පරිවාස භාරයේ, ළමා නිවාසවල සිටින සහ වීදි දරුවන්ගේ අනාගතය සුරක්ෂිත කිරීම අරමුණු කරගත් ‘අර්ථ’ නමින් නව බැංකු ගිණුම් පද්ධතියක් හඳුන්වා දෙන බව රජය නිවේදනය කර ඇත.

මෙම මුලපිරීම සැලසුම් කර ඇත්තේ දරුවන් 9,191 දෙනෙකුට මාසිකව රුපියල් 5,000ක දීමනාවක් ලබා දීම සඳහා වන අතර, මෙම වසර සඳහා ඒ වෙනුවෙන් අයවැයෙන් රුපියල් බිලියනයක ප්‍රතිපාදන වෙන් කර ඇත.

ඊයේ (14) පැවති මාධ්‍ය හමුවකදී අදහස් දක්වමින් කාන්තා හා ළමා කටයුතු අමාත්‍ය සරෝජා සවිත්‍රි පෝල්රාජ් ප්‍රකාශ කළේ මෙම වැඩසටහන මඟින් දරුවන්ට ස්වාධීන ජීවිතයක් ගත කිරීමට හැකි වන තෙක් ඔවුන්ගේ ආරක්ෂාව සහතික කිරීමට උත්සාහ කරන බවයි.

“විවිධ තත්ත්වයන් නිසා අතහැර දමා ඇති හෝ අනාථ වූ දරුවන්ට වෙනත් ඕනෑම දරුවකුට මෙන් ඔවුන්ගේ අනාගතය ගොඩනැගීම සඳහා සමාන ආරක්ෂාව, ආදරය සහ අවස්ථා ලැබිය යුතුයි.” යනුවෙන් අමාත්‍යවරිය තවදුරටත් පැවසුවාය.

ඇයට අනුව, වයස අවුරුදු 18ට අඩු සියලුම පුද්ගලයන් වැඩසටහන යටතේ දරුවන් ලෙස සුදුසුකම් ලබනු ඇත.

ආයතනගත දරුවන් සම්බන්ධයෙන්, වයස අවුරුදු 16 දක්වා ඔවුන්ගේ අධ්‍යාපන අයිතිය ආරක්ෂා කිරීම සඳහා අදාළ ආයතන වෙත සෘජුවම දීමනාව ලබා දෙනු ලැබේ.

දිවයින පුරා ළමා සංවර්ධන මධ්‍යස්ථාන 356ක ළමුන් 9,191 දෙනෙකුට මෙම වැඩසටහනෙන් ප්‍රතිලාභ ලැබෙන බව ඇය තවදුරටත් සඳහන් කළාය.

මාසික රුපියල් 5,000 දීමනාවෙන් රුපියල් 3,000ක් ආයතන වෙත යොමු කෙරෙන අතර රුපියල් 2,000ක් අලුතින් පිහිටුවන ලද අර්ථ ගිණුම්වලට බැර කෙරේ.

අවුරුදු 18 සම්පූර්ණ වූ පසු ප්‍රතිලාභී දරුවන්ට එය ලබාගත හැකිය.

රැඳවුම් නිවාසවල, ළමා සංවර්ධන මධ්‍යස්ථානවල හෝ භාරකරුවකු සමඟ සහ වීදි දරුවන්ට රුපියල් 5,000ක මාසික දීමනාවක් ලබා දීමේ වැඩසටහන අද (15) ආරම්භ වන බව ඇමැතිනි පෝල්රාජ් පැවසුවාය.

මව්පියන් අහිමි වීම, භාරකාරත්වය අහිමි වීම හෝ මව සහ පියා යන දෙදෙනාගේම හෝ ඔවුන්ගෙන් එක් අයකුගේ භාරකාරත්වය යටතේ සිටින දරුවන් මෙන්ම අනාථ වූ සහ අතහැර දැමූ දරුවන් සඳහා රැඳවුම් නිවාස සහ ළමා සංවර්ධන මධ්‍යස්ථානවල ආයතනික රැකවරණය ලබා දෙන බව ඇය සඳහන් කළාය.

2024 වසර අවසන් වන විට, රජය, ස්වේච්ඡා සංවිධාන සහ රාජ්‍ය නොවන සංවිධාන විසින් රට පුරා පවත්වාගෙන යනු ලබන ළමා සංවර්ධන මධ්‍යස්ථාන 356ක ළමුන් 9,191ක් පමණ නේවාසික රැකවරණය ලබන බව වාර්තා වී ඇත.

මෙම වැඩසටහන යටතේ, අධ්‍යාපනය, සෞඛ්‍ය සහ අනෙකුත් සුභසාධන වියදම් සඳහා දරුවා සත්කාරකත්වය දරන අදාළ සංවර්ධන මධ්‍යස්ථානයට හෝ ජාතික ඉතිරිකිරීමේ බැංකුව (NSB) හරහා භාරකරුට රුපියල් 3,000ක මුදලක් ලබා දෙන බව ඇමැතිනි පෝල්රාජ් පැවසුවාය.

තවද, අනාගත භාවිතය සඳහා දරුවාගේ නමට රුපියල් 2,000ක මුදලක් NSB ඉතිරිකිරීමේ ගිණුමක මාසිකව තැන්පත් කරනු ලබන බව ඇය වැඩිදුරටත් වැඩිදුරටත් පැවසුවාය.

සෑම මසකම 10 වැනි දින අදාළ ගිණුම්වලට මුදල් බැර කරනු ඇත.