දිට්වා සුළි කුණාටුව පිළිබඳ කලින් අනතුරු අඟවා තිබියදීත්, සුළි කුණාටුවෙන් සිදුවන හානිය සීමා කිරීමට බලධාරීන් අපොහොසත් වීම හේතුවෙන් තම මූලික අයිතිවාසිකම් උල්ලංඝනය වී ඇති බවට අධිකරණයෙන් තීන්දු කරන ලෙස ඉල්ලා මහනුවර පදිංචි නීතිඥයකු ගොනු කළ මූලික අයිතිවාසිකම් පෙත්සමක් සළකා බැලීම සඳහා ශ්‍රේෂ්ඨාධිකරණය විසින් ජූලි 15 වැනිදාට නියම කර ඇත.

කැබිනට් මණ්ඩලයේ, ශ්‍රී ලංකා මහවැලි අධිකාරියේ සහ ආපදා කළමනාකරණ කමිටුවේ සාමාජිකයන් ඇතුළු වගඋත්තරකරුවන් කිහිප දෙනෙකුට නැවත නොතීසි නිකුත් කරන ලෙස ද අධිකරණය නියෝග කළේය.

අගවිනිසුරු ප්‍රීති පද්මන් සූරසේන සහ විනිසුරු අචල වෙන්ගප්පුලිගෙන් සමන්විත විනිසුරු මඩුල්ල ඉදිරියේ පෙත්සම කැඳවූ විට, පෙත්සම්කරු වෙනුවෙන් පෙනී සිටි ජනාධිපති නීතිඥ උපුල් ජයසූරිය අධිකරණයට පැවසුවේ කාලගුණ විද්‍යා දෙපාර්තමේන්තුව නොවැම්බර් 12 වැනිදා සිට වැසි සහිත කාලගුණයේ වැඩිවීමක් පුරෝකථනය කර ඇති නමුත් නොවැම්බර් 27 වැනිදා රාත්‍රී 11.10ට පමණ හදිසියේම කොත්මලේ ජලාශයේ වාන් දොරටු විවෘත කිරීමට පෙර බලධාරීන් එම අනාවැකි නොසළකා හැරි නිසා නොවැම්බර් 27 වැනිදා රාත්‍රී 11.10ට පමණ කොත්මලේ ජලාශයේ වාන් දොරටු හදිසියේම විවෘත කළ බවයි.

නිසි අනතුරු ඇඟවීමක් ලබා දී තිබියදීත් බලධාරීන් තම රාජකාරිය නොසළකා හැර ඇති බව ඔහු සඳහන් කර තිබිණි.

මහනුවර අධිකරණ සංකීර්ණයට යාබදව සිය කාර්යාලය පිහිටා ඇති බවත් ගංවතුර හේතුවෙන් තම කාර්යාලය සම්පූර්ණයෙන්ම විනාශ වූ බවත්, එමඟින් තම වෘත්තීය කටයුතු කරගෙන යෑමට නොහැකි වී ඇති බවත් පෙත්සම්කරු පවසයි.

ජලාශවලින් ජලය මුදා හැරීමට පෙර අනතුරු ඇඟවීමක් කර තිබුණේ නම්, හානිය අවම කර ගැනීමට අවස්ථාවක් තිබූ බවත්, වගඋත්තරකරුවන්ගේ නොසැළකිල්ල හේතුවෙන් තම මූලික අයිතිවාසිකම් උල්ලංඝනය වී ඇති බවත් ඔහු තවදුරටත් කියා සිටියේය.

වගඋත්තරකරුවන් වෙනුවෙන් ජ්‍යෙෂ්ඨ රජයේ නීතිඥ සබ්රිනා අහමඩ් පෙනී සිටියාය.