ගුජරාටයේ මුන්ද්‍රා වරායේ සිට කොළඹ බලා යාත්‍රා කරමින් තිබූ බහාලුම් භාණ්ඩ ප්‍රවාහන නෞකාවක් වන MV Maersk Frankfurt හි හටගත් ගින්නෙන් පසු මෙරට මුහුදු සීමාවට බලපෑමක් සිදු වී ඇත්ද යන්න සම්බන්ධයෙන් ජාතික ජලජ සම්පත් පර්යේෂණ සහ සංවර්ධන නියෝජිතායතනය (NARA) මේ වන විට නිරීක්ෂණය කරමිනි සිටී.

ගෝවේ සිට නිරිත දෙසින් නාවික සැතපුම් 102 ක් පමණ දුරින් පිහිටි ස්ථානයකදී සිකුරාදා (19) සවස මෙය සිදුව තිබිණි.

නාරා අධ්‍යක්ෂ ජනරාල් ආචාර්ය කේ. අරුලානන්දන් පවසන්නේ නිරිතදිග මෝසම් සමයේදී බටහිර ඉන්දීය වෙරළ ධාරාව මගින් ඉන්දියාවේ බටහිර වෙරළ තීරයේ සිට ශ්‍රී ලංකාවේ බටහිර වෙරළ ඔස්සේ ජලය ගෙන යන බවයි.

මේ වන විට ශ්‍රී ලංකාව නිරිතදිග මෝසම් කාලයක සිටින බැවින් ගෝවෙන් ආරම්භ වී මහාද්වීපික තටාකය දිගේ දකුණු දෙසට ගලා යන මෙම ධාරාව ශ්‍රී ලංකාවේ බටහිර වෙරළට ඔබ්බෙන් වූ ජලයට බලපෑම් කළ හැකි බව ඔහු පෙන්වා දෙයි.

නාරා ආයතනය මේ වන විට බලපෑම තක්සේරු කරමින් සිටින බවත් ජල සාම්පල එකතු කරමින් තත්ත්වය සක්‍රීයව නිරීක්ෂණය කරන බවත් ආචාර්ය කේ. අරුලානන්දන් පවසයි.

මේ අතර ශ්‍රී ලංකා නාවික හමුදා මාධ්‍ය ප්‍රකාශක කපිතාන් ඉන්දික ද සිල්වා පවසා ඇත්තේ සිද්ධියෙන් ශ්‍රී ලංකාවට සෘජු ආරක්ෂක තර්ජනයක් නොමැති බවයි.

මෙම අදියරේදී කිසියම් පාරිසරික තර්ජනයක් තීරණය කිරීම හෝ නෞකාවෙන් තෙල් කාන්දුවක් තහවුරු කිරීමට කාලය ප්‍රමාණවත් නොවන බව ද ඔහු සඳහන් කර තිබේ.

අදාළ නෞකාවේ ගිනි නිවීමේ උත්සාහයන් රළු මුහුද සහ අයහපත් කාලගුණික තත්ත්වයන් නිසා සංකීර්ණ වූ බව වාර්තා වී තිබිණි.

ඉන්දීය වෙරළාරක්ෂක නිලධාරීහු කාර්ය මණ්ඩලයේ ආරක්ෂාව සහතික කරන අතරම පාරිසරික ව්යසනයක් වැළැක්වීමට කටයුතු කරමින් සිටියහ.

ගිනි නිවීමේ ප්‍රයත්නයන් මධ්‍යයේ කාර්ය මණ්ඩලය ආරක්ෂිතව සිටින බව ඔවුන් තහවුරු කර තිබේ.