අල්ලස් හෝ දූෂණ චෝදනා විමර්ශන කොමිෂන් සභාව විසින් පසුගිය වසරේ අල්ලස් හා දූෂණ චෝදනා යටතේ පුද්ගලයන් හතළිස් එක් දෙනෙකු වරදකරුවන් කර තිබේ.

ඔවුන්ගෙන් වැඩි දෙනෙක් ප්‍රාදේශීය කාර්යාලවලට අනුයුක්තව සේවය කළ සුළු සේවකයන් බව කොමිසමේ ප්‍රගති වාර්තාවක සඳහන් වේ.

පසුගිය වසරේ ජනවාරි 1 සිට නොවැම්බර් 30 දක්වා කාලයට අදාළ අල්ලස් හෝ දූෂණ චෝදනා විමර්ශන කොමිෂන් සභා වාර්තාවට අනුව, චෝදනා 35ක් හරහා 41 දෙනෙකු වරදකරුවන් කර තිබේ.

බොහෝ වැරදිකරුවන් සනීපාරක්ෂක කම්කරු, රේඛීය සේවක, පශු වෛද්‍ය නිලධාරි සහ පොලිස් කොස්තාපල් වැනි තනතුරුවල සිට ගොවිජන සංවර්ධන නිලධාරි දක්වා සුළු සේවකයන් වේ.

පසුගිය වසරේ නොවැම්බර් 30 වැනිදා වන විට මහාධිකරණවල නඩු 270ක්, මහේස්ත්‍රාත් අධිකරණවල නඩු 16ක් සහ ත්‍රිපුද්ගල මහාධිකරණයක් ඉදිරියේ එක් නඩුවක් විභාග වෙමින් පැවතිණි.

පසුගිය වසරේ පමණක් කොමිසමට වාර්තාගත පැමිණිලි 7,811ක් ලැබුණු අතර, ඉන් පැමිණිලි 439ක් පමණක් වැඩිදුර විමර්ශන සඳහා යොමුකර තිබේ.

ප්‍රගති වාර්තාවට අනුව අවම වශයෙන් පැමිණිලි 2,546ක් තවදුරටත් විමර්ශනය සඳහා ඉතිරිව ඇත.

කොමිසම විසින් සිදුකරන ලද මුළු වැටලීම් 119න් 61ක් ඵලදායී ඒවා බවට පත් වූ අතර එහිදී පුද්ගලයන් 76 දෙනෙකු අත්අඩංගුවට ගෙන තිබිණි.

එම කාලය තුළ නඩු පැවරීම් හේතුවෙන් මහාධිකරණ විසින් නියම කරන ලද දඩ මුදල් ලෙස රජයට ලැබුණු මුළු ආදායම රු. 1,565,500ක් සහ මහාධිකරණය විසින් දණ්ඩනය යටතේ කළ අයකිරීම් ලෙස රු. 1,056,000ක් පමණ වේ.

මහාධිකරණය විසින් නියම කරන ලද රුපියල් 18,000ක වන්දි මුදලට අමතරව, අධිකරණ හරහා ද රුපියල් 150,000ක් රාජසන්තක කරන ලද අතර මහේස්ත්‍රාත් අධිකරණ හරහා රුපියල් 30,000ක් දඩයක් ලෙස නියම කර තිබිණි.