අමෙරිකා එක්සත් ජනපදය විසින් ශ්‍රී ලංකාව මත පනවා ඇති අන්‍යෝන්‍ය තීරුබදු අනුපාතය 20% දක්වා අඩු කිරීම විපක්ෂ නායක සජිත් ප්‍රේමදාස අගය කර තිබේ.

‘X’ සමාජ මාධ්‍ය වේදිකාවේ තැබූ සටහනක දී, මන්ත්‍රී ප්‍රේමදාස පැවසුවේ මෙය ශ්‍රී ලංකාව වියට්නාමය සහ බංග්ලාදේශය සමඟ ස්ථානගත කරන බවයි.

ඉන්දියාවට 25%ක තීරුබදු පනවා ඇත.

“අමෙරිකා එක්සත් ජනපදය ශ්‍රී ලංකාවේ භාණ්ඩ සඳහා තීරුබදු 20% දක්වා අඩු කිරීම ගැන සතුටුයි. වියට්නාමය සහ බංග්ලාදේශය සමඟ අප සම වන අතර ඉන්දියාවට 25%ක් ගෙවන්න සිදුවනවා. අපගේ අපනයනකරුවන්ට සැබෑ සහනයක් ලබා දීම සඳහා අපි බදු15%ට අඩු කර ගන්න ඉලක්ක කර ගත යුතුයි. සාකච්ඡා ඉදිරියට ගෙන යෑමට නායකත්වය දීම සඳහා අපට වෙළඳ ආර්ථික විද්‍යාඥයන් කණ්ඩායමක් සිටිය යුතුයි, ” යනුවෙන් ඔහු තවදුරටත් පැවසීය.

ශ්‍රී ලංකාවේ අන්‍යෝන්‍ය තීරුබදු අනුපාතය 20%ක් වන බව එක්සත් ජනපදය අද නිල වශයෙන් තහවුරු කිරීමෙන් පසුව විපක්ෂ නායකවරයා මෙම අදහස් පළ කර තිබේ.

එය විධායක නියෝගය 14257 යටතේ කලින් පනවා තිබූ 30% සිට 20% අඩු කිරීමකි.

එක්සත් ජනපද වෙළඳ බලධාරීන් සමඟ මාස ගණනාවක් පැවති සාකච්ඡාවලින් පසුව ජූලි 31 වැනිදා නිකුත් කරන ලද ජනාධිපති නියෝගයක් හරහා මෙය නිවේදනය කරන ලදී.

නියෝගයට අනුව සංශෝධිත අනුපාත නිකුත් කිරීමෙන් දින හතකට පසු 2025 අගෝස්තු 7 වැනිදා සිට ක්‍රියාත්මක වන අතර, එම දිනයට පෙර දැනටමත් ප්‍රවාහනයේ ඇති භාණ්ඩ සඳහා නිදහස් කිරීම් හිමිවේ.