ධර්මය විකෘති කිරීම සහ සංඝ ශාසනයේ විනය කඩකිරීම හේතුවෙන් බදුලුගම්මන සුමනසාර භික්ෂුව බිබිල නාගල රජමහා විහාරාධිපති ධුරයෙන් ඉවත්කර මල්වතු පාර්ශ්වයෙන් නෙරපාහැර තිබේ.

ඒ සම්බන්ධයෙන් මල්වතු පාර්ශ්වයේ මහාලේකම් ආචාර්ය පූජ්‍ය පහමුණේ සුමංගල හිමියන් විසින් නිකුත් කළ නිවේදනයේ සඳහන් වන්නේ, සුමනසාර හිමියන් වෙල්ලස්ස – බින්තැන්න සහ නැගෙනහිර පළාතේ ප්‍රධාන සංඝනායක ලෙස මහා සංඝරත්නයේ උතුම් සම්ප්‍රදාය කඩකිරීම හේතුවෙන්, 2024 මැයි මස 04 වැනි දින රැස් වූ මල්වතු පාර්ශ්වයේ කාරක සංඝ සභාව විසින් ඉවත් කිරීමට තීරණය කළ බවයි.

“කෙසේවෙතත්, 2024 අගෝස්තු 11 වැනි දින උන්වහන්සේ කාරක සංඝ සභාව ඉදිරියට කැඳවා සංඝ ශාසනයේ සම්මතයන් සහ බෞද්ධ භික්ෂූන්ගේ විනය දැඩි ලෙස පිළිපැදීමට අවවාද කරන ලදී. කාරක සංඝ සභාව සමඟ උන්වහන්සේ එකඟවුවද, බෞද්ධ භික්ෂුවකට නොගැලපෙන ක්‍රියාකාරකම්වල නිරත වූ අතර සංඝ ශාසනයේ සම්ප්‍රදායන් සහ බුදුන්ගේ දේශනා විකෘති කරමින් “සීහෙල ගෞතම ශ්‍රී සම්බුද්ධ මහා නිකාය” නමින් උන්වහන්සේගේ දෘෂ්ටිවාදය මත පදනම් වූ නව නිකායක් පවා පිහිටුවාගත්තේය.” යනුවෙන්ද නිවේදනයේ සඳහන් වේ.

මල්වතු මහානායක තිබ්බොටුවාවේ ශ්‍රී සිද්ධාර්ථ සුමංගල හිමියන්ගේ ප්‍රධානත්වයෙන් යුත් කාරක සංඝ සභාව, සුමනසාර හිමියන් උන්වහන්සේගේ තනතුරුවලින් ඉවත්කිරීමට සහ මල්වතු පාර්ශවයෙන් නෙරපාහැරීමට තීරණය කළ බව මාධ්‍ය නිවේදනයේ වැඩිදුරටත් සඳහන් වේ.