March 18, 2024
නාරාහේන්පිට පොලිස් ස්ථානයට අනුයුක්තව සේවයේ නිරතව සිටි පොලිස් පරීක්ෂකවරයකු, තෙල්දෙණිය පොලිස් ස්ථානයට අනුයුක්තව සේවයේ නිරතව සිටි උප පොලිස් පරීක්ෂකවරයකු සහ හෝමාගම පොලිස් ස්ථානයට අනුයුක්තව සේවයේ නිරතව සිටි පොලිස් කොස්තාපල්වරයකු, පොලිස් සේවයේ නිරතව සිටින අතරතුර හොරරහසේ රට රැකියාවක් සොයා විදෙස්ගතව ඇති බව උසස් පොලිස් නිලධාරියෙක් සඳහන් කළේය.
මෙම නිලධාරීන් තිදෙනාට සේවය අතහැර යෑමේ නියෝග නිකුත් කිරීමට නුගේගොඩ සහ කොළඹ දකුණ කොට්ඨාසය භාර ජ්යෙෂ්ඨ පොලිස් අධිකාරීවරු පෙරේදා (15) පියවරගෙන තිබිණි.
නාරාහේන්පිට පොලිසියේ සේවයේ නිරත පොලිස් පරීකෂකවරයා පෙබරවාරි 03 වැනිදා සිට රාජකාරියට වාර්තා කර නොමැති බවත්, ඔහු පෙබරවාරි 13 වැනිදා රටින් පිටව ගොස් ඇති බවත් අනාවරණය වී තිබේ.
තෙල්දෙණියේ උප පොලිස් පරීක්ෂකවරයාද පෙබරවාරි 03 වැනිදා සිට සේවයට වාර්තා නොකර සිට රටින් පිටව ගොස් ඇති බව සඳහන්ය.
හෝමාගම පොලිසියේ කොස්තාපල්වරයා දින දෙකක නිවාඩු ලබා සිට 2023 වසරේ නොවැම්බර් 15 වැනිදා සිට සේවයට පැමිණ නැත.
ඒ ගැන සොයා බැලීමේ දී අනාවරණය වී ඇත්තේ ඔහු රටින් පිටව ගොස් ඇති බවය.
බදුල්ල කොට්ඨාස අපරාධ ස්ථාන පරීක්ෂණාගාරයේ (සොකෝ) ස්ථානාධිපතිවරයා රටින් පිටව ගොස් ඇති බව පසුගිය සතියේ අනාවරණය වී තිබුණි.
පොලිස් පරීක්ෂකවරයෙක් වන එම නිලධාරියා ඉහළ නිලධාරීන්ට කිසිදු දැනුම්දීමකින් තොරව මෙසේ රටින් පිටව ගොස් ඇත්තේ නිසි අවසරකින් තොරවය.
ඒ අනුව පසුගිය 14 වැනිදා ඔහුගේ වැඩ තහනම් කිරීමට බදුල්ල පොලිස් අධිකාරීවරයා පියවර ගත්තේය.
මෙම නිලධාරියාගේ බිරිය බදුල්ල පොලිසියේ සේවයේ නිරත පොලිස් පරීක්ෂකවරියකි.
ඇගේ සැමියා වන සොකෝ ස්ථානාධිපතිවරයා පසුගිය පෙබරවාරි 19 වෙනිදා සිට සේවයට වාර්තා නොකිරීම හේතුවෙන්, ඒ ගැන ඇගෙන් උසස් පොලිස් නිලධාරීන් විමසූ විට පවසා ඇත්තේ සැමියා රට රැකියාවක් සඳහා පිටත්ව ගොස් ඇති බවය.
පොලිස් සේවයේ නිරත පොලිස් නිලධාරීන් රැසක් පසුගිය කාලය පුරාවට මේ ආකාරයට රටින් පිටව ගොස් ඇත.
ඒ අතර වඩාත් අවධානයට යොමුවූයේ පොලිස් ක්රීඩා කොට්ඨාසයේ නිලධාරීන් පිරිසක් අන්තර්ජාතික පොලිස් සංගමයේ සමුළුවකට සහභාගිවීමට ගොස් අතුරුදන්වීමකි.
එසේම කොළඹ අපරාධ කොට්ඨාසයේ සේවයේ නිරත පොලිස් පරීක්ෂකවරයකුද ප්රංශයේ සංචාරයක් සඳහා ගොස් එරට රැකවරණය ඉල්ලමින් රැඳෙන්නේ පාතාලයෙන් ඔහුට තර්ජන එල්ලවූ නිසා බව කියමිනි.(දිනමිණ)
