මාර්තු 28 වැනි දින අධිකරණයට අපහාස කිරීමේ චෝදනාව මත පුත්තලම මහාධිකරණ විනිසුරුවරිය විසින් රිමාන්ඩ් භාරයට පත්කරන ලද නීතිඥවරියක්, අභියාචනාධිකරණයේ අතුරු නියෝග මත අද වාරියපොළ බන්ධනාගාරයෙන් නිදහස් කරන ලදී.

ශ්‍රී ලංකා නීතිඥ සංගමයේ සභාපති රජීව් අමරසූරිය, විධායක සභාවේ සාමාජිකයන් කිහිපදෙනෙක් සහ නීතිඥවරු විශාල පිරිසක් වාරියපොළ රිමාන්ඩ් බන්ධනාගාරයට පැමිණියහ.

අභියාචනාධිකරණය විසින් නිකුත් කරන ලද අතුරු නියෝගවලට අනුව, අදාළ නීතිඥවරිය අද වාරියපොළ රිමාන්ඩ් බන්ධනාගාරයෙන් නිදහස් කරන ලදී.

අධිකරණයට හිස නමා ආචාර නොකිරීමේ චෝදනාව මත නීතිඥවරිය රිමාන්ඩ් භාරයට පත්කරන ලදී. එය නිසි ගෞරවයක් නොපෙන්වීමට සමාන යැයි කියනු ලැබේ.

මාර්තු 7 වැනි දින ඇප විභාගයක් සඳහා විත්තිකරුවකු වෙනුවෙන් පෙනීසිටි අවස්ථාවේදී, ඇය හිතාමතාම නිසි ගෞරවයකින් තොරව අධිකරණයට ආමන්ත්‍රණය කළ බවට නීතිඥවරියට එරෙහිව එල්ල වූ අනෙක් චෝදනාව විය.

කෙසේවෙතත්, නීතිඥවරිය වෙනුවෙන් නීතිඥ සංගමය විසින් ඉල්ලා සිටි හදිසි විභාගය සැළකිල්ලට ගනිමින්, රිමාන්ඩ් භාරයේ තැබීමේ නියෝගය අත්හිටුවා ඇය වහාම බන්ධනාගාරයෙන් නිදහස් කරන ලෙස අභියාචනාධිකරණය නියෝග කළේය.