මතභේදාත්මක යාපනය දිස්ත්‍රික් පාර්ලිමේන්තු මන්ත්‍රී අර්චුනා රාමනාදන් අද පාර්ලිමේන්තුවේදී තවත් උණුසුම් වචන හුවමාරුවකට සම්බන්ධ වූ අතර, තමාට කතා කිරීමට අවස්ථාව අහිමි කරන බවට චෝදනා කළේය.

පසුගිය ජනවාරි 20 වන දින අනුරාධපුර පොලිසිය විසින් ඔහුව නවතා නිල පාර්ලිමේන්තු හැඳුනුම්පතක් ඉදිරිපත් කිරීමට නොහැකි වීමෙන් පසු ඔහුගේ අයිතිවාසිකම්වලට බාධා එල්ල කළ බව මන්ත්‍රීවරයා පැවසීය.

තම නීතිඥවරයා සමඟ යාපනයේ සිට කොළඹට ගමන් කරමින් සිටියදී රථවාහන නිලධාරීන් ඔහුගේ වාහනයට බාධා කර පැහැදිලි හේතුවක් ලබා නොදී හැඳුනුම්පතක් ඉල්ලා සිටි බව ඔහු සඳහන් කළේය.

පාර්ලිමේන්තු ලාංඡනය සහිත ‘නිල බලපත්‍රයක්’ ඉදිරිපත් කිරීමට තමාඋත්සාහ කළ නමුත් නිලධාරීන් එය පිළිගත්තේ නැතැයි රාමනාදන් මන්ත්‍රීවරයා පැවසීය.

මෙම සිද්ධිය ඔහුගේ පාර්ලිමේන්තු වරප්‍රසාද උල්ලංඝනය කිරීමක් ලෙස හැඳින්වූ රාමනාදන් මන්ත්‍රීවරයා, නිසි හැඳුනුම්පතක් නිකුත් කිරීමට අපොහොසත් වීම සම්බන්ධයෙන් පාර්ලිමේන්තුව විවේචනය කළේය.

“මාස දෙකකට පසු, මා සතුව තිබූ එකම ලේඛනය මෙය වීම ලැජ්ජාවට කරුණක්. 21 වන දින හැඳුනුම්පතක් හෝ පාර්ලිමේන්තු අවසර පත්‍රයක් ලබා දුන්නේ නැහැ. මෙම සිදුවීමෙන් පසුව, 22 වන දින උදෑසන එය මට ලබාදී තිබෙනවා ”ඔහු ප්‍රකාශ කළේය.

රාමනාදන් සිය විරෝධතාවය දිගටම කරගෙන යද්දී, පාර්ලිමේන්තු මන්ත්‍රී දයාසිරි ජයසේකර, මෙම මන්ත්‍රීවරයා පාර්ලිමේන්තුවට අපහාස කළ බවට චෝදනා කළේය.

“ඔහුට මානසික ආබාධයක් තිබෙනවා. අපි ඔහුව වෛද්‍යවරයෙකු වෙත යැවිය යුතුයි. මෙය දිගටම කරගෙන යාමට ඉඩදෙන්න එපා” ජයසේකර මන්ත්‍රීවරයා කථානායකවරයාගෙන් ඉල්ලා සිටියේය.

මේ අතර, සභානායක බිමල් රත්නායක පැවසුවේ රාමනාදන්ගේ කතාකිරීමේ අයිතිය ලබාදීම විපක්ෂයේ වගකීමක් බවයි.

එහිදීම, රාමනාදන් මන්ත්‍රීවරයා ඉදිරිපත් කළ අදාළ කාරණයට සම්බන්ධ නොවන කරුණු හැන්සාඩ් වාර්තාවෙන් ඉවත් කරන ලෙසද කථානායකවරයා උපදෙස් දුන්නේය.