June 21, 2025
රුපියල් මිලියන 154ක වටිනාකමකින් යුත් නවතම ගැමා කැමරා ඒකකයක් (න්‍යෂ්ටික රූපකරණ ඒකකයක්) කොළඹ රිජ්වේ ආර්යා ළමා රෝහලේ ස්ථාපනය කර තිබේ.
විශේෂයෙන් ළමුන්ගේ වකුගඩු රෝග සඳහා රෝග විනිශ්චය සේවා වැඩිදියුණු කිරීම සඳහා මෙම යන්ත්‍රය ඉවහල් වේ.
උසස් තාක්ෂණයක් සහිත මෙම උපකරණය සඳහා අරමුදල් සපයන ලද්දේ සෞඛ්‍ය අමාත්‍යාංශය විසිනි.
සෞඛ්‍ය අමාත්‍යාංශ ලේකම් වෛද්‍ය අනිල් ජාසිංහගේ ප්‍රධානත්වයෙන් මෙම උපකරණය ඊයේ නිල වශයෙන් වෛද්‍ය සේවාවන්ට ඒකාබද්ධ කරන ලදී.
මෙම නවීන රෝග විනිශ්චය ඒකකය වසර 20ක් පැරණි ගැමා කැමරාවක් ප්‍රතිස්ථාපනය කරනු ලබයි.
එම පැරණි යන්ත්‍රය නිතර අක්‍රිය වූ අතර, බිඳවැටීම්වලදී තීරණාත්මක ස්කෑන් සඳහා ජාතික රෝහල මත යැපීමට සිදුවිය.
මෑතකදී සිදු කළ පරීක්ෂණ සංචාරයකදී රෝහල් කාර්ය මණ්ඩලය අවශ්‍යතාව මතු කිරීමෙන් පසු නව ඒකකයක් ස්ථාපනය කිරීම කඩිනම් කරන ලෙස සෞඛ්‍ය අමාත්‍ය නලින්ද ජයතිස්ස මීට පෙර නිලධාරීන්ට උපදෙස් දී තිබිණි.
මෙම උපදෙස් අනුගමනය කරමින්, නව පද්ධතිය රිජ්වේ ආර්යා ළමා රෝහලේ සාර්ථකව ස්ථාපනය කර ක්‍රියාත්මක කරන ලදී.
කොළඹ ජාතික රෝහල, කරාපිටිය ශික්ෂණ රෝහල සහ පේරාදෙණිය ශික්ෂණ රෝහල ඇතුළු අනෙකුත් ප්‍රධාන රාජ්‍ය රෝහල්වල ද මෙවැනිම ගැමා කැමරා ඒකක ක්‍රියාත්මක වන අතර, රෝගී සත්කාරයේ කාර්යක්ෂමතාවට ඒවා සැළකිව යුතු ලෙස සහාය වේ.
නව ගැමා කැමරාව නිවැරදි හා කාර්යක්ෂම රෝග විනිශ්චය සේවා සපයනු ඇති බවත්, රට පුරා සිටින ළමුන් සඳහා ප්‍රතිකාර ප්‍රතිඵල වැඩිදියුණු කරන බවත් විකිරණවේදිනියක වන වෛද්‍ය නයනා සමරසිංහ සඳහන් කළාය.
මෙම තීරණාත්මක අවශ්‍යතාව සපුරාලීම සම්බන්ධයෙන් සෞඛ්‍ය අමාත්‍යවරයාට සහ රජයට රිජ්වේ ආර්යා ළමා රෝහලේ අධ්‍යක්ෂ වෛද්‍ය ප්‍රදීප් විජේසිංහ විශේෂ ස්තූතිය පළ කළ අතර, නව තාක්‍ෂණය රට පුරා සිටින දරුවන්ට උසස් තත්ත්වයේ රෝග විනිශ්චය සහ සත්කාර ලබා දීමට උපකාරී වන බව පැවසීය.
විශේෂඥයන්, වෛද්‍යවරුන් සහ හෙදියන් ඇතුළු වෛද්‍ය වෘත්තිකයන් කණ්ඩායමක් නව උපකරණ නිල වශයෙන් ක්‍රියාත්මක කිරීමේ අවස්ථාවට සහභාගී වූහ.
