනි එලිසබෙත්ගේ පාලන සමයේදී එංගලන්තය කතෝලික ධර්මය සහ රෙපරමාදු ආගම අතර දෝලනය වෙමින් සිටියදී, කතෝලිකයන් සහ රෙපරමාදු භක්තිකයන් සිය ගණනක් ඔවුන්ගේ ඇදහිල්ල වෙනුවෙන් මරණ දඬුවම නියම කරන ලදී.

චාල්ස් සහ කැමිලා ඊයේ උදෑසන ලියෝ පාප්තුමන් සමඟ පෞද්ගලික හමුවක් ද පැවැත්වූහ.

කතෝලික ධර්මයේ වඩාත්ම ගෞරවනීය පල්ලි හතරෙන් එකක් වන රෝමයේ ශාන්ත පාවුළු බැසිලිකාව වෙත ද රජු ගමන් කරනු ඇත.

එහිදී ලියෝ පාප්තුමන් ඔහුට සම්බන්ධිත ආරාමයේ ‘රාජකීය කොන්ෆ්‍රේටර්’ හෝ සහෝදරයා යන නව පදවියක් ලබා දීමට අනුමත කර ඇත.

බැසිලිකාවේ උඩුමහලේ විශේෂ ආසනයක් ද චාල්ස්ට පිරිනමනු ලැබේ.

බ්‍රිතාන්‍ය රජවරුන්ට පමණක් භාවිත කිරීම සඳහා අනාගතයේදී වෙන් කර ඇති ලී පුටුව, රජුගේ ලාංඡනයෙන් සහ “Ut unum sint” (ඔවුන් එකක් විය හැකි බව) යන සර්වාගමික ආදර්ශ පාඨයෙන් සරසා ඇත.

වතිකානුවේ නිල ඇංග්ලිකන් නියෝජිත බිෂොප් ඇන්තනි බෝල් පැවසුවේ මෙම ගෞරව පල්ලි දෙකම හවුල් අනාගතයක් සඳහා වැඩ කිරීමට ඇති කැපවීම පෙන්නුම් කරන බවයි.

බකිංහැම් මාලිගය ඊයේ නිවේදනය කළේ චාල්ස් රජු ලියෝ පාප්තුමන් වෙනුවෙන් බ්‍රිතාන්‍ය ගෞරව දෙකක් ද අනුමත කර ඇති බවයි.

ඔහුව වින්ඩ්සර් මාලිගයේ ශාන්ත ජෝර්ජ් දේවස්ථානයේ ‘පාප් කොන්ෆ්‍රේටර්’ බවට පත් කිරීම සහ ඔහුට ‘නයිට් ග්‍රෑන්ඩ් ක්‍රොස් ඔෆ් ද ඕඩර් ඔෆ් ද බාත්’ සම්මානය ප්‍රදානය කිරීම රජු විසින් අනුමත කර තිබේ.

එංගලන්ත පල්ලිය යනු රටවල් 165ක් පමණ එක්ව ඇංග්ලිකන් හවුල පිහිටුවන ස්වාධීන පල්ලි 46න් එකකි.

සාමාජිකයන් බිලියන 1.4ක් සිටින කතෝලික පල්ලිය සහ සාමාජිකයන් මිලියන 85ක් සිටින ඇංග්ලිකන් හවුල 1960 ගණන්වල සිට ඔවුන්ගේ සබඳතා වැඩිදියුණු කර ගෙන ඇත.

සම්ප්‍රදායන් දෙකෙහි ඉගැන්වීම් බොහෝ ප්‍රධාන කාරණා සම්බන්ධයෙන් සමපාත වන නමුත් කතෝලික පල්ලිය කාන්තාවන් පැවිදි නොකරන අතර සාමාන්‍යයෙන් පූජකයන්ට විවාහ වීමට ඉඩ නොදේ.