අපනයන සඳහා පනවා ඇති තීරුබදු සම්බන්ධයෙන් ඇමරිකා එක්සත් ජනපදය සමඟ සාකච්ඡා කිරීමේ ඊළඟ අදියර සඳහා ශ්‍රී ලංකාවට ආරාධනා කර ඇති බව මුදල් හා සැලසුම් නියෝජ්‍ය අමාත්‍ය ආචාර්ය හර්ෂණ සූරියප්පෙරුම පවසයි.

ඊයේ (8) පාර්ලිමේන්තුවේදී අදහස් දක්වමින් ඔහු පැවසුවේ, ශ්‍රී ලංකාව ඇමරිකා එක්සත් ජනපදය සමඟ කාලෝචිත සාකච්ඡාවලට සම්බන්ධවීමට හැකි වූ බැවින් සාකච්ඡාවල සතුටුදායක ප්‍රගතියක් ඇති බවයි.

අප්‍රේල් 2 වැනි දින, එක්සත් ජනපද ජනාධිපති ඩොනල්ඩ් ට්‍රම්ප් සිය වෙළඳ හවුල්කරුවන් 180 දෙනකු සඳහා අන්‍යෝන්‍ය තීරුබදු ප්‍රකාශයට පත්කළ අතර, එහිදී ශ්‍රී ලංකාව ඇමරිකා එක්සත් ජනපදයට කරන අපනයන සඳහා 44% ක තීරුබද්දක් පැනවූ නමුත්, පසුව චීනය හැර අනෙක් සියලු රටවල් වෙනුවෙන් දින 90 කට තීරුබදු අත්හිටුවන සහනයක් ප්‍රකාශයට පත්කළේය.

ඇමරිකා එක්සත් ජනපදය දිගු කලක් තිස්සේ ශ්‍රී ලංකාවේ වැදගත්ම අපනයන ගමනාන්තය වී ඇති අතර එය 2024 දී මුළු වෙළඳ භාණ්ඩ අපනයනයෙන් 23% ක් විය.

ශ්‍රී ලංකාව 2024 දී ඇමරිකා එක්සත් ජනපදයට ඩොලර් බිලියන 3.4 ක් වටිනා භාණ්ඩ අපනයනය කළ අතර ඉන් 70% ක් ඇඟලුම් අංශයෙන් වන අතර, පසුගිය වසරේ ඇමරිකා එක්සත් ජනපදයෙන් ශ්‍රී ලංකාව ආනයනය කළ භාණ්ඩ ප්‍රමාණය ඩොලර් මිලියන 368.2 කි.

ශ්‍රී ලංකාව පාර්ශ්වයෙන් සිදුකෙරෙන කටයුතු සහ එක්සත් ජනපදය සමඟ තීරුබදු සහ තීරුබදු නොවන සාකච්ඡාවලට සම්බන්ධ වීමට බලාපොරොත්තු වන ආකාරය පිළිබඳව ජනාධිපති අනුර කුමාර දිසානායක ඇමරිකානු ජනාධිපතිවරයා සමඟ ලිපි හුවමාරු කර ගත් බව නියෝජ්‍ය ඇමැති සූරියප්පෙරුම පැවැසීය.

ශ්‍රී ලංකාව එක්සත් ජනපද වෙළඳ නියෝජිත කාර්යාලය සමඟ භෞතික සාකච්ඡා වට දෙකක් සාර්ථකව අවසන් කළ බවත්, මේ වන විට කැබිනට් අනුමැතිය ලබාගනිමින් පවතින ඊළඟ සාකච්ඡා වටය සඳහා ආරාධනා කර ඇති බවත් ඔහු පැවසීය.

සාකච්ඡාවලින් රජය අපේක්ෂා කරන ප්‍රතිඵලය වන්නේ කලාපයේ තරඟකරුවන්ට වඩා අපනයනකරුවන්ට තිබූ තරඟකාරී වාසිය පවත්වා ගැනීම බව ඔහු තවදුරටත් සඳහන් කළේය.