ත්‍රස්තවාදී කණ්ඩායම්වලට දේශපාලන කඳවුරුවල සිරවීමට ඉඩ නොතබන ලෙස බොදුබල සේනා සංවිධානයේ මහලේකම් ගලගොඩඅත්තේ ඥානසාර භික්ෂුව රජයෙන් ඉල්ලා සිටියි.

ඊයේ ජනමාධ්‍ය වෙත අදහස් දක්වමින් භික්ෂුව කියා සිටියේ අදාළ සියලු සාක්ෂි තමන් සතුව ඇති නමුත් එය ඉදිරිපත් කළ හැක්කේ පාර්ලිමේන්තුවට පමණක් බවයි.

“මගේ සාක්ෂි පාර්ලිමේන්තුවේ විවාදයට ගත යුතුයි. නීති හදන්නේ එතනයි. පාර්ලිමේන්තුවෙන් පිට කාටවත් සාක්ෂි පෙන්නලා වැඩක් නැහැ,” භික්ෂුව පැවසීය.

“ප්‍රධාන ධාරාවේ පක්ෂයකින් අපට ඉඩක් ලබා නොදෙන බැවින්, සම්ප්‍රදායික මුස්ලිම් ප්‍රජාවේ සාමාජිකයින් විසින් ලබා දුන් පසුගිය වසර 15 සිට 20 දක්වා අප විසින් රැස්කරන ලද තොරතුරු හෙළිකිරීමට පාර්ලිමේන්තුවට යාමට අපට උදව් අවශ්‍යි” භික්ෂුව සඳහන් කරයි.

“මුස්ලිම් සමාජයේ ඇතැමුන් අපට ලබාදුන් මෙම අන්තවාදී සහ මූලධර්මවාදී තොරතුරු ඉදිරිපත් කිරීම අපගේ අරමුණයි,” භික්ෂුව වැඩිදුරටත් පැවසීය.

“මට මේ ප්‍රශ්න විසඳන්න පාර්ලිමේන්තුවේ තැනක් ඕන. එහෙම නැත්නම් අපිට මේ තොරතුරු හෙළි කරන්න වේදිකාවක් නෑ. නීති හදන තැන්වලට බලපෑම් කරන්න ඕන” යනුවෙන්ද භික්ෂුව පැවැසීය.

“භික්ෂූන් වහන්සේලා පාර්ලිමේන්තු යන්න අවශ්‍ය නැහැ, නමුත් භික්ෂූන් වහන්සේලා වශයෙන් රටේ සංස්කෘතික උරුමයන් ආරක්ෂා කිරීම අපේ යුතුකමක්. මම රට බේරා ගැනීමට උත්සාහ කරනවා,” භික්ෂුව පැවසීය.

“මම පාර්ලිමේන්තුවෙන් පිටත කතා කරන හැම වෙලාවෙම අන්තවාදී බලවේග මට වෛරී ප්‍රකාශ කරනවා කියලා චෝදනා කරනවා. ඒක තමයි ඇත්ත. මේ අන්තවාදී බලවේගවලට ඔවුන්ගේ ඉගැන්වීම්වලට අනුව මිනිස්සු මරන්න පුළුවන්. ඒ ගැන කාටවත් විවාදයක් නැහැ. අපි හඬක් නැඟුවොත් ප්‍රතිප්‍රහාර දෙනවා. බෙල්ල කැපුවත් ඔළුව නවාගෙන ඉන්න තමයි ලෝකේ බුදු දහම කියලා කියන්නේ.’’ භික්ෂුව සඳහන් කරයි.