2012 දී අත්තනෝමතික ලෙස අත්අඩංගුවට ගෙන අත්අඩංගුවේ දී වධහිංසා පමුණුවන ලද තරුණයකුට රුපියල් මිලියන 1.2ක වන්දියක් පෞද්ගලිකව ගෙවන ලෙස තඹුත්තේගම පොලිස් ස්ථානයට අනුයුක්තව සිටි හිටපු පොලිස් නිලධාරීන් හය දෙනෙකුට ශ්‍රේෂ්ඨාධිකරණය නියෝග කර තිබේ.

ඒ, මෙම සිද්ධිය වන අවස්ථාවේ වයස අවුරුදු 27ක් වූ සන්නිවේදන මධ්‍යස්ථාන ක්‍රියාකරුවකු වන එම වින්දිත තරුණයා විසින් ගොනු කරන ලද මූලික අයිතිවාසිකම් පෙත්සමක තීන්දුව ලබාදෙමිනි.

වන්දි නියෝගයට අමතරව, සිද්ධිය සම්බන්ධයෙන් අපරාධ පරීක්ෂණයක් ආරම්භ කරන ලෙසත්, 1994 අංක 22 දරන වධහිංසා පැමිණවීම සහ අනෙකුත් කුරිරු, අමානුෂික හෝ අවමන් සහගත සැළකිලි හෝ දඬුවම්වලට එරෙහි සම්මුතිය යටතේ වගඋත්තරකරුවන්ට එරෙහිව අපරාධ නඩු පැවරීම සළකා බලන ලෙසත් ශ්‍රේෂ්ඨාධිකරණය නීතිපතිවරයාට නියෝග කළේය.

පොලිස් කොස්තාපල්වරුන් වන ප්‍රසන්න කරුණාජීව, එම්.ඩී. ජගත්පාල, එම්.ජී.ඒ.ටී.බී. අබේසිංහ, උපාලි හේරත්, පී.කේ.ජී.එස්.පී. ප්‍රේමතුංග සහ පොලිස් සැරයන් කරුණාතිලක යන නිලධාරීන් හය දෙනාටම ඔවුන්ගේ පෞද්ගලික අරමුදල්වලින් රු. 200,000 බැගින් වින්දිත තරුණයාට ගෙවන ලෙස නියෝග කෙරිණි.

ශ්‍රේෂ්ඨාධිකරණය නියෝග කළේ තීන්දුව දුන් දින සිට මාස තුනක් ඇතුළත මුළු මුදල ගෙවන ලෙසයි.

තඹුත්තේගම පොලිසියට එරෙහිව පැවති විරෝධතා පාගමනකට සහභාගී වූ බවට බොරු චෝදනා එල්ල කර 2012 අගෝස්තු 2 වැනි දින නීති විරෝධී රැස්වීමක් සම්බන්ධයෙන් අත්අඩංගුවට ගත් බවට පෙත්සම්කරු වන සුසිල් ප්‍රියංක සෙනෙවිරත්න චෝදනා කළේය.

විරෝධතා පාගමන පැවැත්වෙන අවස්ථාවේ ඔහු තම ව්‍යාපාරික ස්ථානයේ සිටි බවත් විරෝධතා පාගමනට කිසිදු සම්බන්ධයක් නොමැති බවත් ඔහු කියා සිටියේය.

පොලිස් අත්අඩංගුවට පත්වීමට පෙර සහ පසුව පෙත්සම්කරු අමානුෂික පහරදීමකට ලක් වූ බව අධිකරණය හමුවේ හෙළිවී තිබිණි.

යතුරුපැදි හිස්වැස්මකින් ඔහුගේ හිසට සහ කනට නැවත නැවතත් පහර දුන් බවත්, කකුලට සහ ශරීරයට පයින් ගැසූ බවත් ඔහු සිහිපත් කළේය.

එහි ප්‍රතිඵලයක් ලෙස, ඔහුගේ කන් බෙරය කැඩී ගිය අතර, ඔහුගේ වම් කනෙහි ස්ථිර ශ්‍රවණාබාධයක් හටගෙන තිබේ.

එස්. තුරෙයිරාජා සහ යසන්ත කෝදාගොඩ යන ශ්‍රේෂ්ඨාධිකරණ විනිසුරුවරුන් එකඟත්වය ඇතිව විනිසුරු ප්‍රියන්ත ප්‍රනාන්දු මෙම තීන්දුව ලබා දුන්නේය.

පොලිස් නිලධාරීන්ගේ හැසිරීම ආණ්ඩුක්‍රම ව්‍යවස්ථාවේ 11 (වධහිංසාවෙන් නිදහස් වීම), 12(1) (නීතිය ඉදිරියේ සමානාත්මතාවය), 13(1) (f)(අත්තනෝමතික ලෙස අත්අඩංගුවට ගැනීමෙන් නිදහස් වීම) සහ 13(5) (නිර්දෝෂී යැයි උපකල්පනය කිරීමේ අයිතිය) යන වගන්ති යටතේ සහතික කර ඇති පෙත්සම්කරුගේ මූලික අයිතිවාසිකම් උල්ලංඝනය කරන බව ශ්‍රේෂ්ඨාධිකරණය තීරණය කළේය.

7 වැනි වගඋත්තරකරු වන තඹුත්තේගම පොලිස් ස්ථානයේ ස්ථානාධිපති උපුල සෙනෙවිරත්න ද 12(1), 13(1) සහ 13(5) වගන්ති යටතේ පෙත්සම්කරුගේ අයිතිවාසිකම් උල්ලංඝනය කර ඇති බව සොයා ගන්නා ලදී.

සංජීව කළුආරච්චිගේ උපදෙස් මත ලිනුරි මුණසිංහ සමඟ නීතිඥ පුලස්ති හේවාමාන්න පෙත්සම්කරු වෙනුවෙන් පෙනී සිටියේය.